مفيش احسن من ان يكون ليك اصحاب بجد وانا عندي اصحاب بجد

مصري للأسف

2009-06-09T22:30:00.003+02:00

اعمل في دواميين تنخرط روحي فيهم تماما عملي الاول هو احد اطباء امتياز في قصر العيني التي تلتحم فيه طوائف الشعب المصري لتتحول الى اطياف تتسلل الى روحي يوميا صباحا لتصيبها بالكثير من الاكتئاب لا اعلم هل اتمنى لتلك الارواح التي تعبر بوابة الزمن المكتوب عليها قصر العيني ان تتحلل من اجسادها لتذهب الى خالقها فيفعل معها ما يشاء ام اتمنى لتلك الارواح ان تظل متحده مع اجسادها المهترئه حتى يجهز احدهما على الاخر لا اعلم كيف اصف الشعب المصري وانا اتعامل مع اقل طوائفه اطلاقا يوميا في عملى الاول هل هو شعب شديد الفقر وفقره ادى به الى ان يتحول الى شعب شديد النهم على كل ما هو مجاني ام ان ذلك الشعب هو شديد الوضاعه ليتكالب يوميا على كل ما هو مجانى اراهم يوميا يتراشقون ضحكاتهم وهم يأكلون اشباه الطعام الذي يسومونه لهم في الغذاء ثم اراهم ليلا يتبادلون نغمات الموبايل من موبايلاتهم التي تمتلك خدمة البلوتوث فلا استطيع بأي صوره تركيب تلك الاحداث اعيد على نفسى نفس السؤال هل هم يمتلكون الفقر ليأكلو ذلك الطعام ام هل هم يمتلكون الوضاعه ليتحملو اكل ذلك الطعام ؟

اتحول ليلا الى شخص اخر يتنصل من صفته كطبيب ولكن يحتفظ بذلك الحرف اللعين الذي لم اخرج غير به من كايتي يسبق اسمي وهو حرف الدال

اعمل كمدير تسويق مستشفى تخدم الطبقه الوسطى وهي التي يدعي احدهم ان الطبقه الوسطى هي التي تتقاضى شهريا اربعة الاف جنيه مصري اتعامل مع طبقه جيده نوعا ما تمتلك ما يكفي من كرامه لتمنهعا من عبور بوابة الزمن وما لا يكفي من مال لتتوجه الى دار الفؤاد ولكن في ظل جو الخدمه الخيريه الجميله يظهر كم الخوازيق الغير منتهى بداية من اصغر افراد المجموعه مرورا بأوسطها نهاية بهرم المجموعه لنننوع انواع الخوازيق

ادافع عن نفسي بضراوه لأحافظ على نفسي من الخوازيق واحارب بكل قوه وادعي بكل قوه اني انتصرت في جميع معاركي ولا يستطيع احدهم اي ينكر ذلك ولكن اكتشف يوميا بعد تكليلي بورود الانتصار انني انتصرت واحتفظت بالاشيء في معركة نحتفظ بها بفخر الانتصار ومرارة الحرب ثم تبدأ المعركه ثانية لنحتفظ ثانية بما لا نمتلكه ولا يستطيع كان من كان سلبه وهو سراب اللاشيء

في نهاية يومي اكتشف اني موصوم بكوني مصري ولا استطيع ان اتحلل من تلك اللعنه التي ظهرت في شهادة ميلادي

في النهايه لعله خير

التفسير الوجيز في علم الخطوبه

2009-03-27T15:35:00.003+02:00

هناقش النهارده التفسير الوجيز في علم الخطوبه وعلى اساس هذا التفسير ستكون خطوبة الشخص المدعو وائل احمد

هل يجوز شرعا لبس البدله للعريس ؟

اجتمع الامام البحبحاني و الامام سيد عكاوي انه لامانع اذا كانت البدله سوداء او كحلية اللون واختلفو على لون الخطوط التي يمكن اضافتها للبدله ولكن في اجنماع العلماء يجوز اللون الازرق

ماهي شروط عربية الزفه ؟

عندما عرض السؤال على الامام البحبحاني في جلسة العلم الاسبوعيه له في القهوه ثار ثوره عارمه وقال على جثتي تبقى في عربية ملاكي بني سويف ( واخدلي بالك يا على) ولكن اجاز الزفه في عربيه بيضه هيونداي النترا بس اشترط ان تكون العروسه بتعرف تزق عشان احتمالات انها تبوظ اكيده وتنزل تزق بمشاركة عريسها

وفي مقوله عن الامام سيد انه لا مانع في الهوندا السيتي

بالنسبه للزفه الاساسيه ؟

اجتمع الامام البحبحاني والامام البردعي ان الزفه بتكون والعريس مكشر والعروسه كمان مكشره ولا يجوز ان يمسك العريس يد عروسته ولا ان ينظر من الاساس لها و اذا ابتسم العريس عمدا فهذا من مبطلات الخطوبه ولا يجوز شرعا ان تكمل الزفة ويكون على العريس تصحيح هذا الخطأ فور حدوثه بخناقه بسيطه مع عروسته وان كانت ضحكه فتصحح بخناقه كبيره

اغاني القاعه ؟

اطلق الامام حنكش العنان لخيال الدي جي مان ووسع عليه الاختيار مابين اغاني العفاسي وسامي يوسف وجميع اغاني البوم قلبي شدا

لحظه لبس الشبكه ؟

اجتمع الامه انه يجوز ملامسة الدبله وهي لسه في ايد العريس لكل من السبابه والخنصل والبنصل للعروسه تحديدا العقله الاولى بس وبعدها يفلت العريس الدبله لحسن لا قدر الله يلمس العقله التانيه اما باقي الشبكه فلا يجوز للعريس لمس اكتر من السلسله ( فتحها فقط ) ثم تسلم لحد كبير يلبسها للعروسه

شو التورته ؟

حرام اصلا التورته لان بها كريم مشكوك انه يبقى من دهن الخنزير

السؤال الشائك

هل يجوز ان يرقص العريس مع اصحابه ؟

اجتمع الامه انه اصلا حرام يعزم اصحابه

هذا والله اعلم

اشكركم جميعا

2009-02-23T01:52:00.002+02:00

في ناس كتير فعليا اثرت جدا في حياتي واجب توجيه الشكر ليهم

اولا الاستاذ المحترم ممتاز القط

احب اشكرك بشده لكرم اخلاقك لاستقبالي في مكتبك الضخم وتفننك بشده في اثبات اني كم مهمل لا استحق الحياة وانك شخص منزه وان مصر هي حبك وعشقك الاول

ثانيا الاستاذ المبجل اسامه منير

اشكرك بشده لانك بتحاول بكل ما استطعت من قوه انك تضع اي بنت مش لاقيه طريق الانحراف على الطريق الصحيح ومش بتسكت غير لما بتتأكد انها بقت فتاة ليل او انها ادمت مصاحبة الرجاله المتجوزين

ثالثا الاخ المبجل مذيع برنامج عم يتساون اسمه حاجه عابدون والله مش فاكر

اشكرك من اعماق قلبي على انك بتعطي اللمحه الجنسيه لبرنامجك الديني واشكرك اكتر على حواراتك الدينيه اللتي لا تخلو من ايحاءات جنسيه في كل سؤال مثل هل يجوز الصلاه على الميت ؟

فيكون ردك بمنتهى الثقه يجوز في حاله الطهاره الكامله ولا يجوز بعد ملاقاة الزوجه

فعلا اجابه مقنعه

رابعا وزير الصحه

اشكرك واشكر امك على تأمين مستقبلي

خامسا مدير حسابات المستشفى اللي بشتغل فيها

اشكرك على مجهودك المبالغ فيه على ابتكار كل اساليب الخزوقه المبتكره عشان تخزوقنا

سادسا الاخت نور والاخ مهند

شكرا عشان علمتو الناس الهيافه والتفاهه عشان بجد كانو محتاجنكو

سابعا اسعد مدير امن الكليه عندي

شكرا لتثبيت فكرتي عن امثالك انهم كلهم من احسن شباب مصر

ثامنا الاستاذ احمد عز

شكرا عشان وفرتلنا السكن بأرخص الاسعار

تاسعا تامر حسني

شكرا لجعلي استمتع بجمال ورونق شعر صدرك

عاشرا صاحب اول طلعه جويه

اشكرك على كل ما فعلته وكل ما ستفعله

اعتذر لكل من يستحق الشكر ولم اشكره

الى من ملكتها

2009-02-12T16:50:00.003+02:00

منذ فتره اكتشفت روحي بقوتها انها في جسدي المهلهل الضعيف وقررت دون ان تعطيني اي انذار ان ترحل تاركة لي اطلالها لأكمل بها ماتبقى لي من حياة
بدأت روحي في بحثها المضنى عن ذلك المسكن الجميل الذي ترى انها تستحقه حتى اكتشفته لم تحدد هويته ولكنها حددت مكانه وبدأت لنحارب من اجله خاضت الكثير من الحروب ولكن لم تخر قواها واكملت حتى جاء ذلك اليوم الذي اصبح يفصل بينها وبين مسكنها اسوار ذلك الحصن
خرجت من مخبئها لتكمل معركتها ولكن اسوار الحصن المنيعه منعتها وتراشقتها السهام لتصيبها في جميع اجزائها وتجبرها على ان تلوذ مرة اخرى الى ذلك المخبىء
داوت جراحها و حصنت نفسها بما تستطيع تحصينه لتعود مرة اخرى الى تلك الاسوار وتكمل المعركه ولكن بقوة اخرى وبشبح امل ان ترى مسكنها وراء تلك الاسوار
هدمت قيودها وهدمت معها اسوار ذلك الحصن لترى مسكنها الجديد بروعته ونقائه وتتناسى معه الامها وندبات جروحها السابقه التي اصابتها في معاركها للوصول اليه
:فألى من ملكت روحي
اجعلى نفسك لها سكنا لانها حاربت كثيرا لتكونين لها المأوى

عنق الزجاجه

2009-01-05T21:13:00.004+02:00

السادات من حوالي 30سنه قال ان مصر هتعبر عنق الزجاجه سنه 1979م
السؤال حد يعرف لامؤاخذه الازازه فين دلوقتي؟

الحمد لله

2008-11-19T04:45:00.002+02:00

في لحظه من اللحظات التي يتوقف عندها العقل تماما عن التفكير في كل شيء صغير تتجسد امامك عظمه الخالق تنفرد وحدها بنظرك بروحك تمتلكك تسافر بك الى افاق بعيده الي سماء من الصفاء ومن العشق تصمت تماما لتتحدث روحك تتذكر كم كنت ضائع تتذكر ذنوبك تشخص امامك عيوبك وفي قمة تلك اللحظه يضيء لك ذلك المصباح تجهل اتجاه الضوء ولكنك تعرف تماما مصدره تتذكر رحمته تتضائل خطاياك امام رحمته تتعاظم ثقتك في رحمته تتذكر جبروته تتذكر قسوه انتقامه فيشع الضوء اكثر ليمحو الرهبه ويسكن الهدوء في جميع ارجاء روحك تؤثر الصمت تعود للتذكر خطاياك فيعود ليذكرك برحمته لتتشبع روحك بها تنسى كل شيء وتظل تلك اللحظه كبريق من الامل يدفعك ان تكمل وتتذكر دائما انه هو من قال واذا سألك عبادي عني فأني قريب اجيب دعوة الداعي اذا دعاني
لا يسعك في تلك اللحظه الا ترفع يدك اليه شاكرا اياه على انه منحك تلك اللحظه وعلى انه لم يخذلك كما خذلته

مدرستي نظيفه ..... لطيفه ..... متطوره

2008-07-17T02:34:00.002+02:00

انا وبلا فخر خريج مدرسة الاورمان الثانويه بنين التي تقبع في شارع الدقي مش عارف طبعا ايه اللي فكرني بالموضوع بس قلت احكيه عشان افتكرته امبارح مع انه حصل من 8 سنين
مدرسة الاورمان عباره عن مدرسه ضخمه عباره عن اربع مباني وتحتوي المدرسه على 26 فصل اولى ثانوي
و 25 تانيه ثانوي وزيهم تالته ثانوي

المبنى الاول يحتوي على فصول الفائقين ودول صفوة المدرسه وقدام المبني ده حوش لوحده صغير المفروض يلعب فيه فرافير المدرسه اللي هما الفائقين اللي كنت انا منهم يفضل 3 مباني قدامهم حوش ضخم مش مبالغه قد استاد القاهره اخر مبنى في التلاته دول يطلق عليه مبني العزبه يوضع فيه كل طالب يتوسم فيه انه هيطلع تاجر مخدرات او تاجر سلاح اعلا هذا المبنى يقبع طالب او اكتر يطلق عليهم النادورجيه الطالبين دول وظيفتهم انهم يطلقو عبارات الانذار والاشارات الضوئيه لتجار المخدرات اللي جوه المبنى عشان لو حصل كبسه او المدير قرر يعمل حملة تفتيش
ده بالظبط الجو العام للمدرسه
القصه بقا انه في يوم من الايام والشمس مشرقه والعصافير تغرد على مدرستي الغناء قررت ام وبنتها انهم يسألو على ابنهم في المدرسه اللطيفه بتاعتي ودخلو من باب المدرسه الرئيسي اللي هو في وش الحوش الضخم وعشان الجو العام يكتمل تزامن وصولهم مع الفسحه وده معناه ان الحوش كان يوجد فيه مالايقل عن 3000 طالب ودي مش مبالغه والله المهم بدأت الام والابنه - اللي كانت لابسه تي شيرت منغير كوم يعني تي شيرت كت كما يقول الفرنجه – يشقو طريقهم في اتجاه مبنى العزبه عشان يوصلو للولد يسألو عليه وفي هذه اللحظه وقف النادورجي عشان اصبح في حركه غير متزنه في حوش المدرسه بسبب البنت دي المهم عشان المسافه طويله النادورجي تردد في اطلاق اشارته الضوئيه والسمعيه واخد خطوتين لقدام على سطح المبنى عشان يتأكد من الللي هو شايفه
المهم بعد ما قطعت البنت نص المسافه وبقت شبح صعب رؤيته بالنسبه للنادورجي اصبح الولد بيضرب اخماش في اسداس ومش عارف هل اوهامه وضلالاته ورغباته تهيء ليه اشياء ولا لا وبما ان الولد بيتعامل باحترافيه رفض يطلق اي انذار لانه يثق تماما في سرعة المعلمين اللي جوه المدرسه في انهم يخبو البضاعه وبردو ما اطلقش اي انذار
المهم اصبحت البنت قريبه جدا من مبنى العزبه وتأكد الولد من اللي هو شايفه وهنا نسى الولد كل ما تعلمه من تجار المخدرات اصحابه واطلق التبيه الصوتي وكان :
مزززززززززززززززززززززززززززززززززززززززززززززه في المدرسه
طبعا بالرغم من الدوشه الرهيبه اللي كانت في الحوش الا ان صوت الولد هز جنبات المدرسه وفي لحظه انطلق كل طالب في الحوش الى البنت وامها وبعد ثانيه اتخطفت البنت واصبحت محاطه بحوالي 1000 طالب في مظاهره شعبيه طلابيه
وفي لحظه ظهر في الافق من بعيد استاذ سعد و استاذ حاتم
سعد ده لسانه اشد وساخه من الهباب الاسود اللي بيسفلتو بيه الشارع اما بقا حاتم فده راجل معترف بأن اسهل طريقه للنقاش هي الضرب يعني الاتنين مع بعض يشكلو شخص سافل متكامل المواصفات
المهم هجم الشخصين دول على المظاهره الشعبيه الطلابيه الخيريه وفي اقل من 15 ثانيه كانو واصليين للبنت واخدوها من وسط المظاهره او اخدو ما تبقى منها من وسط المظاهره واتجهو بيها مسرعين عند مدير المدرسه
اللطيف في الموضوع ان البنت خرجت ومافيش اي جزء من هدومها متقطع البنت خرجت سليمه تماما وده معناه ان ال 1000 طالب اللي كانو حواليها كانو مستمتعين جدا برسم خيالات في دماغم يعني كل واحد مغمض عينه وماسك اي جزء من زميله اللي واقف قدامه وقاعد في خيالاته يبني اوهام واحلام انه ماسك جزء من البنت وطبعا هو كده في منتهى الانسجام والسعاده
معرفش لحد النهارده البنت حصل فيها ايه بعد كده ومعرفش اخوها عمل ايه ومعرفش حتى امها كانت فين في وسط المظاهره دي
المهم تاني يوم ظهر في وسط الطابور مدير المدرسه الوقور شعبان بيه مشهور وفضل يكيل لينا الشتايم واحده تلو الاخرى ومن يومها واصبح ثابت في وجبة المدرسه قطعة حلاوه مصنعه غالبا مخصوصه لمدرستنا وقطعه الحلاوه دي مغرقينها زيت كافور و اصبحت مدرستنا في مصاف المدارس المتطوره المتحضره

اطول يوم في عمري

2008-07-08T01:31:00.002+02:00

امبارح كان من اطول ايام حياتي
هبدأ من اول اليوم تماما . صحيت الصبح وانا قاعد لوحدي في البيت وقررت افطر بعدين لقيت انه مجهود على الفاضي فقلت بلاش فطار و اذاكر كلمتين حمضانين على غير العاده وبعدها بشويه قلت اتغدا بقا ويلا مجهود يضيع بقا مش فارقه ودخلت المطبخ والحمد لله اتشويت من الزيت عشان ماشاء الله عليه وعلى ذكائي حطيت البطاطس في الزيت وهي خارجه من الفريزر ومليانه تلج بس بردو اقول ما علينا هنا بقا انتهت الفقره الصباحيه

تبدأ الفقره الثانيه بأني قمت لبست البدله عشان عندي فرح ابن عمي وتوجهت الي ميدان الجيزه عشان اركب السي تي ايه ( الاتوبيس المكيف ) الحمد لله وصلت وركبت الاتوبيس وقررت من جوايا اني مش ناوي اخد ذنوب النهارده عشان السي تي ايه بيبقى فيه بلاوي عشان كده حطيت جاكت البدله في الكرسي اللي جنبي وقلت هيعد جنبي راجل وراجل وحش كمان وقد كان قعد جنبي راجل ما استحماش من حوالي قرن المهم قلت ما علينا اهو كله بثوابه وبدأت اعمل منهمكا في كتاب كان معايا عشان يضيع الوقت عشان المشوار طويل عشان الفرح في جسر السويس المهم بعد حوالي نص ساعه برفع عيني لقيت قدامي جسم وجسم معناه جسم يعني مش هدوم تحتيها جسم انا اقصد جسم يعني واحده ضهرها كله باين طبعا انا قلت انا هحافظ على وعدي مع نفسي ومش هبص اهي النظره الاولى ليك وربنا كبير بردو انه اداني نظره زي دي ومش باصص تاني
المهم لفيت رقبتي لقيت خير اللهم اجعله خير بنت لابسه شورت والله العظيم شورت طبعا انا كنت قربت اعيط والله من هول الصدمه واني يعني خلاص لازم ابقى محترم المهم رجعت دماغي للكتاب ومارفعتهاش غير في المحطه اللي هنزل فيها وهنا تنتهي الفقره التانيه

تبدأ الفقره التالته وياعيني ياعيني على الفقره التالته
وصلت الفرح والعريس والعروسه لسه ماوصلوش وفجأه تدخل بنت شكلها مكنش مطمني من الاول والحمد لله كان عندي حق بس بردو ماعلينا قلت ماليش دعوه
المهم وصل ابن عمي وبدأ الفرح والزفه والزغاريط والناس بدأت ترقص وانا بردو مش ناوي ابص انا راجل دكتور ومحترم
المهم الترابيزه اللي كنت قاعد عليها انا واخواتي وماما دخلت علينا واحده نزلت بوس في الناس اللي قاعده ومنهم ماما وفجأه سألتها فين ابنك انا قلت قشطه دي مثلا واحده عارفاني وماشفتنيش من زمان وعايزه تتعرف طبعا دخلت بلباقه وماما فرجتها عليه و اعتقد كان ممكن تقول لماما طيب ممكن تخليه يتشقلب على اساس بقا اني كبرت المهم بردو ماعلينا وماعلينا انها غالبا اول مره تشوفيني في حياتها وماعلينا اني بردو ما اعرفش هي مين لحد دلوقتي ووالله مش عايز اعرف المهم راحت الست اللي مش عارفها قالتلي انا جايبالك عروسه وبصراحه كان واقف ورا الست دي بنت غالبا معرفتش ان في فرح غير قبلها بخمس دقايق وكانت بتستحمى واستعجلوها فمكملتش لبسها وجت يعني اعتقد انها نسيت تلبس اي حاجه فوق الهدوم الداخليه بغض النظر انا سمعت كلمة جايبالك عروسه وشفت البنت دي وراها قلت فل اوي انا هنحرف بقا واخد بقا ذنوب من اللي توزن في ميزان السيئات دي واتعرف عليها اصل بصراحه انا مش سيدنا يوسف والمغريات بقت اكبر من شاب غلبان في حالاتي رحت بمنتهى العبط قلتها فين العروسه وطبعا فاتح بؤي من اول ودني اليمين لحد ودني الشمال ومستنيها تقولي اهي ورايا اقوم اخدها بالحضن وانسى بقا امي والمعازيم بس هيهات راحت قالت يا دنيا يا دنيا المهم لقيت شبح من بعيد جاي جري والحمد لله لما تحققت لقيتها بنت اموره ايوه بس عندها 10 سنين يعني حتى الانحراف مابقاش نافع طبعا انهارت احلامي وطموحاتي وسبتلهم الترابيزه ورحت في الدايره الموجود فيها الكثير والكثير من الرجاله اللي بيهزو وسطهم اجدع من الاخت الفاضله فيفي عبده ولكن يأبى القدر انه يسيبني في حالي وتهجم في وسط الدايره البنت اللي كانت في اول الفرح مش مطمناني وايه اديلو ادي قعدت ترقص بس ماشاء الله صحتها مساعداها وبردو قلت ياواد بلاش ذنوب كفايه عليك اتفرجت شويه كفايه كده
رجعت اتلقحت على الترابيزه وسبحان الله يأبى القدر للمره العاشره على التوالي اني اكون محترم وتنتقل دايره الرقص على بعد ربع متر من الترابيزه وسبحان الله اني الاقي راجل بيرقص في وسطيهم بس هيهات هيهات كلهم بنات وتتزعمهم البنت اللي كانت مش مريحاني
المهم بعد ما الناس كلهم في الفرح ضمنو اني اخد ذنوب تكفيني عشر سنين قدام انتهى الفرح والحمد لله لا بقيت دكتور ولا بقيت محترم وهنا تنتهي الفقره التالته

تبدأ الفقره الرابعه واحنا مروحين ركبت تاكسي انا واخواتي وامي والحمد لله بعد مانزلو وروحتهم لبيت اختي وانا كنت مروح البيت راح سواق التاكسي حب يضيفلي معلومه وقالي دول قرايبك ؟ قلتلو امي واخوتي راح قالي اصلهم صعبين اوي في التعامل والحمد لله كان القشه التي قسمت ظهر البعير طلعت غلبي كله فيه وخرسته لحد لما نزلت وهنا تنتهي الفقره الرابعه

في الاخر بقا انا قررت قراري النهائي انا مش هعمل فرح ولو عملته هعمله على بسين والصبح ومنغير العروسه كمان عشان وجع الدماغ
حسبي الله ونعم الوكيل في اللي اخترع البدل واللي اخترع فكرة الافراح واللي سولت له نفسه يغني اغاني هابطه بنت كلب زي اللي سمعتها امبارح

اخيرا يا مفتري

2008-06-28T09:52:00.003+02:00

اخويا الكبير امبارح خطب اخيرا كان يوم حلو اوي مكنش قارف اهلي في اليوم غير بتاع الدي جي اللي مش عارف احدد هو راجل ولا ست ولا كائن وسطي لحد دلوقتي بس المهم ان حوده اخيرا خطب

الف الف مليوووووووووووووووووووووووووووووووون مبروك يا حوده باشا عقبال الجواز

وجاري البحث عن انثى

2008-06-04T01:39:00.009+02:00

غالبا والله اعلم تم فرض شروط اداريه للاتحاق بدفعه كلية طب قصر العيني للعام الدراسي 2002 وكانت كالاتي

يجب على الملتحق ان يكون ذكر وعلى اي انثى او اي ذكر يحس بداخله بأنوثه او اي انثى ممكن في اي يوم من الايام تحس انها انثى الامتناع عن التقديم عشان هتتقفش هتتقفش

يجب على الملتحق ان يتمتع بغباء اجتماعي غير قابل للتصحيح او على الاقل ما يوازيه من جليطه وقلة ذوق او من الاخر يكون بيعرف ينهق

يجب على الملتحق ان يقر ويعترف انه بيحب اسعد باشا الظابط اللي لسه معداش 25 سنه ومسؤول عن امن الكليه ويكون بيحلم بيه ويرسمله بورتيريه سبعه متر في سبعه متر يوضح فيها مكنونات حبه الدفينه لاسعد

يجب على الملتحق ان يرفق مع طلب الاتحاق اي شهادات طبيه تفيد بأنه سبق له الاكتئاب او دخول اي مصحه نفسيه او يكتب اقرار على نفسه يفيد بأنه يرغب في الانتحار او سبق له الانتحار ويفضل لو محاولات انتحاره نجحت مش عايزين وجع دماغ

يجب على الملتحق ان يكون جبله ومش بيأثر فيه الشتيمه ويفضل اللي بيحب يتشتم

على الملتحق تصديق اي دكتور اهبل بيقول كلام اهبل وبطريقه هبله ولا يناقشه بأي طريقه هبله او حتى مش هبله

يستثنى من جميع الشروط السابقه اولاد الدكاتره واولاد اللوائات واولاد امناء الشرطه

الملتحق الذي لايفهم اي شرط من الشروط السابقه يبقى اكيد غبى ومش بيفهم واهلا به في صرح العلم والتعليم اهلا به في القصر العيني

احكي كام حكايه كده بقا على الهنا اللي انا عايش فيه
(1)
احنا بناخد غيابنا في ورقه وبنسلم الورقه للسكرتيره وده الطبيعي المهم في احد الايام اخدنا الغياب بس الظاهر ان الكلام ده معجبش بنت – في البطاقه بس – المهم هجمت علينا البت دي وقالت لصاحبي بصوت جاعوري مش هناخد غياب النهارده راح الواد بطيبة قبله قالها طيب والورقه دي اوديها فين راحت البت بمنتهى الثقه قالتله : عارف الورقه دي تحطها فين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
طبعا احنا انهارنا صاحبنا هيتشتم شتيمه يعيش بيها لحد لما يموت
المهم البت راحت ساكته كده وقالتله الورقه دي تحطها في الدرج بس بعد ايه هي خلاص وصلتلنا ان لو عملنا ورقه بالمنظر ده تاني منغير ما نستأذن هتعمل فينا ايه

(2)
التليف الكبدي بيعمل عند الرجاله تضخم في الصدر بسبب اضطرابات هرمونيه وعشان نفرق بين ان الصدر كبر بسبب التليف او بس من ترهلات بنلاقي جزء في الحلمه ناشف شويه اسمه ديسك المهم المعلومه الحمضانه دي قالها الدكتور بس بالانجليزي طبعا و كان العيان نايم قدامه على السرير ورافع هدومه وصدره كله باين
المهم فجأه ودون سابق انذار لقينا ايد انثويه بتتمد على صدر العيان وبتقرصه من صدره
سبحان الله العيان صدم وسبحان الله الدكتور صدم وسبحان الله انا صدمت وسبحان الله راحت البت مدت ايدها وماسكاله الصدر التاني
العيان كمل باقي الدرس مغطي جسمه ومقلق لحسن البت تمسكه من اي حته تانيه والدكتور فضل يشرح وهو بيحلق
على العيان لحسن واحد يقوم يعضه او يلطشه بالقلم

(3)
اول مره يعلمونا رسم القلب الدكتور جاب جهاز وقال ممكن ولد يتطوع ونريكو الجهاز بيتحط ازاي طبعا كلنا رفضنا راحت بنت رفعت ايدها وقالت يادكتور خرج الولاد واعملو عليا انا ؟
طبعا الدكتور بعد ما فاق من الصدمه قالها ممكن سؤال ؟ هو الناس دي رجاله وانا مش راجل؟
طبعا البت عشان تشله راحت قايلاله : لا هما ولاد انت دكتور
اصل الناس بينقسموا الى رجاله وستات ودكاتره

حسبي الله ونعم الوكيل في اللي كان السبب

مولد بطل

2008-04-28T11:20:00.004+02:00

في ليله من ليالي التاريخ المضيئه التي يشهد لها التاريخ ظهر هذا المولود في يوم الاربعاء الموافق الاول من مايو لعام 1985و هنا انعقدت لجنه من حكماء وامراء واولي الامر ليجعلو هذا التاريخ مناسبه وطنيه ولكن ظهر احد الحكماء وقال ان مثل تلك الفعله ستستفز الشعب لانها تنم عن عدم المساواه حتى تفتق ذهن احد الحكماء واقترح ان يسموه عيد العمال ولكنه في الاصل احتفاليه بمولد المبدع

وائل احمد حسن

ملحوظه

جميع المعلومات عن البطل موجوده في كتاب المبدعين مش فاكر صفحه كام بس موجوده ان شاء الله

المهم بقا انا اتم يوم الخميس الجاي ان شاء الله 23سنه وبما اني حققت كل طموحاتي المستقبليه عندي فيلتي في العجمي والعربيه الجاجور بتاعتي ومصروفي خمسميت الف جنيه في الشهر فأحب اذكر بعض اللمحات التاريخيه عن طفولتي واحكي شوية قصص عن طفولة البطل

زمان لما كان عندي حوالي عشر سنين اتخانقت انا واختي ولجل حظي الهباب ابويا شهد المعركه وبصراحه بابا مكنش بيضربني كتير يعني ممكن في حياتو كلها ضربني اقل من خمس مرات بس الحمد لله ماما قامت بالواجب وزياده المهم بعد ما بابا شاف المعركه قرر انه يتفاهم معايا انا واختى نقاش حضاري نتج عنه الام مبرحه في ضهري ووشي وبعض الكدمات في اجزاء مختلفه من جسمي

المهم دخلت انا واختى الاوضه واتصالحنا بس اختي الله يكرمها قالت انها عايزه تشوف شكلنا واحنا بنتخانق بيبقى عامل ازاي وانا بعبطي وافقتها ووقفنا قدام مرايا في الاوضه ومثلنا ان احنا بنتخانق وخير اللهم اجعله خير دخل بابا تاني والحمد لله المره دي تناقش معانا نقاش حضاري اكثر حضاره من اللي قبله

المهم في يوم تاني مش فاكر جننت ماما ازاي بس المهم ماما قررت توجب معايا وانا قررت اجري في الشقه وتبقى تطولني بقا المهم بما ان ماما اخدت اوليمبيات الامهات في حدف الشبب لمسافات طويله على ابنها اللي هو انا قامت رمتني بالشبب في نفس اللحظه اللى تزامنت مع اني كنت بلف ضهري عشان ادرس احداثيات موقع ماما عشان اقرر اتجاه الاوضه اللي هجري ليها والحمد لله الشبب اصابني اصابه مباشره في جبهتي تماما بس انا درستها بسرعه في عقلي وقلت لو كملت جري ماما مش هتتوقف عن الجري وهتجيبني هتجيبني فبسرعه رحت مصوت وقلت عيني اااااااااااااااه المهم حنان الام اشتغل طبعا وجتلي في ايه يااني وياحبيبي وبصراحه ضميري الميت قالي ياجدع استموت فيها دي فيها كام علقه مش هضربهم مهما عملت المهم شلت ايدي من على عيني ونزلت جفني وبهدوء قلتلها مش عارف افتح عيني طبعا ماما انهارت وانا قلت خلاص مافيش حاجه على اساس اني الابن المحترم الهادي وفضلت قافل عيني ساعه ولا حاجه وفلت من علقه وممكن اكون مضربتش اسبوع قدام

قصه تانيه

في يوم دخلت الاوضه بتاعتي وكان في كيس مناديل ضخم وضخم بمعني كلمة ضخم والحمد لله كأي طفل بيلعب بالكبريت رحت مولع في المناديل وهنا احب افتكر معلومه علميه مش هنساها طول عمري ان اسرع حاجه بتولع في الدنيا هي المناديل المهم انا قلت اعمل ايه اروح كطفل مجاهد واقول لماما وبابا اني ولعت في اوضه النوم ولا اطفى الحريقه اللي عمري ما هعرف اطفيها؟

هنا اصبح الاختيار صعب جدا اموت محروق ولا اموت من الضرب فقلت هي موته بموته فموت موتة ربنا واموت محروق اسهل رحت قافل الباب وانتظرت مصيري بس الحمد لله ريحة الحريقه وصلت لبابا وماما في اوضه المعيشه وانقذوني من موت محقق بس طلعو طيبين ومحدش عملي اي حاجه او ممكن اكون ضربوني علقه افقدتني الذاكره ونستني اصلا اني اضربت

كفايه بقا حكاوي عشان كده بقت فضايح مش حكاوي

نظره مستقبليه

2008-04-01T02:32:00.005+02:00

التتر : موسيقى ايدي في ايدك تنتهي بظهور البطل بيقول : انا وائل في بكالريوس طب عندي23 سنه تعاطفك لوحده مش كفايه ثم بعض النحيب................ ينتهي التتر

موسيقة المال و البنون تيت تيت تيت وقالو زمان دنيا دنيه غروره........ وحتى اخرها تتلاشى الموسيقى تدريجيا ثم تدخل الكاميرا بهدوء على ايدين كهل عجوز لا تحتوي اي دبله تدل انه متجوز او حتى اتجوز طول حياته ثم الكدر يوسع يبان وش البطل حواليه مجموعه من الاطفال وهو بيكح ويقولهم هحكيلكو حكاية الشاطر وائل

الكهل : صلو على النبي

يحكى انه في قديم الزمان كان في واحد اسمه الشاطر وائل لما كبر الشاطر وائل قرر انه ناوي يكمل نص دينه ويتجوز ثم يضحك الكهل ضحكه خبيثه ويقولهم عارفين ايه اهم حاجه في الجواز؟

الاطفال في نفس واحد : العروسه

الكهل : كنت عارف انكو هتقولو كدا مش المهم العروسه المهم الشقه وده اللي عرفه الشاطر وئل بعد محاولات نجحت كلها بدليل انه مش خاطب ولا مرتبط اصلا

المهم ياولاد بدأ الشاطر وائل يدور على الشقه و واجه في التدوير المضني بتاعه الكهربائي محمود الحرامي والسمسار محسن والتنين ابو راسين

الاطفال : احكيلنا

الكادر يوسع تاني والكهل بينظر الى الفراغ ويبدأ يحكي ويتذكر منظر الشاطر وائل

راح الشاطر وائل لشارع اسمه زغلول اخر شارع في شارع الهرم يعني ممكن تنط من البلكونه تقع فوق الهرم رأسا المهم شاف الشاطر وائل شقه مساحتها حلوه و بخمسه وتمانين الف جنيه وعشان الشاطر وائل قليط شويتين رفضها بس كان الشاطر احمد ربيع مع الشاطر وائل و اقنعه انها حلوه وتنفع وفعلا وافق الشاطر وائل وراح يدفع العربون للكهربائي محمود اللي كان وسيط في البيع

المهم الشاطر وائل سأل عم محمود هو انا ليه حق في الارض يعني لو العماره وقعت ليه حق؟

عم محمود بضحكه في منتهى الغباوه : لا طبعا بعدين صلي على النبي دي العماره حديد

الشاطر وائل وهو كاتم مشاعره : مش هينفع كلم اصحاب البيت ورد عليه

بعدها بيومين

عم محمود : ابسط ياشاطر وائل ضحكت عليهم ونزلت عشر تلاف

يعني يا فرحتي ادفع وبعد نص ساعه يجيب قرار ازاله وابقى في الشارع

رفض الشاطر وائل محاولات عم محمود انه يسرقو

وانتظر الشاطر وائل والحمد لله وبعد طول انتظار الحديد بقا ب 6100

يعني الشقه اللي كانت بخمس تلاف بقت بنص مليون جنيه

انهارت جميع احلام الشاطر وائل وراح يدور في منطقه في الطلبيه فيصل اسمها كفر طهرمس اي والله كفر طهرمس وكان معاه سمسار اسمه ايه ياولاد

الاطفال : محسن

الكهل : صح ياولاد

محسن ده اخد الشاطر وائل ووراه شوية شقق ولكن بما ان الشاطر وائل راجل براوي رفض عشان المنطقه فيها حميميه مستحيل تلاقيها في اي حته وحاول الشاطر وائل يوازنها بس بردو منفعش

الاولاد : يعني اي حميميه زياده ؟

الكهل : يعني اقرب مسافه بينك وبين جارك نص متر طبعا مش الشقه اللي جنبك قصدي الشقه اللي في العماره اللي قدامك

الاولاد : و وازنها ازاي ؟

الكهل : حسبها ان في ميزه ان ممكن لو المدام بتاعته المنشر عندها خلص ممكن تنشر عند الجيران بس العيب انهم ممكن بردو يسرقو الغسيل

وبردو ممكن لو الشاطر وائل كان نايم والغطا اترفع من عليه ممكن بنت الجيران تشب شويه وتغطيه بدل ماياخد برد بس بردو ممكن بنت الجيران تبقى عكروته وشقيه وتلاقيه متغطي تروح كشفاه

عشان كده بردو رفض الشاطر وائل

الاولاد : طيب وعمل ايه الشاطر وائل ؟

الكامير بتدخل على وش الكهل العجوز كلوس جامد على عنيه المليانين دموع صمت لمدة ثواني صوت المزيكا يعلا تاني وتنهيده طويله من الكهل : ولا حاجه ياولاد اهو مرمي قدامكو وبيحكيلكو قصتو

موسيقى الخاتمه : صوت اجش لشخص يحاول تقليد عبد الحليم وقاعد يغني رااااااااااااح راااااااااااح رااااااااااااح

رؤوف باشا

2008-03-25T00:33:00.005+02:00

جو شديد الحراره زحمه ملهاش حل و ميكروباص سيده زينب اصوات متداخله بولاااااق امبابه على سيده على منيب على سب دين من سواق الميكروباص المتمركز على ايدي الشمال يفصل بيني وبينه فتيس الميكروباص الشيك اللي قاعد انا والبيه و عدد من الاشخاص المنتهكين الكرامه بسبب الجري والسحوله ورا الميكروباص

المهم في عز المعمعه دي ظهر ميكروباص سيده تاني وحاول يركب ناس تانيه وبلا اي مقدمات نزل سواق الميكروباص اللي انا قاعد فيه واطرب السواق التانيه بوابل من الشتيمه المتناغمه مع الكثير من الاصوات المتناغمه من توافق عضلي عصبي بين مناخيره وبؤه عشان السواق التاني غلط وركب ناس قبل التاني ما العربيه بتاعته تكمل

المهم في ظل الجو المشحون ظهر شخصيه قام الموقف كله على رجل واحده تبجيلا للاخ المبجل اللي وصل للموقف الجميل ان الشخص ده كان امين شرطه ارجع واقول ماعلينا

ركب الباشا جنبي بقا على يميني الباشا وعلى شمالي السواق وانطلق الميكروباص لرحلة الاهوال اللي هتنتهي بيه في مستشفى الباطنه عشان ابدأ يومي المظفر

في وسط الطريق دفعت الاجره والسواق قالي انها هتغلى تاني او رابع ان صح التعبير وانا قولتله يخرب بيت كده البلد دي عايزه مننا ايه يعني ننيل ايه نولع في نفسنا عشان الحكومه ترتاح المهم في ظل الرغي ده كان الباشا راكب على يميني والسواق قاعد يقرص على ايدي لحسن الباشا يزعل ارجع واقول ماعلينا

عند تمثال نهضة مصر لقيت السواق حط الفلوس في جيبه وطبعا الباشا المتلقح على يميني مدفعش وانا بما اني لساني بيصعب عليها يقعد في التجويف بتاع بؤي رحت قلت للباشا بهدوء ممتزج بوقاحه : هو البيه مش ناوي يدفع؟

راح السواق اللي كان بيبدع من سب دين على اب على ام راح بمنتهى الوداعه قالي خلاص اجرته وصلت

قلتله وصلت امتى ؟؟؟؟ انا مش قاعد وشايف

قالي خلاص بقا

كل ده والباشا ساكت

راح السواق الوديع قالي : خلاص بقا مش هتفرف

اكتشفت ان السواق مش هياخد اي موقف وبقا الحل الوحيد هو اني اقرف الباشا

رحت لافف وش اهلي للباشا وقلتله لو مش معاك فلوس انا ممكن ادفعلك

الباشا : انا معايا ادفع لنفسي ووللميكروباص بتاعك كله

انا(بضحكه متهكمه ) : طيب بلاش الميكروباص ادفع لنفسك بس

الباشا : وانت مالك

السواق الوديع : اطلع منها يا بيه

انا : مش طالع منها ولو مدفعش يبقى رجعلى الاجرة بتاعتي هو مش احسن مني

الباشا : متتلم بدل مبهدلك انت فراد قلوعك ليه ؟

انا : تبهدل مين ؟ انت فاكر نفسك بني ادم ده انت امين شرطه ؟

واحد من الميكروباص وبصوت جهوري واجش جميل : انت اللي بتتكلم معاه ده دكتور يا ابن الوسخه كلمه عدل ده انت امين ابن تييييييييييت ( معلش كانت كلمه صعب اني اذكرها عشان وسعة اوي من الراجل )

هنا الباشا راح شادد شخره اقسم بالله ما سمعتش زيها في حياتي كملها : انت بتشتم مين ؟

الراجل اللي ورا : بشتمك يا ابن الوسخه

صوت صفير قوي جدا ناتج من فرامل الميكروباص انا بفتح الباب وبزق الامين بره العربيه الباب اللي ورا بيتفتح الراجل بينزل الخناقه اتنقلت للشارع انا بزعق انت هتبهدل مين يا بتاع انت؟

الراجل اللي كان ورا : بتاع مين يا دكتور ده تقوله يا ابن الوسخه

الامين مع شخره اقوى من الاولى : انا ابن وسخه طيب والله لاطلع ميتين امك

الراجل : تطلع ميتين مين يا ابن الوسخه

الشارع اتلم علينا عند اخر كوبري الجامعه

الراجل بيطلع موبايله ويجري اتصال بسرعه والامين بيشتم والراجل متوقف تماما عن الرد ثم بهدوء مايطلعش غير من شخص واثق تماما من امكانياته : الو رؤوف بيه معاك يا باشا انا عند اخر كوبري الجامعه وهتأخر عشان في امين شرطه قدامي ابن وسخه مفكر نفسه بني ادم ابعتلي اي حد من عندك يا باشا عشان اعرفه مقامه

المشهد دلوقتي : الشتيمه وقفت الامين ساكت انا مبتسم ابتسامه بلهاء في وش الامين معناها هيطلع ميتينك يا حلو الشخص المدعو رؤوف لسه بيتكلم السواق منتشي كأنه بيقول مدفعتش الاجره وهيطلع ميتينك بخمسه وستين قرش

المهم رؤوف بيقفل الخط وفي مشهد سينمائي جميل الامين بيقول : انا اسف اللي مايعرفك يجهلك بس حضرتك شتمت على طول ومقلتش اي حاجه

رؤوف( باشا بقا) : اديك هتعرفني يا ابن الوسخه

الامين: خلاص ياباشا

رؤوف : خلاص غور في داهيه

المشهد بعد التغيير : الامين مركبش تاني ومشي انا راكب جنبي رؤوف باشا الناس ركبت الميكروباص انطلق السواق بيدندن

انا : شكرا يا استاذ رؤوف

رؤوف : انت من الاصل اتدخلت ليه؟

انا : عادي اصلي مش بحب الاستقطاع بتاع الحكومه يا استاذ رؤوف وسكت بعدين قلتله هو حضرتك وكيل نيابه ؟

رؤوف : اشمعنى وكيل نيابه؟

انا :عشان سن حضرتك صغير

رؤوف بضحكه عاليه جدا : بطل تقولي يا رؤوف وراح مطلع محفظته ومديني كارنيه بصيت فيه لقيت صورته مكتوب جنبها احمد خالد مصطفى بصيتله وعنيه هتخرج راح ضاحك وقالي : اه احمد نايب اطفال في ابو الريش بس بزمتك ما انفعش باشا؟

ضحكت بصوت عالي جدا وشاركني الضحك ونزلت عند مستشفى الباطنه وانا بضحك وهو بيغمزلي

virginity

2008-03-02T20:59:00.003+02:00

اخر احصائيه سمعتها ان في 14مليون شاب وشابه مصريه غير متزوجين . رقم في تخيلي الشخصي مهول عشان الرقم ده من العدد الكلي يبقى نسبه مهوله . المهم اكيد الرقم ده بيمثل حاله اقتصاديه عامه بس على ما اظن ان مش ده السبب الاساسي هو ده نتيجه طبيعيه لفكر عام سائد انا مش فاهمه يعني بمعني ان في مطالب غير محسوبه بيطلبها اهل البنت بمسميات غير معروفه او معروفه وغير مفهومه .طلبات الهدف منها المنظره او المقارنه يعني نظام بنتي مش اقل من اي حد مهي بنت فلان جابولها تلاجه خمسميت قدم وشقه ميت اوضه

انا في رأيي الشخصي المتواضع ان الجواز عباره عن صفقه كبيره تتحمل عقبتها في المستقبل فلو افترضنا فعليا انها صفقه يبقى لازم يبقى فيها مقومات منها رأس المال بس لازم يبقى فيها مقومات كتير اللي هي في الجواز الشخصيه العامه للزوج او الزوجه والتوافق يعني لو كان رأس المال هو الاساس يبقى اي شخص يمتلك مال هيعمل مشروع بالتبعيه ناجح بس ده في العالم الواقعي غير حاصل . المشكله ان النظره الشموليه لاهل البنت تحديدا مش بتبقى بالجوده المفروضه فبيحصل لبس قوي في الاختيار تحت مسمى انهم بيأمنو مستقبل البنت و تظل البنت في حالة انتظار دائم للموافقه من الاهل على صاحب رأس المال وممكن ترفضه لو كان الشخص لايناسبها فكريا ولا في الطبع العام بس بيظل التفكير في المناسبه الفكريه والطبع والصفات موضوع يطلق عليه في مصر ( اهو كله بيجي بالعشره ) فغالبا الاختيار بيبقى مغلوط الا في من رحم ربي . الولد بشكل عام وبصراحه من كتر البلاوي اللي بيشوفها من الكثير والكثير من البنات بيوصل لمرحلة من فقدان الثقه في البنات فبيتجسد ادامه حديث الرسول عليه الصلاة والسلام وهو ( تنكح المرأه لأربع : لمالها، ولحسبها، ولجمالها، ولدينها، فاظفر بذات الدين تربت يداك ) وهنا بيتجه الولد ( العاقل ) للاختيار الانسب وهو تربت يداك فبيبقى المقام الاول عنده انها هتصون بيته مع الاخذ في الاعتبار برده انها تبقى مقبوله المنظر بالنسبه للولد تحت مظلة ان الجمال نسبي ( من رحمة ربنا انه جعل الجمال نسبي في عيون الرجاله ) وهنا غالبا بيكون الاختيار بدري جدا يعني في سن صغير ( ودي المشكله ) وانا اقصد بالسن الصغير 23 او 24 وبيكون اساس الاختيار هو انه يصون نفسه وهنا بيواجه المشكله اللي بدأت بالكلام عنها وهي ان الاختيار في الناحيه التانيه بينسى او بالاصح بيتناسا قول الرسول عليه الصلاة والسلام :( من جاءكم ترضون إيمانه وخلقه فزوجوه،فإن لم تفعلوا تكن فتنة ) وبيتذكرو وبقوه قول البيوت المصريه ( من جاءكم ترضون شهادته و ماله فزوجوه ) وبما ان الرسول عليه الصلاة والسلام مابيقلش حاجه غلط فبشكل طبيعي بتتحقق الفتنه و بيصاب الولد الغلبان بالصدمه وبياخد احد القرارين يا اما يكتئب او ياخد القارا التاني الا وهو ما البنات على قفا من يشيل انا اصاحب وابقى اتجوز لما ربنا يحلها او حتى اصاحب ليه يلعن ابو معرفة البنات مالهم الولاد مهم زي الفل لحد اما اجهز نفسي وادخل كبير وطبعا بشكل عادي ومنطقي لابعد الحدود بتكون النتيجه ان عدد الشباب والشابات اللي مش متجوزين في مصر هو 14 مليون عشان المطالب اكبر من القدره العامه لاي شاب والاختيار يغفل تماما الدين و القدره على تحمل المسؤوليه اللي هي بالعرف الكلمه المنطوقه وغير مفهومه او غير متبعه وهي : احنا بنشتري راجل

انا لا اقصد والله بكلامي ان المشكله في البنات بس لكن فعليا المشكله الاكبر عند البنات او اهل البنات بمعنى اوضح وهذا لا ينفي ان في ولاد مافيش في دماغهم اي حاجه زي ما في بنات وكتير بردو يمتلكو عقليه ناضجه ومحترمه بس المشكله ان مشروع الجواز مكون من اربع اطراف عيلتين وفردين واصعب شي في العالم هو التوفيق بين اربع اطراف بيحاول كل منهم ربح معركه غير موجوده من الاصل ويمكن ان تكون اتفاقيه لكن للاسف الفكر العام بيحولها لمعركه

ربح الدنيا والاخره

2008-02-11T05:09:00.000+02:00

انا بتفرج على كوه من سنة 1993 يعني من وانا عندي 8 سنين عمري ما كنت من النوع الي ممكن يجري ورا لاعب او يغرم بشخصيته ويتمنى يبقى ليه صاحب او صديق من هذا النوع انا افتكر اني كنت في وسط اصحابي وهما كل واحد بيشبه نفسه بروماريو وبيبيتو وواحد طول شعره وادعى انه كده بقى شبه روبيرتو بادجيو ومع ذلك مكنتش بيجذب انتباهي كده كنت بس ببقى مبسوط اني فاهم في الكوره

النهارده ولأول مره احس اني معجب بشخصية لاعب بطريقه ملهاش حل لاعب ماشاء الله خرج من اطار الكوره بقى عباره عن رمز بفتكر دايما كلمه لوالدتي وهي بتقول لما ربنا بيحب حد بيرمي حبه في قلوب الناس

الشخص ده يبقى محمد محمد محمد ابوتريكه

شخصيه اقرب الى التابعيين والصحابه رمز محترم للانسان المسلم يكفي ان النهارده اتصلو بيه بعد الماتش وبيقولولو مبسوط يا ابو تريكه

رد رد مايردوش غير واحد الدنيا اخر همه قال : ادخال السعاده على قلوب الاخرين شيء نؤجر عليه عشان كده انا مبسوط

بعدها بثانيه سأله هادي خشبه انت ايه اول خاطره جت قدامك اول ما جبت الجون

قال بمنتهى التلقائيه : شفت قدامي منظر جبل عرفه

شخص خلاص بجد تذوق حلاوة الايمان خرج من اطار الكوره دخل بجد في عالم تاني عالم روحاني غير اللي احنا عايشين فيه

افتكرله بعض المواقف :

في ماتش كان بين اصدقاء رونالدو واصدقاء زين الدين زيدان بعد ما اتلعب الماتش عملو حفله واكتشف ان فيها خمره فرفض النزول من مكان السكن الا في معاد الطياره

موقفه لما قلع التي شيرت وكان تحت التي شيرت مكتوب تعاطفا مع غزه

في النهائي من سنتين رفع التي شيرت وكان تحته نحن فداك يا رسول الله

بعد فوز الاهلي على الصفاقسي جاله هدايه من ضمنها 6 مليون جنيه شك في مصدرهم فاتبرع بيهم كلهم

في ماتش الاهلى والاسماعيلي اغمى عليه عشان اداره النادي رفضت انه يحج في السنه دي

في احلى لحظاته وهو بيجيب جون بينزل يسجد لحد لما غانا في اخر ماتش بعد هدفهم الاول الفرقه كلها نزلت تسجد بدون وعي هو ايه معنى الحركه

ماشاء الله على هذا الشخص بجد مثل يحتذى بيه في السيطره على النفس ورفض شهوات الحياه

اعتقد ان محمد محمد محمد ابو تريكه عينه جديده من الناس وجدت في الشعب المصري عشان تغير جواه وتعلمه ان الدين هو اقصر وافضل سبيل للدنيا والاخره

ملحوظه صغيره :

حاولت احط الصوره بتاعته وهو لابس تي شيرت تعاطفا مع غزه او نحن فداك يا رسول الله بس سبحان الله الصوره اختفت تماما من جوجل واكيد لهذا معنى

هو بس يدعي

2008-01-27T00:35:00.000+02:00

بحاول اتوخى الادب بس مش قادر انا هحكي الموقف بعدين هبدأ اقل ادبي

في البرنامج بتاع تحليل المبارايات بتاع شوبير على القناه التانيه وبين الشوطين راح شوبير قال استنو بعد المباراه هقول مفاجئه طبعا انا بهبل اهلي كنت مستني المفاجأه وبعد الماتش راح قايل المفاجأه

وكانت

ان الريس اتصل بالمنتخب المصري بين الشوطين وبعد المباراه

انا كنت هنهار من السعاده وهول الصدمه

المهم بعدها بشويه راح قايل التعليق الخالد اللي هيظل مدى الدهر اعتقد وكان ان احنا كسبنا بدعاء المصريين ثم سكت وراح مكمل وقال وكسبنا طبعا بدعاء سيادة الرئيس

اصل ولا مؤاخذه الشعب ده ابن كلب دعائه مش مستجاب بس الريس حاجه كبيره اوي كده وماشاء الله دعائه كده طريقه سالك لربنا مستجاب

ابدأ بقا اقل ادبي

اللي عمله شوبير ده اسمه تقرين وليها لفظ ابيح مش عايز اقوله عشان ميصحش

بجد الراجل فقعلي مرارتي في التعليق الاول ومش هكمل ايه اللي حصل في التعليق التاني عشان برده ميصحش

فاصل للدهشه

2008-01-09T17:24:00.000+02:00

الموت.....

كان فيما مضى سيدا مهذبا...

كان اكثر رحمه و تعقل لا يأخد الا العجائز والمرضى ومن لا نعرفهم لا يأتي الا ليلا يتسلل دون ازعاج يسحب الروح من صاحبها اثناء نومه ولم يكن ليهين احدا ابدا حتى لو اخطأفي موعده او الشخص المناسب كان يترك مبررا يجعلنا نتفهمه ونتقبله بعد ساعه غضب واحده

الان

تخلى الموت عن ادبه صار يصادفنا في الشوراع بأي وقت يتعمد اهانتنا حتى انه تنازل عن كبريائه , اعتداده بنفسه سمح لنا ان نستخدمه ضد بعضنا البعض في صور قبيحه ... مثل ... تجويع ... تعذيب ... قهر

صار الموت يتعند ان يأخذ من نعرفهم تحديدا

يأتي في موعد غير مناسب لشخص غير مناسب بطريقه غير مناسبه لا يترك لنا اي مبرر لنتقبله

ببساطه صار الموت الطيب انسان شرير

________________

تخيل نفسك جنديا مهزوما تجلس وحيدا في قعر حفره ضيقه مظلمه باخر الدنيا اصابعك متجمده على بندقيتك البارده, نفذ طعامك وماؤك منذ ايام , رائحه جثث زملائك المتعفنين تعبىء انفك وفمك

هل يبقى لك شيء في العالم ؟؟؟؟؟

يبقى لك شيء؟؟؟؟

ستسأل نفسك اين الرب ؟؟؟

ربما تقول ليس تمة رب موجود

تقول ذلك لمره ... مرتين ... ساعه ... ساعتين ... ثم تبكي... تبكي... تبكي معتذرا

لأنك وحيد ... ضعيف ... ناقص

ستعرف انك محتاج للرب... وجود هذا الرب

لم يبق منك ولك في العالم غير الايمان

في اللحظه التي تفقد فيها ايمانك ستتأكد في قلبك وضميرك انك محتاج لهذا الايمان... انه لابد من وجود رب لك ولهذا العالم... ستحتاج لمن ينقذك قبل سقوطك في اخر العالم هل تتوقع لنفسك غير الرب؟؟

الخوف هو دليل وجود الرب... لان احساس الانسان المزمن بالنقص والضعف والاحتياج يؤكد وجود هذا الوجود

انت تحتاج لمن يمتلك قوة الكمال وكمال القوه

سترتعب من احساس الخوف , المرض, الوحده , الفقر, القهر , الموت , الالم , وغيرها وحوش اخرى تحتاج من يتخطى بك كل هذا ... كل هذا ليسس له سبيل سوى الرب

الله ليس لك سواه

انت بضعفك واحتياجك وخوفك ستبحث لك عن اله ... لابد ان يكون لك اله

المسأله تتلخص فيما تختاره اله لك

ان تختار اله يليق بك كأنسان ليده عقل وتمييز

ايمانك بوجود الله هو فقط القادر ان يخرجك من حفرتك المظلمه الضيقه يحفظ وجودك و يحمي روحك من التمزق

ان لم تدرك الرب داخلك

ان لم تر الله بنفسك ... فلن تراه ابدا

انظر لنفسك بسكينه ومحبه و طمأنينه سترى الله

________________

هل عشت يوما تللك اللحظه التي تحس فيها انك ترى العالم من مكان بجوار الرب ؟؟

اللحظه التي تفاجئك فلا تعرف متى تزورك, وتشكر الرب لأنه يمنحها لك ويختارك لها, فأنت تعرف انها حتما لا تمنح لكثيرين , لحظه هي رغم بؤس العالم فانها تأتيك كنسمه تعرف طريقها بين اشجار ووحوش الغابه , تصلك لتهبط على قلبك بسلام ... سلام وطمأنينه كاملين تامين

تضع في كفك قطره من الشجن الشفيف و السعاده النبيله

لحظه لن تصلها بألف صلاه

يختارك الرب لها

ويعدل شيئا في قلبك لتراه... تراه بوضوح ,يمد يده الحنون يثبت العالم امام عينيك قليلا قليلا , ويقول لك بابتسامه طيبه : تأمل ... تأمل

فتسقط من كتفيك كل العالم

كل ثقل العالم

يصير كل شيء من الخفه كأنه بلا وزن, ترتاح قليلا من الاسئله

يتحول العالم الى سجاده ماء تمشي عليها حتى تصل نبع التور , تدرك عمق وسهولة العالم , كأن يمنحك نفسه ويكشف لك روحه ,كأنك اول انسان يضعه الله على الارض بعدما فرغ حالا من ابداع السماوات والارضين والماء

تحس انك نقى بلا دنس

تتصالح مع روحك , تتسامح مع العالم والموجودات , ترى العالم رغم قسوته وبؤسه محتملا , ومكانا صالحا للحياة ... لانك تستحقهما معا العالم والحياة

انت تريد ان تبقى هنا في تلك اللحظه , لكنك تعرف انها ستغادرك بعد قليل , فتترك نفسك لها لتفعل بك ما تفعله الملائكه بأرواح الطيبين

تحس بيد الرب تربت قلبك بسماح , فتعرف كم هو يحبك

تعرف كم يحبك الله

فتبتسم له ... لله ... وتؤمن ... تؤمن ... تؤمن ... وترتاح

________________

الاجزاء اللي فاتت كلها للكاتب محمد عبد الرحمن الفخراني من كتاب فاصل للدهشه مقدرتش اقاوم نفسي من اني اكتبها هنا عشان استوقفتني بشده

طالب طب

2008-01-01T04:10:00.000+02:00

هتعمل ايه في رأس السنه؟
هذاكر باطنه

كلام في الصميم

2007-12-12T02:00:00.000+02:00

When a GIRL is quiet ... millions of things are running in her mind। When a GIRL is not arguing ... she is thinking deeply. When a GIRL looks at u with eyes full of questions ... she is wondering how long you will be around. When a GIRL answers " I'm fine " after a few seconds ... she is not at all fine.When a GIRL stares at you ... she is wondering why you are lying. When a GIRL lays on your chest ... she is wishing for you to be hers forever. When a GIRL wants to see you everyday... she wants to be pampered. When a GIRL says " I love you " ... she means it. When a GIRL says " I miss you " ... no one in this world can miss you more than that.Life only comes around once make sure u spend it with the right person .... Find a guy ... who calls you beautiful instead of hot. who calls you back when you hang up on him. who will stay awake just to watch you sleep. Wait for the guy who ... kisses your forehead. Who wants to show you off to the world when you are in your sweats. Who holds your hand in front of his friends. Who is constantly reminding you of how much he cares about you and how lucky he is to have you. Who turns to his friends and says, " That's her!!

حاجات ملهاش دعوه ببعض

2007-11-21T01:09:00.000+02:00

اولا

اللهم قوي ايمانه قبل اي حاجه عشان الراجل ده بيتعبد وسايب وراه سبعين مليون مواطن بيسبو الدين قصدي بيسبو ميت مله ودين عشان خير اللهم اجعله خير هيرفعو الدعم عن العيش او مثلا يعني بقول مثلا كيلو الزيت او لتر الزيت بالاصح غلوه حوالي الضعف ده غير الفول اللي غلي حوالي جنيه ونص يعني الطبقه الكادحه اللي طالع عين ابوها اللي كانت بتعيش على البطاطس المقليه والفول وطماميتين ده لو كانو عايزين يرفهو نفسهم مش هتلاقي اصلا تاكل عشان اتسدت كل الطرق قدامهم لا اكل ولا شرب بس شعب مسالم حاطط جزمه في بؤه وساكت اموت واعرف خايف على ايه ؟

بس عادي المهم هو يروح يحج ويعمل عمره ويغسل وشه الكريم بمية زمزم

ثانيا

ماما او امي ست فعليا رائعه انا متأكد انها مش بتفتح المدونه عشان محدش يقول اني بكتب كده عشان تزود المصروف ولا حاجه المهم يعني الست دي اصبحت - ماشاء الله - تمتلك امراض الدنيا كلها يعني على سبيل الذكر لا الحصر عندها سكر وضغط وذبحه ونقرص و انزلاق عضروفي كذا فقره بس نقول ايه نقول الحمد لله المهم ماما دي اعظم سيده عرفتها في حياتي مع كل اللي عندها رافضه تنهار اصبحت زي العمود المشروخ بس متبيض كويس اوي عارف كويس ان العمدان اللي حواليه مشروخه فمش عايز يبين الست دي هي الشخص الوحيد اللي مانعني من الانهيار ربنا يخليها ويحفظها عشان افراد البيت كلهم محتاجين ترميم او محتاج ستر ربنا وميحصلش اي زلزال

ثالثا

الجزء ده حدوته تانيه قصه بجد غريبه

يحكي انه في القصر العيني اللي وفي قسم النسا اللي بيشتغل فيه اصحابي دخل راجل هو و مراته بيشتكو من انهم مش بيخلفو ومتجوزين بقالهم اكتر منه سنه ومن

قريه والله مش فاكر اسمها

المهم الدكاتره فحصت وكانت الطامه الكبرى الست لسه عذراء

سألوالراجل ياعم العلاقه مابينكو كويسه يعني في علاقه

الراجل اتعصب وقال طبعا انا راجل

الدكتور رد عليه ياعم دي لسه عذراء

وهنا كانت الطامه اللي بجد الراجل بقاله سنه و اكتر بيلاقي زوجته في دبرها ولما سألوه كانت اجابته مفجعه انه اتعلم كده من البهايم اللي بيربيهم هو بيشوف البهايم بتعمل كده وهي كمان بتشوف كده

الشاهد ان لسه في قرى في مصر تعاني من عذريه كامله في الفكر لسه بياخدو معلومتهم من البهايم والحيوانات

افرحي يا ماما سوزان

رابعا

الاهلي ونكسته اللي حرقت دم اهلى اثبتتلي ان الناس في مصرينقسمو الى ثلاث اقسام

مصريين

زملكاويه

اسمعلاويه

وحسبي الله ونعم الوكيل فيك يا عرجون

خامسا

حكمة البوست

تنهار جميع القيم امام الماده والمصالح

سادسا

بمناسبه المصروف اللي كنت ذكرته من شويه ماشاء الله برده وانا شحط عندي تلاته وعشرين سنه ولسه باخد المصروف

ربنا يخليكي يا كلية الطب

سابعا

موقف نبيل

الموقف ده بجد حصلي ورجعلي احساس ان ( الخير في وفي امتى الي يوم الدين)

يحكي انه عندنا ارض في العاشر كنا بنبعها عشان نشتري شقه عشان عايز اتجوز

وعشان تتباع بسرعه امي قالت للمشتري ان عليها ديون ولازم يخلص ويدفع بسرعه المهم الراجل اتفق وقالنا خلاص الارض بتاعتي وعلى اساس ذلك ارتبطنا بكلمه ومشينا اي شاري اخر

المهم الراجل جالي البيت عشان يدفع الفلوس وفوجئت انه بيعتذر عشان مراته مش موافقه على الارض ولا على السعر ( رجالة بلدنا) المهم الراجل قال انه اسف ومش هيشتري بس عمل احسن موقف شفته من ساعة ماجيت البلد دي ( انا بقالي في مصر تسع سنين بس كنت عايش في السعوديه بس انا مصري (للاسف) ) الراجل طلع خمسه واربعين الف وقال سدو ديونكو بعدين ردوهم بعد بيع الارض ومش عايز ورق يثبت حقه المهم انا رفضت واديته الفلوس المهم الراجل قام واكتشفت انه مخبي الفلوي على الكنبه عشان مشفهواش اللي بعد ماينزل بس الحمد لله شفتها ورجعتهاله بجد

الخير في وفي امتى الى يوم الدين

كفايه كده

سعد سعد يحيا سعد

2007-11-03T21:27:00.000+02:00

يوم الخميس اللي فات اكتشفت ان الواحد كبر اوي عدى مرحله الشباب الطايش وخلاص بقا كبر اوي

من اول ما دخلت الكليه وبقا المكان الرسمي لخروجات الشله بتاعتنا هو قهاوي مصر المحروسه بس بقوانينا الخاصه يعني الصايع اللي فينا بيشرب شاي ويحس انه كده سكر اتذكر مره نزل ماعانا واحد صاحبي بيشرب شيشا بس كالعاده فرفور زي حالتنا فلما دخل علينا الجارسون سأله بمنتهى الادب عندك شيشه ؟

الجرسون: ايوه

صاحبي: طيب ممكن واحد؟

الجرسون : نظره حقيره بمعني انتو ايه اللي بينزلكو اصلا من بيوتكو بعدين راح قايل طيب هجيبلك

المهم بدأنا نلعب كل فنون الالعاب المسموح بيها دوليا في القهاوي يعني بدأنا بالاستيماشن واستمرينا فيه حوالي سنتين متواصلين كل يوم لحد لما احترفناه انا اعتقد ان مصطفى رفعت صاحبي ممكن يدخل في بطوله استيماشن عالميه ويكسبها عشان يحمل جواه كل الوان الحقد الدفين في اللعبه دي اللي تسمحله انه يحطلك سم في العصير على القهوه عشان تموت ويطلع هو الكينج

ثم حسينا ان الاستيماشن دي لعبة الاطفال فبدأنا نلعب شطرنج وماشاء الله بقينا نقعد على القهوه كل واحد بيلعب مع اللي قدامه شطرنج ويسود صمت غريب مابينا ده طبعا غير ان محمد على بيحتاج لحوالي من ربع لنص ساعه عشان يحرك قطعه والمصيبه انه في الاخر بيتغلب

وكانت برده مرحله

ثم مررنا بمرحله قصيره اوي وهي مرحله الدومينو ودي مطولتش

ثم وصلنا الحمد لله للمرحله الطبيعيه والتطور الطبيعي وهي الطاوله بقالنا فتره بنلعبها لحد لما الخميس اللي فات رحنا على قهوه عند كوبري عباس وقعدنا بس لازم اوصف الجو العام للقهوه وهو كان كالتالي

قهوه نضيفه جدا وده مش هزار , اصغر واحد على القهوه عمره خمسين سنه , يمارس كل زوج من الشباب فيهم الطاوله , يحيط بالقهوه صوت من الموسقا التصوريه الرائعه وهي طااااخ دوش طااااااخ جهار الشيش ثم الاروع هو اغنية الحب كده لام كلثوم

المهم قعدنا كالعاده الجديدة طلبنا طاوله بدأنا نلعب والصمت يخيم على المكان وام كلثوم بتغرد في النص مابيدرش مابينا غير شويه شتيمه من ان كل واحد استغبا انه لعب الاواشيط بتاعته في مكان غلط ( الاشاط : ده لفظ يطلق على الكائنات المسطحه بتاعت الطاوله ) ثم الاصوات تختفى وام كلثوم صوتها يعلى كمان وقطع الصمت احساسنا بأن كده غلط احنا معندناش ستين سنه لازم نتمرد على كده وواحد من اصحابي قال بخنقه تعالو نقوم راح التاني رد عليه قاله لا لسه بعد خطاب جمال عبد الناصر وانا حسيت انه مينفعش نقوم قبل ما العساكر الانجليز يدخلو وتقوم المظاهره بجد الخميس اللي فات حسسني ان الواحد كبر اوي وفقد حتى طيش وعبط الشباب بس على العموم عادي

المصيبه المرحله الجايه هتبقى الشيشه والفراااااااااااغ و سعد سعد يحيا سعد

اه يا مراراتي

2007-10-05T18:46:00.000+02:00

النهارده في مترو الانفاق دار حوار بيني وبين البياع بتاع شباك التذاكر عن ان التذكره هتغلى وهتبقى بجنيه وربع ..... طبعا بياع التذاكر كان مخنوق ومفقوع عشان الغلو ده هينزل على دماغ اللي خلفوه عشان الناس هتروقه بكل ربع جنيه هيدفعوه زياده

نيجي بقا للمهم عشان انا دمي اتحرق من ام البلد دي ...... على ما اعتقد ان مشروع المترو اللي عمله ابو علاء ده مشروع مش استثماري يعني اتعمل عشان الشعب اللي طالع لامؤاخذه ميتين اهله فى المواصلات

طيب في الجرنان بتاع المغفور له سمير رجب لما كان كعادته الشريفه بيمجد في ابوعلاء على انه مأكلنه ومشربنا وبيدخلنا الحمام وبيرضعنا اذا لزم الامر قال ان المترو بيركبه كل يوم تلاته مليون محروق مصري ده اللي قاله وبعد الكلام ده فضل يكمل بقا في موال اخترناك اخترناك والليله دي طيب يعني لما كانت التذكره بنص جنيه كان بيدخل للمترو مليون ونص يوميا فهل يا ترى ده ما يغطيش مصاريفه اليوميه

نيجي لما التذكره بقت بخمسه وسبعين قرش والناس ثارت راحو مخيلنها بجنيه وراحو قايلين الغلو ده عشان مفيش فكه قادرين يوفروها للمواطنين - اه يا مرارتي يا اما - يعني خير اللهم اجعله خير المترو بقا بيدخل تلاته مليون جنيه يوميا ساعتها قلنا البلد هتشبع بقا بس على مين ابوعلاء والحج نظيف باعو ام المترو يعني بقا المترو بقا خير اللهم اجعله خير بقا برتقاني ومكتوب عليه اتكلم من القلب ولا اتكلم من اي حته المهم تتكلم من موبينيل ويوم الاقيه احمر وفودافون منوره يوم تنج ويوم كاتشب وافلام ولو قناه اباحيه دفعت كويس هيعملولها اعلانات في المترو و بعدين دخلو تليفزيونات في المترو واعلانات من اللي قلبك يحبها وايه بقا اخر صهلله خليهم يتبسطو ده طبعا غير واقعه الفيلم اللامؤاخذه اباحي اللي عرضوه في شاشات عرض المترو عشان يمتعو الشعب بالجنيه اللي دفعينه - دي قصه بجد والله - واهي ماشيه

نيجي للخيبه التقيله الانسات او المدامات اللي بتعدي في المترو ونوزع ورق مكتوب فيه انا كذا كذا ومخلفه عشرين عيل وكلام من اللي يقطع القلب ده ويقوم كل واحد كاعع اللي فيه النصيب يعني تطلعلها من العربيه بحوالي تلاتين جنيه يعني في اليوم بحوالي تلات او اربع تلاف جنيه واهي ماشيه والله لا يحضرني الا حكمه بتقول : اللي متسجنش في ايام عبد الناصر مش هيتسجن ابدا واللي ماتغناش في ايام السادات مش هيغتني ابدا واللي مشحتش في ايام مبارك مش هيشحت ابدا

تحديث

اما الخازوق يا سكينه يكونو ناويين يخصخصو المترو

مش قادر

2007-09-29T04:51:00.000+02:00

اعتقد اني بجد النهارده لازم اعترف ان كل عضله فى جسمي وجعاني و كل خليه في مخي توقفت تماما عن العمل فاقد للتركيز لأبعد الحدود ومحتاج جدا لفتره من الراحه من كل شيء في الدنيا انا بحسد كل الاطفال لأنهم فعلا بلا مسؤوليه

يوم عن التاني بحس اني في النازل عضليا وعصبيا يعني اذكر بعض المواقف

كنت في ابو رجيله وبدأنا نوزع شنط رمضان على المحتاجين كل مره كنت على الاقل بشيل خمس شنط المره دي شلت اربعه و كنت حاسس ان عضلاتي هتخرج من مكانها وكنت كل شويه انزلهم على الارض عشان اريح ايدي لدرجة ان بنت عرضت عليه تشيل مكاني واتحججت ان الشنط ايدها مقطوعه فمش عارف اشيلها مع اني والله مكنت قادر استحمل بس احساسي بأن شكلي هيبقى وحش منعني من الاعتراف

موقف اخر : في نفس يوم ابورجيله كبطل الافلام الاسطوريه هركليز قررت ان الجروب بتاعي يبقى فيه البنات عشان اخد بالي منهم ومحدش يتعرضلهم بنص كلمه بس اقسم بالله كنت فعليا مرعوب عشان حاسس ان لو واحد كلمهم وحاولت لمجرد المحاوله اني ارده عن هبله هيعجني في بعضى ومش هقدر حتى اقوله ربنا يسامحك . اول مره احس بأحساس ان البنات معايا فعلا مش في امان واحس اني فعلا واقف على رجليه بالعافيه

موقف اخر : من كام يوم دخلت البيت متأخر راجع من المستشفى اللي بقيت اقضي فيها ما يقارب من نص يومي بسبب ان احد افراد عيلتي قاعد فيها المهم اول ما وصلت قلعت التي شيرت وعملت شوية هبل واحتجت انزل تاني وبمنتهى الهدوء لبست الجزمه ونزلت وانا في وسط شارع الهرم الرئيسى اكتشفت اني في الشارع بالفانله الداخليه وبمنتهى الهدوء رجعت ماشي عشان حسيت ان مش لازم اجري في الشارع بالمنظر ده بدل ما العيال تجري ورايا كأي عبيط في الافلام

انا حاسس ان البوست نفسه هو مجموعه من الكلام الغير متناسق والغير موزون بس مش زعلان عشان انا حاسس ان ده احسن ما يمكن في الوقت الراهن وانا فعلا محتاج اكتب البوست ده ومحتاج ارتاح

اتذكر كلمه لاحد الاصدقاء كان كتبها قبل كده في احد البوستات : اسوء شيء ان يخذلك جسدك وانا احب اضيف عليها ان جسمك يخذلك وانت بجد محتاجله اوي

على العموم انا بصبر نفسي ان دي مرحله وهتعدي بس يارب تعدي وانا لسه ممكن ارجع تاني عشان حاسس ان نقطة اللا عوده قربت اوي

تحديث

يلعن ابو خلفت البنات

يلعن ابو البلد دي

يلعن ابو غسيل المواعين

يلعن ابو سواقين التاكسي

يلعن ابو الباطنه على ابو الدروس

يلعن ابو ابو رجيله على ابو التبين

يارب خدني بقا عشان ارتاح وممكن تباركولي يا جماعه انا وصلت لمرحلة اللا عوده

الحلوه اتكلمت

2007-08-04T01:14:00.000+02:00

و اخيرا ظهر ديوان محمود باشا عزت في الاسواق

بعيدا عن المجامله والله ديوان رائع ماشاء الله عليه بس يا رب محمود عزت لما يوصل الى العالميه ماينساناش

غطوني وصوتو

2007-08-01T15:04:00.000+02:00

البيه ابن خالتي كان عندي امبارح وبطيبة قلبه فتح موضوع انه عايز يتجوز وبمنتهى البساطه قال تعالو نحسبها كده الواحد لو عايز يتجوز لازم يبقى معاه قد ايه , المهم قعدنا نحسبها احنا الاتنين واتصدمنا صدمه خلتني في اخر كلامه اطرده بره الشقه قبل ما اقتله ( طردته هزار طبعا) , المهم احب اقول قائمه الطلبات بنظره متفائله يعني بجيب الحد الادنى

ميت الف جنيه شقه

عشر الاف جنيه شبكه

خمسه وعشرين الف جنيه عفش

خمستاشر الف جنيه تجهيز الشقه

عشر الاف جنيه ادوات كهربائيه

عشر الاف جنيه فرح

المجموع النهائي ميه وسبعين الف جنيه

الحسابات اللي انا قلتها دي على فرضيات قليله جدا بمعني اني حسبت ان العروسه بردو هتجيب حاجات يعني اكيد مش خمسه وعشرين الف هما اللي هيجيبو العفش انا بس حبيت اكون متفائل

وفي الاخر يقولو البنات بتعنس مهو لازم يعنسو هيجيبو شاب معاه ميه وسبعين الف جنيه منين يعني؟

2007-07-23T01:02:00.000+02:00

من شويه كنت بتفرج على فيلم مش عارف اسمه بتاع نور الشريف وعلى الحجار وخير اللهم اجعله خير راح نور الشريف قال جمله جامده موووووووت كان شغال تاجر عمله وراح قايل لعلى الحجار : تصدق ممكن الحكومه تعوم الجنيه وساعتها ممكن الدولار يبقى بتلاته جنيه

التعليق الوحيد اللي اقدر اقوله هو تعليق احد الاصدقاء لما حاجه ما تعجبوش وهو : اردحي يا انشراح

فصبر جميل

2007-07-05T17:06:00.000+02:00

الف مليون مبروووووووووووووووووووووووووووك يا وائل

انجلترا بتستهبل يا فوزية

2007-06-27T14:35:00.000+02:00

لم اعد اعلم جيدا على اصجنا في الفتره الاخيره مرضى بعقدة الاضطهاد ام انننا بالفعل مضطهدون؟

لا اعلم الكثير عن هذا المدعو بسلمان رشيدي ولكن هل بالفعل يستحق هذا الشخص ان تكرمه ملكة بريطانيا وتمنحه لقب فارس؟ ام ان التكريم له اصول تعود لكتابه الذي للاسف قرأت البعض منه لا اريد الخوض كثيرا فيما كتبه ولكن يكفى ان اذكر انه قام بتوجيه سب علني ومصرح بدون اي تغطيه لرسول الله صلى الله عليه وسلم وزوجاته

علامات استفهام ضخمه وكثيره

من الذي اهدر دمه ؟ اليست ايران ؟ الم يتربى هذا الشخص في البلاط الايراني؟

هل من المنطق ان نهدر دمه؟

هل ما فعله مفتعل؟ ام انه للشهره؟

هل اصبحنا بلا كرامه؟

هل كان تكريمه صفعه قويه من توني بلير للاسلام؟

لم لم يتحرك اي شاب عربي بمظاهرات ضد ماحدث؟ لم تتحرك سوا ماليزيا وبعض البلاد الاخرى

لم لم يحدث اي رد فعل من اي رئيس عربي ضد ما حدث؟

هل ما حدث هو هفوه من كاتب احمق؟ ام انه مدروس وله هدف؟

هل هذا الاحمق بالفعل كاتب يستحق اوسمه على ما كتبه من قبل؟ ام ان الوسام على هذا الكتاب؟

هل الجائزه جائزه ادبيه؟ ام انها اكليل زهور منمق على الكرامه الاسلاميه؟

هل انا مريض بالاضطهاد؟ ام فعلا انا مضطهد؟

هل كلما تفننت في سب الدين الاسلامي تصبح بطلا وتستحق التكريم؟

احمل في رأسي الكثير والكثير من علامات الاستفهام ولكن بشكل عام وبعيدا عن ان كانت الجائزه صفعه ام تكريم ادبي فا انا لا افهم هل ولاد حارتنا كانت جيده ادبيا بالرغم من اني قرأت الكثير منها ولم اجد بها الابداع الرهيب الذي يؤهلها الي نوبل هل كتاب سلمان رشيدي مبدع لترشيحه للقب فارس؟ام ان نفس الملابسات جمعت بين ولاد حارتنا و كتاب سلمان رشدي؟

اتذكر كلمه لاحد الصحفيين العراقين حيث قال: لعبه السياسه لعبه قذره تماما عندما تجد الاجابات عن الاسئله تعلم انه تم خداعك لان الاسئله لا تحمل الاجابه بل تحمل طابع خاص ثم سكت قليلا واستطرد قائلا : انا للاسف لا اعرف الاسئله ولا اعرف الطابع الخاص

تاااااااااااااااااااج

2007-06-25T23:29:00.000+02:00

التاجات دي عذاب بجد طريقه جميله ومقنعه لتعذيب الاخرين ممكن يكون التاج بيبينلك حاجات مكنتش عايز تعرفها عن نفسك وممكن كمان اسئله بتحس انك مش عايز تجاوبها.

من الاخر اشكر الورده البيضا ( باتريشيا ) على انها عاقبتني بالتاج ده

نبدأ نحل التاح يا هادي يارب

انت مين ؟؟

مين زوزو؟ انا وائل احمد بني ادم عادي

مين اكتر ست اشخاص بتحبهم ؟؟؟

مش عارف ايه الحكمه انهم يبقو سته

بس هما ماما واختى الصغيره والكبيره وحسني مبارك وفتحي سرور و حبيب العادلي

هل انت سعيد ؟؟

لا انا وائل

لو اجتمعت مع حسنى مبارك فى مكان واحد هتعمل ايه ؟

هعمل ايه يعني هبوسه واعيط واقوله ربنا يطولنا في عمرك

لو معايا مليون و نص اعمل ايه ؟؟؟

مش عارف اول حاجه اطلع عمره وحج انا وماما

اشتري شقه وعربيه واجهز الشقه

والعب قمار بالباقي

بتحب مصر ؟؟

يانهار اسود هو الموضوع اتعرف؟

انت مسلم ؟؟

الحمد لله

ليه ؟؟

في الاول عشان بابا وماما مسلمين دلوقتي عشان مقتنع تماما ان دي الحاجه الصح الاكيده في حياتي

مين اكتر شخصية متقدرش تستغنى عنها ؟؟؟

فاطمه بنت البواب عشان بتجيب العيش الصبح

ايه اكتر موقف محرج ؟؟

ليه بنت خالتي اسمها نجلاء اتصلت بيها مره الساعه واحده وشويه باليل وبعدين رد عليه راجل قلتله بمنتها الادب ممكن اكلم نجلاء؟ بمنتهى الزوء سكعني شتيمتين حلوين وقفل في وشي السكه

ثم اكتشفت ان نجلاء اللي انا اتصلت بيها دي هي زميلتي وغالبا اخوها او ابوها ايا كان مين اللي رد عليا بهدلها بهدله ما بعدها بهدله وانا بجد لحد النهارده لما بشوفها ببقى نفسي اموت نفسي

الامنية اللى اتمنا تحقيقها ؟؟

نفسي اتجوز وانا صغير عشان اخلف ولادي وانا صغير وابقا صاحبهم اوي

او اشتغل رقاصه

التاج باه يتمرر لمين ؟؟؟؟

بمرره ل بني ادم و ساره الدشناوي و محمود عزت واللي مش عايزيجاوبه بجد براحته ومعلش على الاجابات الغريبه اللي قلتها بس كده احسن

جزاء كل خاين

2007-05-28T00:01:00.000+02:00

معلش بقا كنت بذاكر نسا ودماغي ضربت

وحشتنا يا تامر يا حسني

2007-05-13T23:35:00.000+02:00

زمان لما كنت لسه عيل في ابتدائي كان لما يجي مشهد في فيلم عربي محترم البطل بيبوس البطله او اي شيء من هذا القبيل كان بابا وماما يودو وشهم الناحيه التانيه وانا اعمل فيها عبيط وابص ومليش دعوة بحاجه وساعتها اسمعلي كلمتين في اجنابي من ان ده حرام وكلام كبير من ده

المهم , كبرت واتعودت لما يبقى في مشهد من المشاهد دي اودي وشي الناحية التانيه بدل ما حد من العائله الكريمه يودهولي بقلم على خلقتي وكمان عشان انا عارف ان ده حرام

مرت سنين كتير لحد ما من كام يوم اكتشفت ان بابا وماما طلعو بيضحكو عليه والمشاهد دي عاديه و عادي اني اشوفها

طبعا السؤال هيبقا انا على اي اساس عرفت ان ده عادي ؟

الاجابه بكل بساطه لما شفت الفيديو كليب الاخراني بتاع تامر حسني- رضي الله عنه وارضاه واسكنه فسيح جناته - الكليب ده متصور من كواليس فيلمه الاخراني اللي اسمه عمر وسلمى

قد ايه اتبسط من الجوي الاخوي الجميل والبسيط في الكواليس وتامر عمال يبوس كل اخواته الفنانات المحترمات زي ميس حمدان ومي عز الدين . لا كمان الاجمل ان الجوي الاخوي بيمتد حتى للكومبارس واصحاب الادوار الثانويه لقيتهم بردو بيبوسو مي عز الدين وميس حمدان ماشاء الله عليهم ده كمان كان الكومبارس الغلابه عاملين دايره وميس ومي بيرقصو فيها. اكتشفت ان في الكواليس مفيش فرق بين الابطال واصحاب الادوار الثانويه شيء جميل وتواضع فظيع ده حتى في مشهد جميل وبريء وتامر حسني - مع الاعتذار لرفع الالقاب - وهو بيهزر مع مي عز الدين وكان هيضربها على مؤخرتها بجد شيء بديع وجميل وبساطه واخوه لازم تبقى موجوده في كل بيت مصري

هنا كنت لازم اسأل نفسي سؤال ازاي وصلو للجمال ده ؟

لقيت الاجابه كانت سهله اوي بس كانت غايبه عن ذهني الاجابه كانت لازم يبقى في قائد محترم بيجمع بينهم ولقيته الفنان الرائع صاحب اروع افلام السينما المصريه زي حاحا وتفاحه لقيته المبدع السبكي - مع الاعتذار لرفع الالقاب تاني - بجد جميل

بعد الكليب الجميل ده عرفت اني مش لازم اصدق كلام الكبار اللي بيضللونا عشان اي بوسه في اي فيلم بتبقى بوسه في سياق القصه للفيلم غير انها حتى لو مش في سياق الفيلم فهي من اخ عزيز لاخت عزيزه

بجد كفايه ظلم بقا لازم نحط كل حاجه في نطاقها الصح

الله يسامحك يا بابا انت وماما منعتوني من اني اشوف بوس كتير وضيعتو مني قصة الافلام المبدعه وربنا يخليك يا تامر - مع الاعتذار كمان مره لرفع الالقاب - عشان فهمتني الحياة صح وزرعت جوايا معنى جديد وجميل هو الاخوه في افلام السبكي

الله يلعن ابو الاطفال و البروبلم سولفينج

2007-05-11T18:54:00.000+02:00

بعد الامتحانا ت بحس اني بني ادم منطلق ومن حقي اعمل اي هبل واي حاجه ومحدش ليه عندي حاجه وبما اني من حقى استهبل واكتب اللي انا عايزه عشان المدونه مكان لتفريغ الامراض النفسيه - على رأي واحد مره كتبلي كومنت- يبقى من حقي اكتب ايميل وصلني وعجبني وفحوا الايميل ده هو التالي

دراسة عجيبة قامت بها احدى المؤسسات حيث تم توجيه سؤال الى مجموعة كبيرة من الأطفال وكان

السؤال حول مفهوم كلمة ( الحب ) بالنسبة لهم
وقد خرج الأطفال بتعريفات عجيبة غريبة لكن كان من أفضلها الإجابات التالية " بس تصدقوا طلعوا بيفهموا فعلا "

ماهو الحب؟ ؟
ريبيكا – 8 سنوات عندما اصيبت جدتي بالتهاب المفاصل لم تكن تستطيع ان تنحني لتضع الطلاء على أظافر قدميها

فكان جدي يقوم بذلك لها كل مرة على مدى عدة سنوات , حتى بعد أن أصيب هو بالتهاب المفاصل في يديه

لم يتوقف عن القيام بذلك لها .. هذا هو الحب كما أراه .

بيلي – 4 سنوات عندما يحبك شخص ما , فإنك تشعر بأنه ينطق اسمك بشكل مختلف عن ما ينطقه بقية الناس , انك تشعر بأن اسمك بأمان في فمه

كارل – 5 سنوات الحب هو عندما تضع المرأة عطرا على جسدها ويضع الرجل عطر ما بعد الحلاقة ويخرجان سوية ليشم أحدهما الآخر

كريسي – 6 سنوات الحب هو عندما تخرج مع أحدهم وتعطيه معظم البطاطس المقلية الخاصة بك دون أن تلزمه بأن يعطيك البطاطس الخاصة به

تيري – 4 سنوات الحب هو ما يجعلك تبتسم حتى وإن كنت متعبا للغاية

داني – 7 سنوات الحب هو عندما تصنع أمي لأبي قهوة ثم تأخذ منها رشفة بالملعقة لتتأكد أن مذاقها لذيذ

نيكا -6 سنوات إذا أردت أن تتعلم عن الحب أكثر فعليك أن تبدأ بحب أصدقائك الذين تكرههم

نويل – 7 سنوات الحب هو عندما تخبر شابا بأنك معجب بقميصه فيقوم بارتداء نفس القميص كل يوم لأجلك

كلير -6 سنوات أمي تحبني أكثر من أي شخص آخر , إنها تقبلني في الليل حتى أغفو نائمة

إلين – 5 سنوات الحب هو عندما تختار أمي أفضل جزء من الدجاجه وتعطيه لأبي

كريس -7 سنوات الحب هو عندما ترى أمي أبي غارقا في عرقه ورائحته منتنه وتقول له أنه أكثر وسامة من روبرت ردفور

ماري أن – 4 سنوات الحب هو ان يركض اليك كلبك فرحا ويلعق وجهك رغم انك تركته طوال النهار بمفرده

لورين -4 سنوات أختي الكبرى تحبني كثيرا لدرجة أنها تعطيني ملابسها القديمة لأرتديها وتضطر هي لشراء ملابس جديدة

كارين- 7 سنوات عندما تحب فإن رموش عينيك تبدأ في الصعود والنزول وتخرج نجوم صغار منك

مارك -6 سنوات الحب هو عندما تشاهد أمي أبي وهو جالس على كرسي الحمام ورغم ذلك لا تشعر بالتقزز

جيسيكا -8 سنوات لا يجب أن تقول لشخص ما انك تحبه الا اذا كنت تعنيها فعلا , واذا كنت تعنيها فعلا فعليك أن تقولها له كثيرا .. لأن الناس يعانون من النسيان ويحتاجون الى من يذكرهم

ادعولي اخرج من حالة النشوه العجيبه دي عشان اعرف اكتئب تاني وارجع اذاكر النسا وحسبي الله ونعم الوكيل

خلاص

2007-04-30T22:16:00.000+02:00

كان نفسي ابقى
لكن خلاص
كان نفسي اكون
لكن خلاص
مبقتش هبقا
عشان بقيت
عايش في كوني
وبنفس لوني
لوني ده لونهم
بلون همومهم
اسود رمادي
من كل ماضي
قاعد يغني
على لحن همي
وبنزف دمي
ينزف ينادي
يهتف يهاتي
وبأعلى صوته
قاعد يقول
كان نفسه يبقا
لكن خلاص

Apples

2007-04-11T21:01:00.000+02:00

Girls are like apples on trees. The best ones are at the top of the tree.The boys dont want to reach for the good ones because they are afraid of falling and getting hurt Instead, they just get the rotten apple from the ground that aren't as good, but easy. So the apples at the top think something is wrong with them, when in reality, they're amazing. They just have to wait for the right boy to come along, the one who's brave enough to climb all the way to the top of the tree.
I think i am brave enough to climb .

معركتي

2007-04-09T13:47:00.000+02:00

اغمض عيني

لا ارى سوي الظلام الدامس

لا اسمع الاصوات

تعود الاصوات

متضاربه

انات وصرخات

ربما ضحكات

لاادري

تدق طبول معركتي

افتح عيني

لا اتذكر سوى الظلام وهذا يكفى كي يمنعني عن التفكير

ابحث عن مصدر الطبول

اغلق تلك الساعه اعلانا منى اني سمعت الطبول

ابدأ استعدادي لمعركتي

ارتدي ملابسي

ابحث عن اسلحتى لمعركة هذا اليوم

ابحث عن حذائي

سأجده ملقى في اي مكان

ولكن سأجده

اتجه مسرعا الى باب المنزل

امر على غرفه تلك السيده قبل نزولي

اقرأ ابتهالاتي

اسمع صوت تلك السيده وهى توجه لي دعواتها

لا اسمع سوى نصف دعواتها لاني اغلق باب المنزل

او ربما اقنع نفسي اني لا اسمع الا النصف

اتجه الى السلم مستعدا تماما الى معركتي

يدور السؤال في خاطري

هل سأموت اليوم في المعركه ام اني سأعود لذلك القبوالمظلم لأواجه ثانية تلك الانات والصرخات ؟

لا ادري واعتقد اني لا اريد ان ادري

مفيش احسن من لبن الام

2007-03-28T02:54:00.000+02:00

الحمد لله الدستور اتغير وكل حاجه بقت عال العال

مش عارف ليه بفتكر كان في مذيع مره بيسأل دكتور مجدي يعقوب انت مصر بالنسبه ليك فين ؟ وبمنتهى الثقه رد الدكتور وقال : مصر بالنسبة ليه في الخلايا

اعتقد دلوقتي لو اتسأل نفس السؤال هيبقى اكتر رد ممكن يرده انها بالكتير في افريقيا

المهم نسيبنا من الهبل ده كله واتكلم في صلب الموضوع

انا بكتب الموضوع ده مخصوص عشان اقول على المشاهد الهزليه اللي شفتها في الجزيره والمحور و دريم وكذا قناه تانيه على الاستفتاء

المشهد الاول

المذيع : ايه رأيك في الدستور

المواطن : تمام اوي وجميل

المذيع : تعرف حاجه عن اي بند في الدستور

المواطن : لا

المذيع : ايه اللي مش عاجبك فيه

المواطن : كله جميل

المذيع : يعني هتقول ايوه ؟

المواطن : طبعا

المذيع : طيب ما انت مش عارفه هتوافق عليه ليه؟

المواطن : عشان ابقى مع الشعب

المشهد التاني

المذيع : هتوافقي على التغير ولا لأ ؟

المواطنه : اكيد هوافق

المذيع : ليه؟

المواطنه : عشان الحكومه تعرف ان احنا معاها فترخص الاسعار

شفتو الذل اللي الناس الغلابه وصلتلو

المشهد الثالث

المذيع لطالبة جامعه باين عليها كل علامات الردح المتعارفه دوليا بدايه باللبانه ونهايه بالايشارب اللي متزحلق لنص دماغها : هتوافقي على الدستور ؟

الطالبه : على حسب انا فاضيه ولا لأ

المذيع : طيب لو كنتي فاضيه

الطالبه : هروح انا وصاحباتي ونقول ايوه طبعا

المذيع : ليه؟

الطالبه : عشان بحب مصر

المشهد الرابع

المذيع لطالب جامعي هو واصحابه كانو لسه ضاربين سجارتين بانجو : هتشارك في الاستفتاء لتعديل الدستور؟

الطالب : دستور ايه؟

يقوم واحد صاحبه يضربه على دماغه ويضحك ويقوله دستور مصر يا ابني

الطالب : لا عشان مشاركوناش فيه من الاول

المشهد الخامس

المذيع : هتوافق على الدستور ؟

المواطن : طبعا طبعا طبعا

المذيع : ليه

المواطن : عشان نلغي بقا زوار الفجر

العبيط مش عارف انهم هينورونا في كل وقت احتمال يباتو

المهم في الاستفتاء ده الناس انقسمت 4 انواع

الاول : معارض ورافض ومرحش الاستفتاء من الاساس ودي في رأيي الشخصي سلبيه مميته

الثاني : مش فاهم اي حاجه فأي حته وملوش في اي حاجه فمراحش

الثالث : مأجور او عبيط فراح ووافق

الرابع : انا من الصنف ده وده بقا الصنف اللي عارف ان مفيش احسن من لبن الام وبما ان مصر ام الدنيا وانا من الدنيا تبقى مصر هي امي نيلها هو دمي شمسها في سماري حتى لوني قمحي لون نيلك يا مصر و ماما اكيد هتخاف على مصلحتي يبقى لازم اوافق

ملحوظه : انا بهزر طبعا موافقتش

واحب في الاخر اسمع الاغنيه الرائعه العنب العنب العنب

وحشتونا يا اهل شرم الشيخ

2007-03-21T18:35:00.000+02:00

مش عارف ليه الواحد بيحارب عشان يضايق نفسه , بجد تعبنا بكل ما تعنيه الكلمه عشان اختى تتجوز و بعد ما اتجوزت كلنا قاعدين مضايقيين انها مش في البيت

بدور عليها في كل ركن في البيت

بدور عليها في كل تفصيله

بفتكرها في كل اكله كانت بتحبها

بستناها كل يوم الساعه خمسه وربع ترن الباب وترجع من شغلها

بجد على قد ما انا مبسوط انها اتجوزت على قد ما انا زعلان انها مش في البيت

المهم ........

الهانم اتجوزت و اعلنت رسميا موت الشاب وائل , اعتقد انا اخر مره هحس فيها اني شاب صغير هي اللحظه اللي كانت قبل ما اقعد قدام العالم الكله وانا وكيل العروسه

بعيدا عن الكأبه

الفرح كان جميل بكل معنى جميل , اول مره اشوف المعازيم اصحاب فرح , اعتقد انه من المستحيل ان حد يعرف مين كان بيعزم ومين كان معزوم

اصحابي...... كانو اكتر من جمال , بجد كنت بشوف في عنيهم فرحه غريبه من طراز فريد مشفتهوش قبل كده في حد فيهم, كانو بيتكلمو بعنيهم كلام في منتهى البلاغه وهما ساكتيين , اول مره اشوفهم كده , اول مره اشوفهم بيرقصو عملو كل حاجه في الفرح بجد شالو الفرح على اكتافهم

اهلي وعلى رأسهم خالو طه واولاد عمي....... كانو بيزغرطو بقلوبهم اقسم بالله كنت سامع صوت زغاريطهم

ماما ..... صعب اوي ان الكلام يوفيها حقها بس اللي اعرف اقوله اني عارف ليه الجنه تحت اقدام الامهات بسبب الست دي

بابا ..... اولا مبروك يا عم احمد والله يسامحك على اللي انت عملته فيه , المهم بابا كان موجود في كل حته في الفرح

في الدايره واحنا بنرقص , في الكرسي اللي محدش شايفه في كتب الكتاب , في البوفيه كان بيعزم على الناس حتى في الزفه كان واقف

انا بجد بستغرب هي ليه الناس مكنتش شايفاه؟؟؟؟؟

بجد انا بحسد الراجل ده . هو عارف يشوف الناس اللي بتوحشه وهو واحش الناس كلها ومحدش عارف يشوفه

في الاخر لازم اقول اني معملتش حاجات كتير صح في حياتي بس اللي لازم اعترف بيه ان جواز البنت دي كان من اهم نجاحات حياتي, و اختياري لأصحابي كان من اكبر الحاجات الصح اللي في حياتي , وموضوع انا عايش فيه دلوقتي و بحارب علشانه و ان شاء الله ربنا يوفقني فيه برده من اهم مواضيع حياتي ان لم يكن اهمها على الاطلاق ولو نجحت فيه هيبقى اكبر نجاح شخصي لكل حياتي

على العموم

مبروووووووووووووووووووك يا ياسمين ويا محمد وربنا يوفقكو في حياتكو يا رب

يبقى انت اكيد اكيد في مصر

2007-03-10T13:12:00.000+02:00

قالو يقرفو الشعب المصري شويه عشان لازم يثور بقا شويه

اجتمعو وكان القرار يغلوا الاسعار

مفيش فايده

اجتمعوا تاني وكان القرار يزودوا الضرايب

بردو مفيش فايده

قالوا مابدهاش احنا نوقف ظابط على اخر كل كوبري يضرب كل واحد معدي على قفاه

وفعلا حصل كده

نزلو عشان يشوفو رد الفعل على كوبري الجامعه

لقو زحمه جامده اوي والناس مش قادره تتحرك

وفجأه

طلع واحد بيزعق جامد وثاير وبأعلى صوتو راح قايل

مش ممكن كده احنا بني ادميين , وقفو اتنين يضربو عشان ورانا مشاغل

ملحوظه

هو ده شعبنا اللذيذ المسالم والله يرحمك يا عم سعد مفيش فايده

كنت فاكره مات

2007-02-10T15:26:00.000+02:00

النهارده وانا قاعد بذاكر والدوشه جنبي من صوت الاطفال في الشارع وهي بتلعب وصوت ماما في المطبخ وغيرها من الاصوات

فوجئت بصوره بابا - الله يرحمه - المتعلقه في الاوضه بتضحك اكتر من كل يوم

حاولت اقرب من الصوره شويه عشان اركز في التفاصيل , غريبه الصوره فعلا بتضحك اكتر من كل يوم

فجأه الدوشه اختفت

مفيش اطفال بتلعب وماما ملهاش صوت

رفعت وشي للصوره تاني

لقيتها بتقولي : هانت يا وائل

تلقائيا سألتها : ايه اللي هانت؟

جاوبتني : خلاص اختك هتتجوز واول حلم او حمل - مش فاكر قالتلي ايه بالظبط - ليك هيخلص

ساعتها افتكرت ان دي مجرد صوره بعدين حتى ولو ده بابا مات انا متأكد اني دفنته بنفسي من اكتر من 7 سنين

رفعت عنيه تاني للصوره

لسه بتضحك

قالتلي :ياعبيط انت دفنت جسمه بس لسه ذكرياته ولسه روحه موجوده, يا ابني بص على اسمك هتلاقيه دايما لازق فيه تعرف تشيله؟

جاوبت بمنتهى الهدوء : لا طبعا

بعد ما جاوبت لقيت صوت الدوشه رجع تاني, الاطفال لسه بيلعبو وماما لسه بتطبخ

بصيت للصوره

هي هي الصوره زي ما هي من ساعة ماعلقناها بنفس التفاصيل ونفس الابتسامه

للحظه فكرت اني باين اتجننت

بس بعد ما فكرت انا عاقل جدا بس عقلي الباطن تمرد على صمته وحب يوصلي رساله

مقدرتش في الاخر غير اني ابص للصوره واضحك واقولها : وحشتني اوي

يوم في جنينة الحيوانات

2007-02-05T02:07:00.000+02:00

رحنا جنينه الحيوانات يوم الخميس 1 / 2 / 2007 م وكان بجد يوم جميل ولذيذ جدا وبما ان دي مدونتي ومن حقي اكتب فيها اللي انا عايزه فلازم اوجه شكر كبير جدا لاحمد ربيع و مروه شلبي الاتنين اللي كانو ماسكين الرحله .
اولا

احمد ربيع
ليدر ممتاز كان قلقان جدا على الاطفال , كان حاسس بمسؤوليه رهيبه , نجح تماما في توزيع الادوار على الناس و نجح نجاح باهر في فك رموز الخريطه و كانت الناس مرتاحه جدا طول ماهما شايفين ربيع في الاجواء وده ان دل على شيء يدل على انه كان رائع , كان هادي جدا في كل قراراته
بجد اقل حاجه تتقال عليه انه كان رجل الموقف
ثانيا

مروه شلبي

اول مره تمسك رحله او بالاصح اول مره تمسك شغل كليدر في رساله بس اثبتت كفاءه ممتازه وكانت بتتمتع بأسلوب الهزار بالقدر الكافي اللي يمنع التوتر لكل الناس اللي حواليها ماشاء الله كانت مركزه جدا في كل اللي بيحصل بجد كنت حاسس ان الناس بتلف حوليها , كانت بجد مركز الرحله , كان عندها هدف في دماغها وهو اسعاد الاطفال بكل الطرق الممكنه والغير ممكنه و الحمد لله نجحت في تحقيق هدفها
غير كمان انها هي اللي اكلتنا و ربنا يجعل بيت المحسنين عمار
ثالثا
الرحله
كانت بجد بكل المقاييس جميله و ماشاء الله يوم عن التاني بحس ان رساله بتتحول من اسره الفرد الى اسره الجماعه زي ما محمود بيقول .
في الاخر احب اقول بعض الاقوال المأثوره اللي كانت في الرحله

< مهمه اوي العدسات الخضرا في جنينه الحيوانات >

قالتها احد المتطوعات و مشرفه الدار خنقانا وهي بتلبس ومصممه متجيش غير بعد ما تلبس العدسات

< هو احنا مش هنروح جنينه الحيوانات بقا؟؟؟؟؟ >
قالها وليد – طفل – واحنا في جنينة الحيوانات ومقعدين العيال ساعه يفطرو وساعتها اكتشفنا ان العيال اساسا مش عارفين ان احنا خلاص وصلنا الجنينة

< انا حكيتلهم كل حاجه عن السمك ومفيش تاني مش هنمشي؟؟؟؟ >

قالتها احد المتطوعات في نفس الساعه بتاعه الفطار والعيال بيشوفو السمك اللي في الميه وغالبا مكنش سمك كان شويه زباله في الميه والبنت مكنتش عارفه تعمل ايه عشان تسكت الولد

< مصطفى عزت تااااه يا وائل ثواني هتصل بيه>

قالهالي محمد علي و كان بيتكلم جد وهو مش لاقي مصطفى

< هو الولاد هيتغدو امتى؟؟؟؟؟؟ >
قالها احمد الشاعر لليدر والمتطوعين هيموتو من الجوع

< انت بتثير الفتنه وعايز الاطفال يتبسطو >
قالها ربيع لاحمد الشاعر واحنا عايزين نمشي وهو مصمم يفرج الاطفال على الحيوانات

< ايه ؟؟ الزرافه ماتت ؟؟ بس كويس هيغيرو اربع اسود بزرافه عشان الاسد كائن متوحش >
قالتها احد المتطوعات لما اتصدمت بموت الزرافه

< قوم اسرقلي ساندوتش من الكيس يا كوكا >
قالها مصطفى عزت وهو جعان

< مامااااااااااااااااااا عمو مصطفى بيقولي اسرقلو ساندوتشين >
قالها كوكا و كان بيشتكي لمامتو ( المشرفه ) من مصطفى عزت

< ايه الاستهبال ده جايبين للاطفال عصير جهينه واحنا عصير مجهول ؟؟؟؟؟ >
قالها محمد على واحنا بنشرب العصير د

< هو ده اللي انت عايزه يصنع بروسيسور؟؟ >
قلتها لاحمد الشاعر لما سمير كان بيرقص بمطوه في وسط الجنينه

< هو انت الفيل يقربلك ايه يا وائل ؟؟؟؟ >
قلهالي مصطفى عزت لما كنت مصمم اخلي العيال تأكل الفيل و الدنيا زحمه

< انا عايزه اشوف الجبلايه >
اللي قال دي متطوعه مش طفله

< مش قادر الحمام ريحته قذره >
قالها سمير – طفل – بعد خروجه من الحمام وهو قافل مناخيره

زي امبارح

2007-01-04T17:00:00.000+02:00

استيقظت كالعاده متأخرا , مازالت الساعه في غرفتي لا تعمل و تحتاج الى بطاريه ,مازلت اسمع صوت الاواني وهي ترتطم ببعضها وامي تنظفها, مازالت الشمس تضيء الكون , كما اني مازلت اشعر ببعض الحزن ولا اعلم لماذا؟

سأذاكر بعض الدروس ,سأشاهد فيلما شاهدته مالايقل عن 20 مره منهم 15 على نفس القناه , سأكتب موضوعا بلا جدوى , سأنتقد بعض طعام امي بالرغم من كونه لذيذا

سأخرج ليلا لأقابل نفس الاشخاص على نفس المكان لنضحك على نفس النكات ثم نأكل في نفس المطعم نفس الطعام

اعتقد ان الغد سيكون مختلفا لأني سأضع بطاريه في ساعه غرفتي

اعدام امة

2007-01-01T21:14:00.002+02:00

مات صدام حسين او بالاحرى اعدم في اول ايام العيد كخروف ضال ولكني لم اشاهد مشهد مقتله الا اليوم في ثالث ايام العيد

لم استطع ان اسيطر على شعر جسدي وهو يقف اعتقد انه كان يعترض,قاومت قلبي كثيرا و حاولت ان اقنعه بأن يظل ينبض, اعتقد اني نجحت في السيطره على جميع اجزاء جسدي ولكني لم استطع السيطره على روحي ..... اعنقد ان روحي مازالت في فتره الصدمه

انا لا انكر اني كنت اكره صدام حسين جدا بل وكنت اجلس في مجالس كثيره كي اذكر كم كان هذا الشخص طاغيه ولكني اليوم ايضا لا استطيع الانكار انهم وضعو امه كاملا على منصه الاعدام

لقد اعدمو شخص صدام ولكنهم وضعو معه في نفس المشنقه كرامه تلك الامه

احسست بالفعل بصفعه قويه على وجهي حين وجدت صدام مدلى مغمض العينين ... احسست فعلا بجرح غائر في روحي

انا لا اردي هل تصاب الروح بالوهن ولكني بالفعل احس بها تصرخ داخلي انها وهنه ضعيفه بل اني احس بها تحتضر

كم اكره احساس الضعف ....... كم اكره احساس الذل

لا استطيع التوقف عن سماع صدى صوت صدام حسين وهو يقف شامخا كالصخره يقول : اشهد ان لا اله الا الله واشهد ان محمدا ..... انا لا اختصر ما قاله انا اكتب ما قاله حرفيا لأنه لم يكمل الشهاده , لم يسمحو له بأن يكملها

لا استطيع التوقف عن سماع الاصداء من حوله وهم يسخرون منه قبل موته صارخين به ان يذهب الى جهنم

اقسم اني لم احس بمثل هذا الضعف والانكسار من قبل حتى حين مات والدي هذا لأنني وجدت يومها من يدعمني ولكني اليوم لا اجد من ارجو فيه القوه

انا فعلا اكره هذا الشخص ولكني لا استطيع توصيف ذلك الاحساس الذي يملأ جنبات صدري تجاه ما يفعلونه بنا لأن الكره في حد ذاته احساس لا يصف شده ما يجوب بداخلي

اكره او احب فهذا لن يغير شيئا مما حدث واعتقد اسفا انه لن يغير ايضا ما سيحدث

اظن ان شغلي الشاغل في الفتره المقبله هو ان ابحث عن المقبره التي دفنت بها كرامتنا لأضع عليها اكليلا من الزهور

الخامس والعشرين من ديسمبر

2006-12-29T16:30:00.000+02:00

اعتقد اننا في يوم 25 دسمبر ندفع ثمن غلطه ارتكبناها في منتصف شهر مارس الماضي, لا ادري كم اتحمل من هذه الغلطه ولكني واثق اني اتحمل منها الكثير

كم كنت مليئا بالحماس انا وزملائي في ابو رجيله . اعتقد ان هذا الحماس طغى على العقل مما جعلنا ننسى او ربما نتناسى ان نشرك الاصغر منا سنا وايضا اقراننا في ابو رجيله

اصبحت ابو رجيله موضوعا جميلا نتقبل فيه المدح ليمتلىء كل منا زهوا بكل كلمه جميله يظهر فيها معنى: الله عليكم انتو عملتو كل ده والله برافو ...... كانت هذه الكلمات بمثابه الدافع الذي يجعلنا نتمادى في خطئنا . انا لا احمل غيري خطئي ولكني احلل اسباب ما حدث

اتفقنا اليوم جميعا ان ابو رجيله اصبح العمل فيها مستحيلا مع دراستنا كطلبه في الفرقه الخامسه في كليه الطب وعندما فكرنا في البديل اكتشفنا انه لا يوجد بديل جاهز مما جعلنا نتوقف عن العمل فيها حتى نهايه العام لنصلح خطئنا بتجهيز طاقم عمل جديد قد يوافق او قد يرفض الفكره

اتحمل على عاتقي ذنب هذه المنطقه لأنني انا المسؤول عن هذا المشروع , اتحمل ذنب اسر كان من الممكن ان تتغير حياتها في فتره توقفنا

لا ادري كيف يجب ان احكم على نفسي اليوم هل انظر الى المشاريع الناجحه القائمه في ابورجيله اليوم وابتسم لأقول اني ناجح ام انظر الى الفتره القادمه الكفيله بقتل المشروع لأصرخ بأني فاشل

اعتقد اني يجب ان اعترف بأن الحكم على الغير سهل جدا والنقد اسهل ولكن عندما تتساوى الظروف يصبح الحكم في منتهى الصعوبه , كنت العن في انظام الحكم في مصر ولا ادع اي مجالا للشك ان حكومتنا لا تعترف بتسليم المسؤوليه لمن هم اصغر سنا ولكني اقترفت الاثم نفسه اعتقد اني قد اصاب بالجنون قريبا ان ظل هذا الموضوع يؤثر على تفكيري واعتقد اني ان فشلت في ابورجيله فيجب ان انجح في الاعتراف بأن كل من عملو في ابو رجيله كانو رائعين و لا احمل اي منهم الذنب فيما حدث واعتقد اني اتحمله وحدي واطلب منهم ان يسامحوني

يا صباح الكوميونتي

2006-12-23T23:24:00.000+02:00

بجد انا بسأل سؤال لكل الناس اللي في كليه طب

هو ليه احنا مش بناخد هندسه ميكانيكا؟

مهي بردو ملهاش علاقه بالطب زيها زي الكوميونتي . انا الحمد لله والشكر ليه كفأتي العظيمه اهلتني اني ابقى ليدر في الكومينتي - شفتو الهنا اللي انا فيه - اعنقد اني لازم دلوقتي اجهز الناس اللي معايا نفسيا انهم هيضيعو 30 درجه عشان معاهم ليدر في البتنجان .

تعالو مع بعضينا كده زي الشاطرين نستعرض الهطل والهبل اللي انا بفكر فيه

اولا :عمل ندوه عن الفقر الغذائي المحاضرين هيبقو احنا بس احب اقول ان نص اللي معايا عندهم السل زي حالاتي

ثانيا : ردم الحفر الموجوده اول القريه صدقو احنا بردو اللي هنردمها

ثالثا :زرع شجر قدام الوحده الصحيه

رابعا : تلييف الاطفال داخل القريه بالصابون وفرش البلاط

خامسا : عمل عرض مسرحي عن التدخين والعفن والقمل الطاير

سادسا: واحد مننا هيلبس سيجاره وننزل فيه طحن في القريه عشان نفهمهم ان السجاير وحشه

بجد اعمل ايه اتجنن ولا اقتل نفسي واخلص بجد حسبي الله ونعم الوكيل واللي يقرا الموضوع يدعيلي بجد

اليوبيل الفوضي

2006-12-13T00:36:00.000+02:00

اعتقد ان طلبه الاخوان المسلمين الذين لا يتجاوز عمرهم ال 25 عاما احتفلو اليوم بيوبيل عمرهم الفوضي بتشيع جنازه النظام
انا لا انكر ان قمه الظلم هي شطب طلاب الاخوان المسلمين من انتخابات الكليه لأنه يستحيل ان تنفصل كلمه انتخابات عن كلمه نزيهه ولكن ايضا لا انكر ان ما حدث في جامعه الازهر هو تمادي سافر لكل من سول له عقله بأن يشترك قولا او فعلا فيما حدث
سمعت الكثير من التعليقات احب ان اذكر منها تعليق احد نواب مجلس الشعب التابع للاخوان المسلمين كانت فحوى هذا التعليق هو انهم اعتذرو عن ما حدث ولم يوافقو عليه فكرة وموضوعا . انا لا اعشق الاستهزاء ولكن لا استطيع سوى ان استهزىء على هذا القول اعتقد ان الطفل في مهده لا يخفى عليه ان الاخوان منظومه تتمتع بالتدرج الوظيفي والنظام البحت الذي لا استطيع انكاره , اخلص من هذا بأنه يستحيل نظريا وعمليا ان يكون ما حدث دون علم مكتب الارشاد يزيد على ذلك ان ما شاهدناه هو عمل منظم بتفكير واعي

لنعود مره اخرى للتعليقات اتذكر ايضا تعليق رئيس الاتحاد الحر وهو ان ما حدث كان في المدينه الجامعيه ولم يحدث هذا في الجامعه , يجب مره اخرى ان استهزىء على هذا الطالب الذي اعتقد انه لم يشاهد التسجيلات التى يوجد بجانب احد المظاهرين يافطه اعتقد انه كتب عليها كلمه لا افهم معناها كانت هذه الكلمه هي ( وكيل الكليه ) فهل يسكن وكيل الكليه في المدينه الجامعيه ؟
سأبتعد عن التعليقات وسأتحدث عن لب الموضوع اعتقد ان ما رأيته يستحق علامات استفهام ضخمه ويستحق ان يدب الذعر في قلب كل من يهتم لأمر هذه الدوله . لقد رأيت اليوم ما يقارب من 500 طالب القو بعقولهم الى من يتلاعب بها والقو بمصائرهم الى جنه المسيح الدجال انهم فعلا يصعدون الى الهاويه
انا لا اهتم بالاخوان , انا اهتم بهؤلاء البسطاء الذين اغفلو عقولهم . ان هؤلاء الطلبه بالفعل بسطاء كانو اداه ممتازه لاظهار قوه الاخوان المسلمين
ان ماحدث كان كما يقول العربجيه وسائقي الميكروباصات : كارت ارهاب
تمتع المسؤلين من الاخوان بالذكاء الكافي لينكرو ما حدث بل انهم ايضا رفضو اي عنف ولكنهم قامو بدعايه مجانيه لقوتهم على جميع المحطات الفضائيه
لا ادري هل سيسجن هؤلاء الطلبه ام انه سيفصل العديد منهم ام سنلجأ الى العقل ونحتويهم ؟؟؟ ولكني اعلم جيدا ان المرشد العام سيخرج منددا بما حدث ومحتسبا هؤلاء الطلبه مناضلين من اجل القضيه ليلف حوله مجموعه اخرى من الشباب تبحث عن من يشتري عقلها بأرخص سعر وهو الشعارات
ياله من نجاح باهر وتخطيط عبقري وتنفيذ رائع من منفذين سذج اعجبهم شعارالاسلام هو الحل

اين الشمس؟

2006-12-07T23:07:00.000+02:00

اين الشمس ؟

سؤال كنت اسأله لنفسي ومازلت

اصبح شعبنا المصري -هذا وان كانت الجنسيه المصريه مازالت شيئا يعترف به اكثر من الذين يحملون على ظهور بطاقاتهم تلك الكلمه (مصري)- يبحث عن تلك الشمس او لو اردت تحري الواقعيه فهو يبحث على شيء يلتف حوله

اصبحنا كالبعوض يلتف حول النار لتحرقه ظانا ان هذا الضوء هو طوق النجاه

لا ادري مابال هذا الشعب يتلاعب به كل من اراد , جاء هذا الاخرق ليفتي لنا بفتواه العظيمه ويحلل ويحرم كما يشاء . لم تكن تلك الفتوه هي المصيبه كانت المصيبه هو ذلك البدين الذي خرج وهو يصيح باكيا بأن تلك التصريحات خدشت مشاعره الرقيقه , لا اظن يوما اني وجدت ذلك البدين وهو ينظر ولو بطرف عينه الى الدين فلما اليوم تذكر انه مسلم ؟ بل انه اكتشف انه مؤمن ايضا

بعد تصريحات ذلك البدين انتفض صلاح الدين الذي يجلس بين ضلوع كل مصري, بل انه يجلس تحت قمصانهم, ليصرخ ويخرج خنجره ليقتل ذلك الرعديد الذي حرم الحجاب ولكن بعد المعركه الطاحنه اكتشف كل منهم انه استطاع ان يثبت ان الحجاب فريضه ولكنه ايضا وجد دما يسيل على قميصه انه دم من كان يقاتل بجانبه

هذا هو الواقع طعن كل منهم زميله ظانا انه هو العدو , اصبح كل واحد يجهل من عدوه ومن زميله , اصبح كل منهم يبحث عن ما يلتف حوله ,ان قالو هلمو الى الدين ذهب , وان صرخو به ان يلتف حول جهنم لذهب ايضا بلا تردد

اصبحنا نبحث عن ذلك الفلك الذي يجب ان ندور فيه, اصبح كل منا يمشي ذلك الطريق المظلم وهو متيقن انه لن يصل ولكنه يمشي فلا سبيل له غيره

كل منا يمشي في دربه ويبحث عن مجموعته الفلكيه ولكن لن نصل لأننا نفتقد الى الشمس التي سوف تجمع اشتات هذه المحموعه

الشمس هي ما ينقصنا فأن وجدانها سنجد المدار وسيضيء الطريق

كشفت راسي ودعيت عليك

2006-11-26T00:33:00.000+02:00

الحكايه ببساطه ان الحاج فاروق حسني صحي من النوم بدري وراح على الوزاره فتحها ورش قدامها وطلع تلاجه الحاجه الساقعه بس بعد ما حط التلاجه في الكهربه - اصله بيفصلها باليل عشان بتسحب كهربه جامد - اكتشف ان التلاجه بايظه ومش بتسقع فنزل بمنتهى الهدوء تحت التلاجه يبص على الماتوربس في اللحظه دي كان بليه ابن الاسطى عبدو معدي بالعجله بتاعته والظاهر انه داس على رجلين الحاج فاروق - اصل الحاج فاروق مكنش شايف وهو تحت التلاجه - فقام الحاج فاروق وشتم بليه ودعا عليه بس الظاهر ان الحاج فاروق مكنش لابس حاجه على دماغه وعنها راح بليه جري على مجلس الشعب وطلب انهم يستجوبو الحاج فاروق والبلد ولعت
بعد التريقه الكتير ممكن اقول ان رأيي الشخصي ان فاروق حسني مش شيخ ولا يفهم في الدين حاجه فبصراحه يقول اللي هو عايزه بس الصح ان احنا نطالبه باعتذار والسلام عشان الموضوع عبيط ومش مستاهل كل الكلام اللي حصل فيه عشان اللي اتكلم كان وزير الثقافه مش مفتي الجمهوريه وعلى رأي شعبان عبد الرحيم بس خلاص

عندما يصمت العقل

2006-11-24T20:31:00.000+02:00

عاهدت نفسي اليوم وانا اشرب كوبا من الشاي في تمام الساعه الثامنه صباحا وانا اسمع اغنيه لفيروز والبس ملابسي حتى اذهب لألتحق بالقافله الطبيه التي ستقيمها رساله بمنطقه قالو لي انها تدعى "نزله الاشطر" بأن لا اغضب وان لا يعلو صوتي على اي من المرضى مهما كان السبب
ولكن في نهايه الكوب اكتشفت ان الساعه اصبحت الثامنه و 25 دقيقه فنزلت مسرعا وركبت سياره اجره " تاكسي " - اصلي غني غنى فاحش واخر حاجه بفكر فيها الفلوس - وهنا شنف سائق التاكسي المدعو رجب اذاني برائعه من روائع الفنان الرومانسي عماد بعرور اتذكر منها جمله تقول ( البانجو ده مش بتاعي هما اللي رموني عليه ) وفي وسط الاغنيه اشعل رجب سيجاره مستدقه الشكل ونفث دخانها في وجهي او لتحري الدقه في رئتي فنظرت له نظره معناها " ارحمني مش على الصبح يا اخي " ولا اخفي عليكم ان رجب يتمتع بفراسه رائعه سمحت له بأن يفهم ما اريده دون ان اتحدث فقال لي بثقه : دي الاصطباحه يا بيه حينها اقتنعت اني يجب ان اضع لساني في فمي حتى اصل سالما
وصلت والحمد لله وانطلقت القافله - في حوالي 4 دكاتره اعتذروا بس بردو عادي - ووصلنا الى النزله وهناك وجدت حشودا من الجماهير تنتظرنا كأننا نجوم الاهلي بعد ان عادوا بالكأس حينها عرفت ان الاختبار الحقيقي لقوه عهدي قد بدأ وبدأت اكتشف هل سأحنث بعدي ام لا؟
بدأ اليوم فعليا في تمام الساعه 11 ظهرا ولكن الوحوش الضاريه التي تقطن في النزله كادت ان تلتهمني انا ورفاقي ومتعونا بكل انواع السباب التي تقوم قناه ميلودي افلام بقطعه - بس مش بتقطع اي منظر خارج - والملفت للنظر اني كثيرا ما كنت اخترق الجموع الغفيره حتى اسد فم احد رفاقي قبل ان يتهور وينطق ببنت شفه لأحد الوحوش ولكني كنت اهتم ايضا بسد اذنيه حتى لا يسمع ما يوجه اليه من كلمات رقيقه قد تصل الى والده او في بعض الاحيان الي والدته من ذلك الوحش ثم اعود لأرمق ذلك الوحش بنظره تعقبها ابتسامه ثم توبيخ لذلك الوحش لما فعله مع زميلي وكثيرا ما كنت اقنعهم وما ان اعطي ظهري حتى اسمع " الواد ده باينه عبيط " ولكن الحمد لله ايضا لم اغضب فقد عاهدت نفسي بالصمت
اعتقد ان السؤال المنطقي الان لماذا كانو يفعلون ذلك؟ كان ذلك لأننا لم نسمح لزيد ان يدخل قبل عبيد هذا لان حرف ال " ز " يسبق حرف ال "ع " في الترتيب الابجدي العربي ولكن حرف ال "الزد " لا يسبق حرف ال " الاي " في الترتيب الابجدي الانجليزي فلماذا نسمح لأنفسنا بأن نتعامل بالعربي لا بالثقافه الاجنبيه - طبعا بتريق - لكن كانت جميع المشاكل في مثل هذه التفاهه
لا ادري هل انا اكثر المتشائمين ام انا اكثر الواقعيين ولكن استطيع القول ان سائق التاكسي - رجب - والوحوش القاطنه بنزله الاشطر وللاسف نحن كنا اكبر مثال لصمت العقل بل لموته واعتقد اني اكثر ما اخاف منه هو الاميه لا اقصد اميه الجهلاء بل اقصد اميه المتعلمين فعندما صمتت عقولهم ابينا ان تتكلم عقولنا واسكتناها وتعاملنا بنفس الهمجيه صرخنا بهم كما صرخو بنا واعتقد انه كان من الممكن ان نتبادل اللكمات بل وسب الدين ان تطلب الامر
اعتقد اننا اليوم لم نعطهم درسا في حوار العقل بل اعطيناهم درسا في كيفيه تناسيه ورسخنا بداخلهم الفكر الواعي والنموذجي للهمجيه
لا يسعني الا ان ادعو لهم بالرحمه وادعو لنا بالمغفره

اريد ان اصرخ

2006-11-20T23:39:00.001+02:00

هل سأظل قابعا في صومعتي اصرخ؟تعبت من صوتي حتى انه سيخترق اذني اريد ان اتمرد على هذا الخوف الذي يملأني اريد ان اخرج خارج هذه الصومعه حتى اصرخ دون ان اصاب بالصمم لا ادري هل سيصل صوتي لأي اذن ام انه سيتوراى مثل الاف الاصوات خلف ضجيج تلك الحياه ولكن مايهمني انني صرخت لا اقول اني اريد ان اجلس بعدها على اريكتي مرتاح البال وانا ارتشف كوبا من الحليب الساخن كما انني لا ادعي اني جيفارا وسأذهب لاحمل بندقيتي لأصلح ذلك الكون الفاسد ربما لأنني لا امتلك بندقيه او ربما لأنني اخاف ان تمضي اول طلقه لتخترق ذلك الكيان الدائري المبتسم المرتكز فوق عنقي ولكني اريد ان اصرخ .

اريد ان القي بخوفي في جهنم ولا يهمني ان كان السبيل الوحيد هو ان القي بنفسي معه لأنني حينها سأصرخ فيه قائلا لقد احرقتك ايها اللعين ولن ابالي بجدسدي وهو يحترق .

كل ذلك بسبب تلك المدعوه سميره او كما يقول طاهر- ام احمد - وضعو لها الف حارس ليحسب لها خطواتها بل ويراقبها لانها اذنبت بأن تركت زوجها يموت ..... رفضوا ان تدخل ابنتها الجامعه لماذا؟ لانها تركته يموت ..... اقتحمو منزلها ولم يدافع عنها احد لماذا؟ لانها تركته يموت ........

لست ادري هل كانت سميره تمتلك اكسير الحياه ؟ ان كانت تملكه فلم لم تعطه اياه؟ ولم لم تعطني منه؟ ربما كنت اعطيته للسيده التي انعتها انا واخوتي بأمي او ربما كنت ارتشفت منه بعض الرشفات لعلي اعيش حتى ارى تلك البلده وهي في حلة جديده ولكن سيظل ذلك الاحساس اللعين يطاردني او ربما يجاورني هل سيسحق ذلك الاكسير عقلي ان لم تتغير تلك البلده ؟ ايضا لا ادري .

ولكن كل ما اعرفه ان تلك الابورجيله حكمت حكما تظن انه عادل بأنها مذنبه وانها هي من اخفت اكسير الحياه . لا استطيع القول سوى فلتذهب ابورجيله الي الجحيم ولتتركني اصرخ بأعلى صوتى لماذا تركته يموت يا سميره ؟ والى متى سنظل كذلك ؟؟؟؟؟؟؟

انا مبسوط

2006-11-19T20:37:00.000+02:00

ده اول موضوع اكتبه بكتبه وانا بجد مبسوط ممكن يكون في افكار كتير في دماغي وممكن كمان تكون كل الافكار دي متضاربه بس بجد ممكن يكون الاحساس الوحيد اللي انا متأكد منه اني مبسوط.

رجعنا النهارده من ابو رجيله وشفت المشاريع اللي عملناها وكان بجد الموضوع ممتع شفت بجد نجاح اسره انا بجد بحبها بس اللذيذ في الموضوع هو الناس اللي معايا هما دول بجد اللي عاملين التضارب الكتير اللي في دماغي وممكن كمان احمد الباشا من اهم الاسباب اول مره اتكلم معاه وانا هادي كان في في دماغي كلام كتير عايز اقلهوله وكنت خايف اتعصب عليه بس الغريبه اني لقيت نفسي بارد اوي وقاعد بهزر والاغرب هو ان على هو اللي اتعصب - غريبه مش كده - المهم انا مش فاكر انا قلت للباشا ايه بس اللي فاكره ان كان في ناس بتضحك وناس بعد القعده كان هاين عليها تضربني بالنار وناس تانيه قالت اني كنت بتكلم بأنعره معاه .

نرجع للناس اللي كانت موجوده..... ناس بتتعامل بمنتهى الاحترافيه وناس بتتعامل بمنتهى الطيبه وناس بتتعامل بمنتهى القرف - بالمناسبه القرف ده اكتشفت مؤخرا انه بسبيي كانو قرفانين مني - بس بردو ارجع واقول اني بجد كنت مبسوط كنت بهزر والمشكله اني اكتشفت مؤخرا ان الهزار ده بيبقى تريقه على اي حد والناس طلعت بتزعل و المشكله اني مش قادر ابطل طريقتي دي وبحاول اعتذر للناس بعد وصلت التريقه المتواصله. ساعات بعتذر وانا مقتنع وساعات بعتذر وانا مقهور وساعات بعتذر نوع من انواع الشياكه بس المحصله اني بعتذر والمحصله اني بلاقي ناس مش زعلانه وناس بتضحكلي ضحكه بشوف وراها كلمات بيقولها بتبقى غالبا يخرب بيت الزمن اللي وقف واحد شبهك معايا وناس تالته بتكلمني بانكسار بنوع من انواع ارحم اهلى من طريقتك دي بس بعد ما بعتذر بحس اني عملت اللي عليه ومش هعرف اعمل اكتر من كده و الالذ اني بعد ما بعتذرله قبل ما بقول سلام لازم اشجيه بسهم سهامي الممله واتريق عليه - انا رخم مش كده - على العموم ماعلينا .

مش عارف لو كان من حقي اقيم الناس امبارح فممكن اقول ان على كان متألق وربيع كان جميل ومنظم جدا ومصطفى كان رايح يشوف قصه الحب الكبيره بتاعته مع ام عمر - بهزر طبعا - وفتح الله كان بيجرب النظام الجديد ايه ونظام شغلنا هناك اما البنات فكان في بنتين حسيت اني لو اتأخرت اكتر من كده ممكن يضربوني بالجز..... وكان في بنت بتضحك على كلامي وبتقول جواها اهو الزمن اللي خلى الشخص ده يمسك ابورجيله و حسبي الله ونعم الوكيل وبنت ساكته وبتشتغل وملهاش دعوه بحد وبالاخيره كانت مبسوطه وشايفه ان كده كويس بس الاهم ان كل البنات اجمعو ان احمد الباشا غلبان وانا ظالم ومفتري واستاهل الحرق نرجع ونقول ماعلينا وطبعا لما يجي وق تقيمي لذاتي مقدرش اقول غير لو لم اكن وائل لوددت ان اكون وائل -هزار بردو - طبعا مش هقيم نفسي او لو هقيمها فمش هكتبها هسيب التقييم ليكو .

في الاخر اقدر اقول انا بجد مبسوط بأبو رجيله جدا ومبسوط اني مع الناس الجميله اللي في رساله ومبسوط بنفسي اني مكنتش عصبي مع احمد الباشا