سعد سعد يحيا سعد

يوم الخميس اللي فات اكتشفت ان الواحد كبر اوي عدى مرحله الشباب الطايش وخلاص بقا كبر اوي

من اول ما دخلت الكليه وبقا المكان الرسمي لخروجات الشله بتاعتنا هو قهاوي مصر المحروسه بس بقوانينا الخاصه يعني الصايع اللي فينا بيشرب شاي ويحس انه كده سكر اتذكر مره نزل ماعانا واحد صاحبي بيشرب شيشا بس كالعاده فرفور زي حالتنا فلما دخل علينا الجارسون سأله بمنتهى الادب عندك شيشه ؟

الجرسون: ايوه

صاحبي: طيب ممكن واحد؟

الجرسون : نظره حقيره بمعني انتو ايه اللي بينزلكو اصلا من بيوتكو بعدين راح قايل طيب هجيبلك

المهم بدأنا نلعب كل فنون الالعاب المسموح بيها دوليا في القهاوي يعني بدأنا بالاستيماشن واستمرينا فيه حوالي سنتين متواصلين كل يوم لحد لما احترفناه انا اعتقد ان مصطفى رفعت صاحبي ممكن يدخل في بطوله استيماشن عالميه ويكسبها عشان يحمل جواه كل الوان الحقد الدفين في اللعبه دي اللي تسمحله انه يحطلك سم في العصير على القهوه عشان تموت ويطلع هو الكينج

ثم حسينا ان الاستيماشن دي لعبة الاطفال فبدأنا نلعب شطرنج وماشاء الله بقينا نقعد على القهوه كل واحد بيلعب مع اللي قدامه شطرنج ويسود صمت غريب مابينا ده طبعا غير ان محمد على بيحتاج لحوالي من ربع لنص ساعه عشان يحرك قطعه والمصيبه انه في الاخر بيتغلب

وكانت برده مرحله

ثم مررنا بمرحله قصيره اوي وهي مرحله الدومينو ودي مطولتش

ثم وصلنا الحمد لله للمرحله الطبيعيه والتطور الطبيعي وهي الطاوله بقالنا فتره بنلعبها لحد لما الخميس اللي فات رحنا على قهوه عند كوبري عباس وقعدنا بس لازم اوصف الجو العام للقهوه وهو كان كالتالي

قهوه نضيفه جدا وده مش هزار , اصغر واحد على القهوه عمره خمسين سنه , يمارس كل زوج من الشباب فيهم الطاوله , يحيط بالقهوه صوت من الموسقا التصوريه الرائعه وهي طااااخ دوش طااااااخ جهار الشيش ثم الاروع هو اغنية الحب كده لام كلثوم

المهم قعدنا كالعاده الجديدة طلبنا طاوله بدأنا نلعب والصمت يخيم على المكان وام كلثوم بتغرد في النص مابيدرش مابينا غير شويه شتيمه من ان كل واحد استغبا انه لعب الاواشيط بتاعته في مكان غلط ( الاشاط : ده لفظ يطلق على الكائنات المسطحه بتاعت الطاوله ) ثم الاصوات تختفى وام كلثوم صوتها يعلى كمان وقطع الصمت احساسنا بأن كده غلط احنا معندناش ستين سنه لازم نتمرد على كده وواحد من اصحابي قال بخنقه تعالو نقوم راح التاني رد عليه قاله لا لسه بعد خطاب جمال عبد الناصر وانا حسيت انه مينفعش نقوم قبل ما العساكر الانجليز يدخلو وتقوم المظاهره بجد الخميس اللي فات حسسني ان الواحد كبر اوي وفقد حتى طيش وعبط الشباب بس على العموم عادي

المصيبه المرحله الجايه هتبقى الشيشه والفراااااااااااغ و سعد سعد يحيا سعد