مفيش احسن من لبن الام

الحمد لله الدستور اتغير وكل حاجه بقت عال العال

مش عارف ليه بفتكر كان في مذيع مره بيسأل دكتور مجدي يعقوب انت مصر بالنسبه ليك فين ؟ وبمنتهى الثقه رد الدكتور وقال : مصر بالنسبة ليه في الخلايا

اعتقد دلوقتي لو اتسأل نفس السؤال هيبقى اكتر رد ممكن يرده انها بالكتير في افريقيا

المهم نسيبنا من الهبل ده كله واتكلم في صلب الموضوع

انا بكتب الموضوع ده مخصوص عشان اقول على المشاهد الهزليه اللي شفتها في الجزيره والمحور و دريم وكذا قناه تانيه على الاستفتاء

المشهد الاول

المذيع : ايه رأيك في الدستور

المواطن : تمام اوي وجميل

المذيع : تعرف حاجه عن اي بند في الدستور

المواطن : لا

المذيع : ايه اللي مش عاجبك فيه

المواطن : كله جميل

المذيع : يعني هتقول ايوه ؟

المواطن : طبعا

المذيع : طيب ما انت مش عارفه هتوافق عليه ليه؟

المواطن : عشان ابقى مع الشعب

المشهد التاني

المذيع : هتوافقي على التغير ولا لأ ؟

المواطنه : اكيد هوافق

المذيع : ليه؟

المواطنه : عشان الحكومه تعرف ان احنا معاها فترخص الاسعار

شفتو الذل اللي الناس الغلابه وصلتلو

المشهد الثالث

المذيع لطالبة جامعه باين عليها كل علامات الردح المتعارفه دوليا بدايه باللبانه ونهايه بالايشارب اللي متزحلق لنص دماغها : هتوافقي على الدستور ؟

الطالبه : على حسب انا فاضيه ولا لأ

المذيع : طيب لو كنتي فاضيه

الطالبه : هروح انا وصاحباتي ونقول ايوه طبعا

المذيع : ليه؟

الطالبه : عشان بحب مصر

المشهد الرابع

المذيع لطالب جامعي هو واصحابه كانو لسه ضاربين سجارتين بانجو : هتشارك في الاستفتاء لتعديل الدستور؟

الطالب : دستور ايه؟

يقوم واحد صاحبه يضربه على دماغه ويضحك ويقوله دستور مصر يا ابني

الطالب : لا عشان مشاركوناش فيه من الاول

المشهد الخامس

المذيع : هتوافق على الدستور ؟

المواطن : طبعا طبعا طبعا

المذيع : ليه

المواطن : عشان نلغي بقا زوار الفجر

العبيط مش عارف انهم هينورونا في كل وقت احتمال يباتو

المهم في الاستفتاء ده الناس انقسمت 4 انواع

الاول : معارض ورافض ومرحش الاستفتاء من الاساس ودي في رأيي الشخصي سلبيه مميته

الثاني : مش فاهم اي حاجه فأي حته وملوش في اي حاجه فمراحش

الثالث : مأجور او عبيط فراح ووافق

الرابع : انا من الصنف ده وده بقا الصنف اللي عارف ان مفيش احسن من لبن الام وبما ان مصر ام الدنيا وانا من الدنيا تبقى مصر هي امي نيلها هو دمي شمسها في سماري حتى لوني قمحي لون نيلك يا مصر و ماما اكيد هتخاف على مصلحتي يبقى لازم اوافق

ملحوظه : انا بهزر طبعا موافقتش

واحب في الاخر اسمع الاغنيه الرائعه العنب العنب العنب

وحشتونا يا اهل شرم الشيخ

مش عارف ليه الواحد بيحارب عشان يضايق نفسه , بجد تعبنا بكل ما تعنيه الكلمه عشان اختى تتجوز و بعد ما اتجوزت كلنا قاعدين مضايقيين انها مش في البيت

بدور عليها في كل ركن في البيت

بدور عليها في كل تفصيله

بفتكرها في كل اكله كانت بتحبها

بستناها كل يوم الساعه خمسه وربع ترن الباب وترجع من شغلها

بجد على قد ما انا مبسوط انها اتجوزت على قد ما انا زعلان انها مش في البيت

المهم ........

الهانم اتجوزت و اعلنت رسميا موت الشاب وائل , اعتقد انا اخر مره هحس فيها اني شاب صغير هي اللحظه اللي كانت قبل ما اقعد قدام العالم الكله وانا وكيل العروسه

بعيدا عن الكأبه

الفرح كان جميل بكل معنى جميل , اول مره اشوف المعازيم اصحاب فرح , اعتقد انه من المستحيل ان حد يعرف مين كان بيعزم ومين كان معزوم

اصحابي...... كانو اكتر من جمال , بجد كنت بشوف في عنيهم فرحه غريبه من طراز فريد مشفتهوش قبل كده في حد فيهم, كانو بيتكلمو بعنيهم كلام في منتهى البلاغه وهما ساكتيين , اول مره اشوفهم كده , اول مره اشوفهم بيرقصو عملو كل حاجه في الفرح بجد شالو الفرح على اكتافهم

اهلي وعلى رأسهم خالو طه واولاد عمي....... كانو بيزغرطو بقلوبهم اقسم بالله كنت سامع صوت زغاريطهم

ماما ..... صعب اوي ان الكلام يوفيها حقها بس اللي اعرف اقوله اني عارف ليه الجنه تحت اقدام الامهات بسبب الست دي

بابا ..... اولا مبروك يا عم احمد والله يسامحك على اللي انت عملته فيه , المهم بابا كان موجود في كل حته في الفرح

في الدايره واحنا بنرقص , في الكرسي اللي محدش شايفه في كتب الكتاب , في البوفيه كان بيعزم على الناس حتى في الزفه كان واقف

انا بجد بستغرب هي ليه الناس مكنتش شايفاه؟؟؟؟؟

بجد انا بحسد الراجل ده . هو عارف يشوف الناس اللي بتوحشه وهو واحش الناس كلها ومحدش عارف يشوفه

في الاخر لازم اقول اني معملتش حاجات كتير صح في حياتي بس اللي لازم اعترف بيه ان جواز البنت دي كان من اهم نجاحات حياتي, و اختياري لأصحابي كان من اكبر الحاجات الصح اللي في حياتي , وموضوع انا عايش فيه دلوقتي و بحارب علشانه و ان شاء الله ربنا يوفقني فيه برده من اهم مواضيع حياتي ان لم يكن اهمها على الاطلاق ولو نجحت فيه هيبقى اكبر نجاح شخصي لكل حياتي

على العموم

مبروووووووووووووووووووك يا ياسمين ويا محمد وربنا يوفقكو في حياتكو يا رب

يبقى انت اكيد اكيد في مصر

قالو يقرفو الشعب المصري شويه عشان لازم يثور بقا شويه

اجتمعو وكان القرار يغلوا الاسعار

مفيش فايده

اجتمعوا تاني وكان القرار يزودوا الضرايب

بردو مفيش فايده

قالوا مابدهاش احنا نوقف ظابط على اخر كل كوبري يضرب كل واحد معدي على قفاه

وفعلا حصل كده

نزلو عشان يشوفو رد الفعل على كوبري الجامعه

لقو زحمه جامده اوي والناس مش قادره تتحرك

وفجأه

طلع واحد بيزعق جامد وثاير وبأعلى صوتو راح قايل

مش ممكن كده احنا بني ادميين , وقفو اتنين يضربو عشان ورانا مشاغل

ملحوظه

هو ده شعبنا اللذيذ المسالم والله يرحمك يا عم سعد مفيش فايده