Wednesday, November 19, 2008

الحمد لله

في لحظه من اللحظات التي يتوقف عندها العقل تماما عن التفكير في كل شيء صغير تتجسد امامك عظمه الخالق تنفرد وحدها بنظرك بروحك تمتلكك تسافر بك الى افاق بعيده الي سماء من الصفاء ومن العشق تصمت تماما لتتحدث روحك تتذكر كم كنت ضائع تتذكر ذنوبك تشخص امامك عيوبك وفي قمة تلك اللحظه يضيء لك ذلك المصباح تجهل اتجاه الضوء ولكنك تعرف تماما مصدره تتذكر رحمته تتضائل خطاياك امام رحمته تتعاظم ثقتك في رحمته تتذكر جبروته تتذكر قسوه انتقامه فيشع الضوء اكثر ليمحو الرهبه ويسكن الهدوء في جميع ارجاء روحك تؤثر الصمت تعود للتذكر خطاياك فيعود ليذكرك برحمته لتتشبع روحك بها تنسى كل شيء وتظل تلك اللحظه كبريق من الامل يدفعك ان تكمل وتتذكر دائما انه هو من قال واذا سألك عبادي عني فأني قريب اجيب دعوة الداعي اذا دعاني
لا يسعك في تلك اللحظه الا ترفع يدك اليه شاكرا اياه على انه منحك تلك اللحظه وعلى انه لم يخذلك كما خذلته

Thursday, July 17, 2008

مدرستي نظيفه ..... لطيفه ..... متطوره


انا وبلا فخر خريج مدرسة الاورمان الثانويه بنين التي تقبع في شارع الدقي مش عارف طبعا ايه اللي فكرني بالموضوع بس قلت احكيه عشان افتكرته امبارح مع انه حصل من 8 سنين
مدرسة الاورمان عباره عن مدرسه ضخمه عباره عن اربع مباني وتحتوي المدرسه على 26 فصل اولى ثانوي
و 25 تانيه ثانوي وزيهم تالته ثانوي
المبنى الاول يحتوي على فصول الفائقين ودول صفوة المدرسه وقدام المبني ده حوش لوحده صغير المفروض يلعب فيه فرافير المدرسه اللي هما الفائقين اللي كنت انا منهم يفضل 3 مباني قدامهم حوش ضخم مش مبالغه قد استاد القاهره اخر مبنى في التلاته دول يطلق عليه مبني العزبه يوضع فيه كل طالب يتوسم فيه انه هيطلع تاجر مخدرات او تاجر سلاح اعلا هذا المبنى يقبع طالب او اكتر يطلق عليهم النادورجيه الطالبين دول وظيفتهم انهم يطلقو عبارات الانذار والاشارات الضوئيه لتجار المخدرات اللي جوه المبنى عشان لو حصل كبسه او المدير قرر يعمل حملة تفتيش
ده بالظبط الجو العام للمدرسه
القصه بقا انه في يوم من الايام والشمس مشرقه والعصافير تغرد على مدرستي الغناء قررت ام وبنتها انهم يسألو على ابنهم في المدرسه اللطيفه بتاعتي ودخلو من باب المدرسه الرئيسي اللي هو في وش الحوش الضخم وعشان الجو العام يكتمل تزامن وصولهم مع الفسحه وده معناه ان الحوش كان يوجد فيه مالايقل عن 3000 طالب ودي مش مبالغه والله المهم بدأت الام والابنه - اللي كانت لابسه تي شيرت منغير كوم يعني تي شيرت كت كما يقول الفرنجه – يشقو طريقهم في اتجاه مبنى العزبه عشان يوصلو للولد يسألو عليه وفي هذه اللحظه وقف النادورجي عشان اصبح في حركه غير متزنه في حوش المدرسه بسبب البنت دي المهم عشان المسافه طويله النادورجي تردد في اطلاق اشارته الضوئيه والسمعيه واخد خطوتين لقدام على سطح المبنى عشان يتأكد من الللي هو شايفه
المهم بعد ما قطعت البنت نص المسافه وبقت شبح صعب رؤيته بالنسبه للنادورجي اصبح الولد بيضرب اخماش في اسداس ومش عارف هل اوهامه وضلالاته ورغباته تهيء ليه اشياء ولا لا وبما ان الولد بيتعامل باحترافيه رفض يطلق اي انذار لانه يثق تماما في سرعة المعلمين اللي جوه المدرسه في انهم يخبو البضاعه وبردو ما اطلقش اي انذار
المهم اصبحت البنت قريبه جدا من مبنى العزبه وتأكد الولد من اللي هو شايفه وهنا نسى الولد كل ما تعلمه من تجار المخدرات اصحابه واطلق التبيه الصوتي وكان :
مزززززززززززززززززززززززززززززززززززززززززززززه في المدرسه
طبعا بالرغم من الدوشه الرهيبه اللي كانت في الحوش الا ان صوت الولد هز جنبات المدرسه وفي لحظه انطلق كل طالب في الحوش الى البنت وامها وبعد ثانيه اتخطفت البنت واصبحت محاطه بحوالي 1000 طالب في مظاهره شعبيه طلابيه
وفي لحظه ظهر في الافق من بعيد استاذ سعد و استاذ حاتم
سعد ده لسانه اشد وساخه من الهباب الاسود اللي بيسفلتو بيه الشارع اما بقا حاتم فده راجل معترف بأن اسهل طريقه للنقاش هي الضرب يعني الاتنين مع بعض يشكلو شخص سافل متكامل المواصفات
المهم هجم الشخصين دول على المظاهره الشعبيه الطلابيه الخيريه وفي اقل من 15 ثانيه كانو واصليين للبنت واخدوها من وسط المظاهره او اخدو ما تبقى منها من وسط المظاهره واتجهو بيها مسرعين عند مدير المدرسه
اللطيف في الموضوع ان البنت خرجت ومافيش اي جزء من هدومها متقطع البنت خرجت سليمه تماما وده معناه ان ال 1000 طالب اللي كانو حواليها كانو مستمتعين جدا برسم خيالات في دماغم يعني كل واحد مغمض عينه وماسك اي جزء من زميله اللي واقف قدامه وقاعد في خيالاته يبني اوهام واحلام انه ماسك جزء من البنت وطبعا هو كده في منتهى الانسجام والسعاده
معرفش لحد النهارده البنت حصل فيها ايه بعد كده ومعرفش اخوها عمل ايه ومعرفش حتى امها كانت فين في وسط المظاهره دي
المهم تاني يوم ظهر في وسط الطابور مدير المدرسه الوقور شعبان بيه مشهور وفضل يكيل لينا الشتايم واحده تلو الاخرى ومن يومها واصبح ثابت في وجبة المدرسه قطعة حلاوه مصنعه غالبا مخصوصه لمدرستنا وقطعه الحلاوه دي مغرقينها زيت كافور و اصبحت مدرستنا في مصاف المدارس المتطوره المتحضره

Tuesday, July 8, 2008

اطول يوم في عمري


امبارح كان من اطول ايام حياتي
هبدأ من اول اليوم تماما . صحيت الصبح وانا قاعد لوحدي في البيت وقررت افطر بعدين لقيت انه مجهود على الفاضي فقلت بلاش فطار و اذاكر كلمتين حمضانين على غير العاده وبعدها بشويه قلت اتغدا بقا ويلا مجهود يضيع بقا مش فارقه ودخلت المطبخ والحمد لله اتشويت من الزيت عشان ماشاء الله عليه وعلى ذكائي حطيت البطاطس في الزيت وهي خارجه من الفريزر ومليانه تلج بس بردو اقول ما علينا هنا بقا انتهت الفقره الصباحيه

تبدأ الفقره الثانيه بأني قمت لبست البدله عشان عندي فرح ابن عمي وتوجهت الي ميدان الجيزه عشان اركب السي تي ايه ( الاتوبيس المكيف ) الحمد لله وصلت وركبت الاتوبيس وقررت من جوايا اني مش ناوي اخد ذنوب النهارده عشان السي تي ايه بيبقى فيه بلاوي عشان كده حطيت جاكت البدله في الكرسي اللي جنبي وقلت هيعد جنبي راجل وراجل وحش كمان وقد كان قعد جنبي راجل ما استحماش من حوالي قرن المهم قلت ما علينا اهو كله بثوابه وبدأت اعمل منهمكا في كتاب كان معايا عشان يضيع الوقت عشان المشوار طويل عشان الفرح في جسر السويس المهم بعد حوالي نص ساعه برفع عيني لقيت قدامي جسم وجسم معناه جسم يعني مش هدوم تحتيها جسم انا اقصد جسم يعني واحده ضهرها كله باين طبعا انا قلت انا هحافظ على وعدي مع نفسي ومش هبص اهي النظره الاولى ليك وربنا كبير بردو انه اداني نظره زي دي ومش باصص تاني
المهم لفيت رقبتي لقيت خير اللهم اجعله خير بنت لابسه شورت والله العظيم شورت طبعا انا كنت قربت اعيط والله من هول الصدمه واني يعني خلاص لازم ابقى محترم المهم رجعت دماغي للكتاب ومارفعتهاش غير في المحطه اللي هنزل فيها وهنا تنتهي الفقره التانيه

تبدأ الفقره التالته وياعيني ياعيني على الفقره التالته
وصلت الفرح والعريس والعروسه لسه ماوصلوش وفجأه تدخل بنت شكلها مكنش مطمني من الاول والحمد لله كان عندي حق بس بردو ماعلينا قلت ماليش دعوه
المهم وصل ابن عمي وبدأ الفرح والزفه والزغاريط والناس بدأت ترقص وانا بردو مش ناوي ابص انا راجل دكتور ومحترم
المهم الترابيزه اللي كنت قاعد عليها انا واخواتي وماما دخلت علينا واحده نزلت بوس في الناس اللي قاعده ومنهم ماما وفجأه سألتها فين ابنك انا قلت قشطه دي مثلا واحده عارفاني وماشفتنيش من زمان وعايزه تتعرف طبعا دخلت بلباقه وماما فرجتها عليه و اعتقد كان ممكن تقول لماما طيب ممكن تخليه يتشقلب على اساس بقا اني كبرت المهم بردو ماعلينا وماعلينا انها غالبا اول مره تشوفيني في حياتها وماعلينا اني بردو ما اعرفش هي مين لحد دلوقتي ووالله مش عايز اعرف المهم راحت الست اللي مش عارفها قالتلي انا جايبالك عروسه وبصراحه كان واقف ورا الست دي بنت غالبا معرفتش ان في فرح غير قبلها بخمس دقايق وكانت بتستحمى واستعجلوها فمكملتش لبسها وجت يعني اعتقد انها نسيت تلبس اي حاجه فوق الهدوم الداخليه بغض النظر انا سمعت كلمة جايبالك عروسه وشفت البنت دي وراها قلت فل اوي انا هنحرف بقا واخد بقا ذنوب من اللي توزن في ميزان السيئات دي واتعرف عليها اصل بصراحه انا مش سيدنا يوسف والمغريات بقت اكبر من شاب غلبان في حالاتي رحت بمنتهى العبط قلتها فين العروسه وطبعا فاتح بؤي من اول ودني اليمين لحد ودني الشمال ومستنيها تقولي اهي ورايا اقوم اخدها بالحضن وانسى بقا امي والمعازيم بس هيهات راحت قالت يا دنيا يا دنيا المهم لقيت شبح من بعيد جاي جري والحمد لله لما تحققت لقيتها بنت اموره ايوه بس عندها 10 سنين يعني حتى الانحراف مابقاش نافع طبعا انهارت احلامي وطموحاتي وسبتلهم الترابيزه ورحت في الدايره الموجود فيها الكثير والكثير من الرجاله اللي بيهزو وسطهم اجدع من الاخت الفاضله فيفي عبده ولكن يأبى القدر انه يسيبني في حالي وتهجم في وسط الدايره البنت اللي كانت في اول الفرح مش مطمناني وايه اديلو ادي قعدت ترقص بس ماشاء الله صحتها مساعداها وبردو قلت ياواد بلاش ذنوب كفايه عليك اتفرجت شويه كفايه كده
رجعت اتلقحت على الترابيزه وسبحان الله يأبى القدر للمره العاشره على التوالي اني اكون محترم وتنتقل دايره الرقص على بعد ربع متر من الترابيزه وسبحان الله اني الاقي راجل بيرقص في وسطيهم بس هيهات هيهات كلهم بنات وتتزعمهم البنت اللي كانت مش مريحاني
المهم بعد ما الناس كلهم في الفرح ضمنو اني اخد ذنوب تكفيني عشر سنين قدام انتهى الفرح والحمد لله لا بقيت دكتور ولا بقيت محترم وهنا تنتهي الفقره التالته

تبدأ الفقره الرابعه واحنا مروحين ركبت تاكسي انا واخواتي وامي والحمد لله بعد مانزلو وروحتهم لبيت اختي وانا كنت مروح البيت راح سواق التاكسي حب يضيفلي معلومه وقالي دول قرايبك ؟ قلتلو امي واخوتي راح قالي اصلهم صعبين اوي في التعامل والحمد لله كان القشه التي قسمت ظهر البعير طلعت غلبي كله فيه وخرسته لحد لما نزلت وهنا تنتهي الفقره الرابعه

في الاخر بقا انا قررت قراري النهائي انا مش هعمل فرح ولو عملته هعمله على بسين والصبح ومنغير العروسه كمان عشان وجع الدماغ
حسبي الله ونعم الوكيل في اللي اخترع البدل واللي اخترع فكرة الافراح واللي سولت له نفسه يغني اغاني هابطه بنت كلب زي اللي سمعتها امبارح

Saturday, June 28, 2008

اخيرا يا مفتري


اخويا الكبير امبارح خطب اخيرا كان يوم حلو اوي مكنش قارف اهلي في اليوم غير بتاع الدي جي اللي مش عارف احدد هو راجل ولا ست ولا كائن وسطي لحد دلوقتي بس المهم ان حوده اخيرا خطب

الف الف مليوووووووووووووووووووووووووووووووون مبروك يا حوده باشا عقبال الجواز

Wednesday, June 4, 2008

وجاري البحث عن انثى


غالبا والله اعلم تم فرض شروط اداريه للاتحاق بدفعه كلية طب قصر العيني للعام الدراسي 2002 وكانت كالاتي

يجب على الملتحق ان يكون ذكر وعلى اي انثى او اي ذكر يحس بداخله بأنوثه او اي انثى ممكن في اي يوم من الايام تحس انها انثى الامتناع عن التقديم عشان هتتقفش هتتقفش

يجب على الملتحق ان يتمتع بغباء اجتماعي غير قابل للتصحيح او على الاقل ما يوازيه من جليطه وقلة ذوق او من الاخر يكون بيعرف ينهق

يجب على الملتحق ان يقر ويعترف انه بيحب اسعد باشا الظابط اللي لسه معداش 25 سنه ومسؤول عن امن الكليه ويكون بيحلم بيه ويرسمله بورتيريه سبعه متر في سبعه متر يوضح فيها مكنونات حبه الدفينه لاسعد

يجب على الملتحق ان يرفق مع طلب الاتحاق اي شهادات طبيه تفيد بأنه سبق له الاكتئاب او دخول اي مصحه نفسيه او يكتب اقرار على نفسه يفيد بأنه يرغب في الانتحار او سبق له الانتحار ويفضل لو محاولات انتحاره نجحت مش عايزين وجع دماغ

يجب على الملتحق ان يكون جبله ومش بيأثر فيه الشتيمه ويفضل اللي بيحب يتشتم

على الملتحق تصديق اي دكتور اهبل بيقول كلام اهبل وبطريقه هبله ولا يناقشه بأي طريقه هبله او حتى مش هبله

يستثنى من جميع الشروط السابقه اولاد الدكاتره واولاد اللوائات واولاد امناء الشرطه

الملتحق الذي لايفهم اي شرط من الشروط السابقه يبقى اكيد غبى ومش بيفهم واهلا به في صرح العلم والتعليم اهلا به في القصر العيني

احكي كام حكايه كده بقا على الهنا اللي انا عايش فيه
(1)
احنا بناخد غيابنا في ورقه وبنسلم الورقه للسكرتيره وده الطبيعي المهم في احد الايام اخدنا الغياب بس الظاهر ان الكلام ده معجبش بنت – في البطاقه بس – المهم هجمت علينا البت دي وقالت لصاحبي بصوت جاعوري مش هناخد غياب النهارده راح الواد بطيبة قبله قالها طيب والورقه دي اوديها فين راحت البت بمنتهى الثقه قالتله : عارف الورقه دي تحطها فين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
طبعا احنا انهارنا صاحبنا هيتشتم شتيمه يعيش بيها لحد لما يموت
المهم البت راحت ساكته كده وقالتله الورقه دي تحطها في الدرج بس بعد ايه هي خلاص وصلتلنا ان لو عملنا ورقه بالمنظر ده تاني منغير ما نستأذن هتعمل فينا ايه

(2)
التليف الكبدي بيعمل عند الرجاله تضخم في الصدر بسبب اضطرابات هرمونيه وعشان نفرق بين ان الصدر كبر بسبب التليف او بس من ترهلات بنلاقي جزء في الحلمه ناشف شويه اسمه ديسك المهم المعلومه الحمضانه دي قالها الدكتور بس بالانجليزي طبعا و كان العيان نايم قدامه على السرير ورافع هدومه وصدره كله باين
المهم فجأه ودون سابق انذار لقينا ايد انثويه بتتمد على صدر العيان وبتقرصه من صدره
سبحان الله العيان صدم وسبحان الله الدكتور صدم وسبحان الله انا صدمت وسبحان الله راحت البت مدت ايدها وماسكاله الصدر التاني
العيان كمل باقي الدرس مغطي جسمه ومقلق لحسن البت تمسكه من اي حته تانيه والدكتور فضل يشرح وهو بيحلق
على العيان لحسن واحد يقوم يعضه او يلطشه بالقلم

(3)
اول مره يعلمونا رسم القلب الدكتور جاب جهاز وقال ممكن ولد يتطوع ونريكو الجهاز بيتحط ازاي طبعا كلنا رفضنا راحت بنت رفعت ايدها وقالت يادكتور خرج الولاد واعملو عليا انا ؟
طبعا الدكتور بعد ما فاق من الصدمه قالها ممكن سؤال ؟ هو الناس دي رجاله وانا مش راجل؟
طبعا البت عشان تشله راحت قايلاله : لا هما ولاد انت دكتور
اصل الناس بينقسموا الى رجاله وستات ودكاتره
حسبي الله ونعم الوكيل في اللي كان السبب

Monday, April 28, 2008

مولد بطل



في ليله من ليالي التاريخ المضيئه التي يشهد لها التاريخ ظهر هذا المولود في يوم الاربعاء الموافق الاول من مايو لعام 1985و هنا انعقدت لجنه من حكماء وامراء واولي الامر ليجعلو هذا التاريخ مناسبه وطنيه ولكن ظهر احد الحكماء وقال ان مثل تلك الفعله ستستفز الشعب لانها تنم عن عدم المساواه حتى تفتق ذهن احد الحكماء واقترح ان يسموه عيد العمال ولكنه في الاصل احتفاليه بمولد المبدع


وائل احمد حسن


ملحوظه


جميع المعلومات عن البطل موجوده في كتاب المبدعين مش فاكر صفحه كام بس موجوده ان شاء الله


المهم بقا انا اتم يوم الخميس الجاي ان شاء الله 23سنه وبما اني حققت كل طموحاتي المستقبليه عندي فيلتي في العجمي والعربيه الجاجور بتاعتي ومصروفي خمسميت الف جنيه في الشهر فأحب اذكر بعض اللمحات التاريخيه عن طفولتي واحكي شوية قصص عن طفولة البطل


زمان لما كان عندي حوالي عشر سنين اتخانقت انا واختي ولجل حظي الهباب ابويا شهد المعركه وبصراحه بابا مكنش بيضربني كتير يعني ممكن في حياتو كلها ضربني اقل من خمس مرات بس الحمد لله ماما قامت بالواجب وزياده المهم بعد ما بابا شاف المعركه قرر انه يتفاهم معايا انا واختى نقاش حضاري نتج عنه الام مبرحه في ضهري ووشي وبعض الكدمات في اجزاء مختلفه من جسمي


المهم دخلت انا واختى الاوضه واتصالحنا بس اختي الله يكرمها قالت انها عايزه تشوف شكلنا واحنا بنتخانق بيبقى عامل ازاي وانا بعبطي وافقتها ووقفنا قدام مرايا في الاوضه ومثلنا ان احنا بنتخانق وخير اللهم اجعله خير دخل بابا تاني والحمد لله المره دي تناقش معانا نقاش حضاري اكثر حضاره من اللي قبله


المهم في يوم تاني مش فاكر جننت ماما ازاي بس المهم ماما قررت توجب معايا وانا قررت اجري في الشقه وتبقى تطولني بقا المهم بما ان ماما اخدت اوليمبيات الامهات في حدف الشبب لمسافات طويله على ابنها اللي هو انا قامت رمتني بالشبب في نفس اللحظه اللى تزامنت مع اني كنت بلف ضهري عشان ادرس احداثيات موقع ماما عشان اقرر اتجاه الاوضه اللي هجري ليها والحمد لله الشبب اصابني اصابه مباشره في جبهتي تماما بس انا درستها بسرعه في عقلي وقلت لو كملت جري ماما مش هتتوقف عن الجري وهتجيبني هتجيبني فبسرعه رحت مصوت وقلت عيني اااااااااااااااه المهم حنان الام اشتغل طبعا وجتلي في ايه يااني وياحبيبي وبصراحه ضميري الميت قالي ياجدع استموت فيها دي فيها كام علقه مش هضربهم مهما عملت المهم شلت ايدي من على عيني ونزلت جفني وبهدوء قلتلها مش عارف افتح عيني طبعا ماما انهارت وانا قلت خلاص مافيش حاجه على اساس اني الابن المحترم الهادي وفضلت قافل عيني ساعه ولا حاجه وفلت من علقه وممكن اكون مضربتش اسبوع قدام


قصه تانيه

في يوم دخلت الاوضه بتاعتي وكان في كيس مناديل ضخم وضخم بمعني كلمة ضخم والحمد لله كأي طفل بيلعب بالكبريت رحت مولع في المناديل وهنا احب افتكر معلومه علميه مش هنساها طول عمري ان اسرع حاجه بتولع في الدنيا هي المناديل المهم انا قلت اعمل ايه اروح كطفل مجاهد واقول لماما وبابا اني ولعت في اوضه النوم ولا اطفى الحريقه اللي عمري ما هعرف اطفيها؟


هنا اصبح الاختيار صعب جدا اموت محروق ولا اموت من الضرب فقلت هي موته بموته فموت موتة ربنا واموت محروق اسهل رحت قافل الباب وانتظرت مصيري بس الحمد لله ريحة الحريقه وصلت لبابا وماما في اوضه المعيشه وانقذوني من موت محقق بس طلعو طيبين ومحدش عملي اي حاجه او ممكن اكون ضربوني علقه افقدتني الذاكره ونستني اصلا اني اضربت


كفايه بقا حكاوي عشان كده بقت فضايح مش حكاوي




Tuesday, April 1, 2008

نظره مستقبليه




التتر : موسيقى ايدي في ايدك تنتهي بظهور البطل بيقول : انا وائل في بكالريوس طب عندي23 سنه تعاطفك لوحده مش كفايه ثم بعض النحيب................ ينتهي التتر




موسيقة المال و البنون تيت تيت تيت وقالو زمان دنيا دنيه غروره........ وحتى اخرها تتلاشى الموسيقى تدريجيا ثم تدخل الكاميرا بهدوء على ايدين كهل عجوز لا تحتوي اي دبله تدل انه متجوز او حتى اتجوز طول حياته ثم الكدر يوسع يبان وش البطل حواليه مجموعه من الاطفال وهو بيكح ويقولهم هحكيلكو حكاية الشاطر وائل


الكهل : صلو على النبي


يحكى انه في قديم الزمان كان في واحد اسمه الشاطر وائل لما كبر الشاطر وائل قرر انه ناوي يكمل نص دينه ويتجوز ثم يضحك الكهل ضحكه خبيثه ويقولهم عارفين ايه اهم حاجه في الجواز؟


الاطفال في نفس واحد : العروسه


الكهل : كنت عارف انكو هتقولو كدا مش المهم العروسه المهم الشقه وده اللي عرفه الشاطر وئل بعد محاولات نجحت كلها بدليل انه مش خاطب ولا مرتبط اصلا


المهم ياولاد بدأ الشاطر وائل يدور على الشقه و واجه في التدوير المضني بتاعه الكهربائي محمود الحرامي والسمسار محسن والتنين ابو راسين


الاطفال : احكيلنا


الكادر يوسع تاني والكهل بينظر الى الفراغ ويبدأ يحكي ويتذكر منظر الشاطر وائل


راح الشاطر وائل لشارع اسمه زغلول اخر شارع في شارع الهرم يعني ممكن تنط من البلكونه تقع فوق الهرم رأسا المهم شاف الشاطر وائل شقه مساحتها حلوه و بخمسه وتمانين الف جنيه وعشان الشاطر وائل قليط شويتين رفضها بس كان الشاطر احمد ربيع مع الشاطر وائل و اقنعه انها حلوه وتنفع وفعلا وافق الشاطر وائل وراح يدفع العربون للكهربائي محمود اللي كان وسيط في البيع


المهم الشاطر وائل سأل عم محمود هو انا ليه حق في الارض يعني لو العماره وقعت ليه حق؟


عم محمود بضحكه في منتهى الغباوه : لا طبعا بعدين صلي على النبي دي العماره حديد


الشاطر وائل وهو كاتم مشاعره : مش هينفع كلم اصحاب البيت ورد عليه


بعدها بيومين


عم محمود : ابسط ياشاطر وائل ضحكت عليهم ونزلت عشر تلاف


يعني يا فرحتي ادفع وبعد نص ساعه يجيب قرار ازاله وابقى في الشارع


رفض الشاطر وائل محاولات عم محمود انه يسرقو


وانتظر الشاطر وائل والحمد لله وبعد طول انتظار الحديد بقا ب 6100


يعني الشقه اللي كانت بخمس تلاف بقت بنص مليون جنيه


انهارت جميع احلام الشاطر وائل وراح يدور في منطقه في الطلبيه فيصل اسمها كفر طهرمس اي والله كفر طهرمس وكان معاه سمسار اسمه ايه ياولاد


الاطفال : محسن


الكهل : صح ياولاد


محسن ده اخد الشاطر وائل ووراه شوية شقق ولكن بما ان الشاطر وائل راجل براوي رفض عشان المنطقه فيها حميميه مستحيل تلاقيها في اي حته وحاول الشاطر وائل يوازنها بس بردو منفعش


الاولاد : يعني اي حميميه زياده ؟


الكهل : يعني اقرب مسافه بينك وبين جارك نص متر طبعا مش الشقه اللي جنبك قصدي الشقه اللي في العماره اللي قدامك


الاولاد : و وازنها ازاي ؟


الكهل : حسبها ان في ميزه ان ممكن لو المدام بتاعته المنشر عندها خلص ممكن تنشر عند الجيران بس العيب انهم ممكن بردو يسرقو الغسيل


وبردو ممكن لو الشاطر وائل كان نايم والغطا اترفع من عليه ممكن بنت الجيران تشب شويه وتغطيه بدل ماياخد برد بس بردو ممكن بنت الجيران تبقى عكروته وشقيه وتلاقيه متغطي تروح كشفاه


عشان كده بردو رفض الشاطر وائل


الاولاد : طيب وعمل ايه الشاطر وائل ؟


الكامير بتدخل على وش الكهل العجوز كلوس جامد على عنيه المليانين دموع صمت لمدة ثواني صوت المزيكا يعلا تاني وتنهيده طويله من الكهل : ولا حاجه ياولاد اهو مرمي قدامكو وبيحكيلكو قصتو




موسيقى الخاتمه : صوت اجش لشخص يحاول تقليد عبد الحليم وقاعد يغني رااااااااااااح راااااااااااح رااااااااااااح

Tuesday, March 25, 2008

رؤوف باشا


جو شديد الحراره زحمه ملهاش حل و ميكروباص سيده زينب اصوات متداخله بولاااااق امبابه على سيده على منيب على سب دين من سواق الميكروباص المتمركز على ايدي الشمال يفصل بيني وبينه فتيس الميكروباص الشيك اللي قاعد انا والبيه و عدد من الاشخاص المنتهكين الكرامه بسبب الجري والسحوله ورا الميكروباص

المهم في عز المعمعه دي ظهر ميكروباص سيده تاني وحاول يركب ناس تانيه وبلا اي مقدمات نزل سواق الميكروباص اللي انا قاعد فيه واطرب السواق التانيه بوابل من الشتيمه المتناغمه مع الكثير من الاصوات المتناغمه من توافق عضلي عصبي بين مناخيره وبؤه عشان السواق التاني غلط وركب ناس قبل التاني ما العربيه بتاعته تكمل

المهم في ظل الجو المشحون ظهر شخصيه قام الموقف كله على رجل واحده تبجيلا للاخ المبجل اللي وصل للموقف الجميل ان الشخص ده كان امين شرطه ارجع واقول ماعلينا

ركب الباشا جنبي بقا على يميني الباشا وعلى شمالي السواق وانطلق الميكروباص لرحلة الاهوال اللي هتنتهي بيه في مستشفى الباطنه عشان ابدأ يومي المظفر

في وسط الطريق دفعت الاجره والسواق قالي انها هتغلى تاني او رابع ان صح التعبير وانا قولتله يخرب بيت كده البلد دي عايزه مننا ايه يعني ننيل ايه نولع في نفسنا عشان الحكومه ترتاح المهم في ظل الرغي ده كان الباشا راكب على يميني والسواق قاعد يقرص على ايدي لحسن الباشا يزعل ارجع واقول ماعلينا

عند تمثال نهضة مصر لقيت السواق حط الفلوس في جيبه وطبعا الباشا المتلقح على يميني مدفعش وانا بما اني لساني بيصعب عليها يقعد في التجويف بتاع بؤي رحت قلت للباشا بهدوء ممتزج بوقاحه : هو البيه مش ناوي يدفع؟

راح السواق اللي كان بيبدع من سب دين على اب على ام راح بمنتهى الوداعه قالي خلاص اجرته وصلت

قلتله وصلت امتى ؟؟؟؟ انا مش قاعد وشايف

قالي خلاص بقا

كل ده والباشا ساكت

راح السواق الوديع قالي : خلاص بقا مش هتفرف

اكتشفت ان السواق مش هياخد اي موقف وبقا الحل الوحيد هو اني اقرف الباشا

رحت لافف وش اهلي للباشا وقلتله لو مش معاك فلوس انا ممكن ادفعلك

الباشا : انا معايا ادفع لنفسي ووللميكروباص بتاعك كله

انا(بضحكه متهكمه ) : طيب بلاش الميكروباص ادفع لنفسك بس

الباشا : وانت مالك

السواق الوديع : اطلع منها يا بيه

انا : مش طالع منها ولو مدفعش يبقى رجعلى الاجرة بتاعتي هو مش احسن مني

الباشا : متتلم بدل مبهدلك انت فراد قلوعك ليه ؟

انا : تبهدل مين ؟ انت فاكر نفسك بني ادم ده انت امين شرطه ؟

واحد من الميكروباص وبصوت جهوري واجش جميل : انت اللي بتتكلم معاه ده دكتور يا ابن الوسخه كلمه عدل ده انت امين ابن تييييييييييت ( معلش كانت كلمه صعب اني اذكرها عشان وسعة اوي من الراجل )

هنا الباشا راح شادد شخره اقسم بالله ما سمعتش زيها في حياتي كملها : انت بتشتم مين ؟

الراجل اللي ورا : بشتمك يا ابن الوسخه

صوت صفير قوي جدا ناتج من فرامل الميكروباص انا بفتح الباب وبزق الامين بره العربيه الباب اللي ورا بيتفتح الراجل بينزل الخناقه اتنقلت للشارع انا بزعق انت هتبهدل مين يا بتاع انت؟

الراجل اللي كان ورا : بتاع مين يا دكتور ده تقوله يا ابن الوسخه

الامين مع شخره اقوى من الاولى : انا ابن وسخه طيب والله لاطلع ميتين امك

الراجل : تطلع ميتين مين يا ابن الوسخه

الشارع اتلم علينا عند اخر كوبري الجامعه

الراجل بيطلع موبايله ويجري اتصال بسرعه والامين بيشتم والراجل متوقف تماما عن الرد ثم بهدوء مايطلعش غير من شخص واثق تماما من امكانياته : الو رؤوف بيه معاك يا باشا انا عند اخر كوبري الجامعه وهتأخر عشان في امين شرطه قدامي ابن وسخه مفكر نفسه بني ادم ابعتلي اي حد من عندك يا باشا عشان اعرفه مقامه

المشهد دلوقتي : الشتيمه وقفت الامين ساكت انا مبتسم ابتسامه بلهاء في وش الامين معناها هيطلع ميتينك يا حلو الشخص المدعو رؤوف لسه بيتكلم السواق منتشي كأنه بيقول مدفعتش الاجره وهيطلع ميتينك بخمسه وستين قرش

المهم رؤوف بيقفل الخط وفي مشهد سينمائي جميل الامين بيقول : انا اسف اللي مايعرفك يجهلك بس حضرتك شتمت على طول ومقلتش اي حاجه

رؤوف( باشا بقا) : اديك هتعرفني يا ابن الوسخه

الامين: خلاص ياباشا

رؤوف : خلاص غور في داهيه

المشهد بعد التغيير : الامين مركبش تاني ومشي انا راكب جنبي رؤوف باشا الناس ركبت الميكروباص انطلق السواق بيدندن

انا : شكرا يا استاذ رؤوف

رؤوف : انت من الاصل اتدخلت ليه؟

انا : عادي اصلي مش بحب الاستقطاع بتاع الحكومه يا استاذ رؤوف وسكت بعدين قلتله هو حضرتك وكيل نيابه ؟

رؤوف : اشمعنى وكيل نيابه؟

انا :عشان سن حضرتك صغير

رؤوف بضحكه عاليه جدا : بطل تقولي يا رؤوف وراح مطلع محفظته ومديني كارنيه بصيت فيه لقيت صورته مكتوب جنبها احمد خالد مصطفى بصيتله وعنيه هتخرج راح ضاحك وقالي : اه احمد نايب اطفال في ابو الريش بس بزمتك ما انفعش باشا؟

ضحكت بصوت عالي جدا وشاركني الضحك ونزلت عند مستشفى الباطنه وانا بضحك وهو بيغمزلي


Sunday, March 2, 2008

virginity

اخر احصائيه سمعتها ان في 14مليون شاب وشابه مصريه غير متزوجين . رقم في تخيلي الشخصي مهول عشان الرقم ده من العدد الكلي يبقى نسبه مهوله . المهم اكيد الرقم ده بيمثل حاله اقتصاديه عامه بس على ما اظن ان مش ده السبب الاساسي هو ده نتيجه طبيعيه لفكر عام سائد انا مش فاهمه يعني بمعني ان في مطالب غير محسوبه بيطلبها اهل البنت بمسميات غير معروفه او معروفه وغير مفهومه .طلبات الهدف منها المنظره او المقارنه يعني نظام بنتي مش اقل من اي حد مهي بنت فلان جابولها تلاجه خمسميت قدم وشقه ميت اوضه

انا في رأيي الشخصي المتواضع ان الجواز عباره عن صفقه كبيره تتحمل عقبتها في المستقبل فلو افترضنا فعليا انها صفقه يبقى لازم يبقى فيها مقومات منها رأس المال بس لازم يبقى فيها مقومات كتير اللي هي في الجواز الشخصيه العامه للزوج او الزوجه والتوافق يعني لو كان رأس المال هو الاساس يبقى اي شخص يمتلك مال هيعمل مشروع بالتبعيه ناجح بس ده في العالم الواقعي غير حاصل . المشكله ان النظره الشموليه لاهل البنت تحديدا مش بتبقى بالجوده المفروضه فبيحصل لبس قوي في الاختيار تحت مسمى انهم بيأمنو مستقبل البنت و تظل البنت في حالة انتظار دائم للموافقه من الاهل على صاحب رأس المال وممكن ترفضه لو كان الشخص لايناسبها فكريا ولا في الطبع العام بس بيظل التفكير في المناسبه الفكريه والطبع والصفات موضوع يطلق عليه في مصر ( اهو كله بيجي بالعشره ) فغالبا الاختيار بيبقى مغلوط الا في من رحم ربي . الولد بشكل عام وبصراحه من كتر البلاوي اللي بيشوفها من الكثير والكثير من البنات بيوصل لمرحلة من فقدان الثقه في البنات فبيتجسد ادامه حديث الرسول عليه الصلاة والسلام وهو ( تنكح المرأه لأربع : لمالها، ولحسبها، ولجمالها، ولدينها، فاظفر بذات الدين تربت يداك ) وهنا بيتجه الولد ( العاقل ) للاختيار الانسب وهو تربت يداك فبيبقى المقام الاول عنده انها هتصون بيته مع الاخذ في الاعتبار برده انها تبقى مقبوله المنظر بالنسبه للولد تحت مظلة ان الجمال نسبي ( من رحمة ربنا انه جعل الجمال نسبي في عيون الرجاله ) وهنا غالبا بيكون الاختيار بدري جدا يعني في سن صغير ( ودي المشكله ) وانا اقصد بالسن الصغير 23 او 24 وبيكون اساس الاختيار هو انه يصون نفسه وهنا بيواجه المشكله اللي بدأت بالكلام عنها وهي ان الاختيار في الناحيه التانيه بينسى او بالاصح بيتناسا قول الرسول عليه الصلاة والسلام :( من جاءكم ترضون إيمانه وخلقه فزوجوه،فإن لم تفعلوا تكن فتنة ) وبيتذكرو وبقوه قول البيوت المصريه ( من جاءكم ترضون شهادته و ماله فزوجوه ) وبما ان الرسول عليه الصلاة والسلام مابيقلش حاجه غلط فبشكل طبيعي بتتحقق الفتنه و بيصاب الولد الغلبان بالصدمه وبياخد احد القرارين يا اما يكتئب او ياخد القارا التاني الا وهو ما البنات على قفا من يشيل انا اصاحب وابقى اتجوز لما ربنا يحلها او حتى اصاحب ليه يلعن ابو معرفة البنات مالهم الولاد مهم زي الفل لحد اما اجهز نفسي وادخل كبير وطبعا بشكل عادي ومنطقي لابعد الحدود بتكون النتيجه ان عدد الشباب والشابات اللي مش متجوزين في مصر هو 14 مليون عشان المطالب اكبر من القدره العامه لاي شاب والاختيار يغفل تماما الدين و القدره على تحمل المسؤوليه اللي هي بالعرف الكلمه المنطوقه وغير مفهومه او غير متبعه وهي : احنا بنشتري راجل

انا لا اقصد والله بكلامي ان المشكله في البنات بس لكن فعليا المشكله الاكبر عند البنات او اهل البنات بمعنى اوضح وهذا لا ينفي ان في ولاد مافيش في دماغهم اي حاجه زي ما في بنات وكتير بردو يمتلكو عقليه ناضجه ومحترمه بس المشكله ان مشروع الجواز مكون من اربع اطراف عيلتين وفردين واصعب شي في العالم هو التوفيق بين اربع اطراف بيحاول كل منهم ربح معركه غير موجوده من الاصل ويمكن ان تكون اتفاقيه لكن للاسف الفكر العام بيحولها لمعركه

Monday, February 11, 2008

ربح الدنيا والاخره


انا بتفرج على كوه من سنة 1993 يعني من وانا عندي 8 سنين عمري ما كنت من النوع الي ممكن يجري ورا لاعب او يغرم بشخصيته ويتمنى يبقى ليه صاحب او صديق من هذا النوع انا افتكر اني كنت في وسط اصحابي وهما كل واحد بيشبه نفسه بروماريو وبيبيتو وواحد طول شعره وادعى انه كده بقى شبه روبيرتو بادجيو ومع ذلك مكنتش بيجذب انتباهي كده كنت بس ببقى مبسوط اني فاهم في الكوره

النهارده ولأول مره احس اني معجب بشخصية لاعب بطريقه ملهاش حل لاعب ماشاء الله خرج من اطار الكوره بقى عباره عن رمز بفتكر دايما كلمه لوالدتي وهي بتقول لما ربنا بيحب حد بيرمي حبه في قلوب الناس

الشخص ده يبقى محمد محمد محمد ابوتريكه

شخصيه اقرب الى التابعيين والصحابه رمز محترم للانسان المسلم يكفي ان النهارده اتصلو بيه بعد الماتش وبيقولولو مبسوط يا ابو تريكه

رد رد مايردوش غير واحد الدنيا اخر همه قال : ادخال السعاده على قلوب الاخرين شيء نؤجر عليه عشان كده انا مبسوط

بعدها بثانيه سأله هادي خشبه انت ايه اول خاطره جت قدامك اول ما جبت الجون

قال بمنتهى التلقائيه : شفت قدامي منظر جبل عرفه

شخص خلاص بجد تذوق حلاوة الايمان خرج من اطار الكوره دخل بجد في عالم تاني عالم روحاني غير اللي احنا عايشين فيه

افتكرله بعض المواقف :

في ماتش كان بين اصدقاء رونالدو واصدقاء زين الدين زيدان بعد ما اتلعب الماتش عملو حفله واكتشف ان فيها خمره فرفض النزول من مكان السكن الا في معاد الطياره

موقفه لما قلع التي شيرت وكان تحت التي شيرت مكتوب تعاطفا مع غزه

في النهائي من سنتين رفع التي شيرت وكان تحته نحن فداك يا رسول الله

بعد فوز الاهلي على الصفاقسي جاله هدايه من ضمنها 6 مليون جنيه شك في مصدرهم فاتبرع بيهم كلهم

في ماتش الاهلى والاسماعيلي اغمى عليه عشان اداره النادي رفضت انه يحج في السنه دي

في احلى لحظاته وهو بيجيب جون بينزل يسجد لحد لما غانا في اخر ماتش بعد هدفهم الاول الفرقه كلها نزلت تسجد بدون وعي هو ايه معنى الحركه

ماشاء الله على هذا الشخص بجد مثل يحتذى بيه في السيطره على النفس ورفض شهوات الحياه

اعتقد ان محمد محمد محمد ابو تريكه عينه جديده من الناس وجدت في الشعب المصري عشان تغير جواه وتعلمه ان الدين هو اقصر وافضل سبيل للدنيا والاخره

ملحوظه صغيره :

حاولت احط الصوره بتاعته وهو لابس تي شيرت تعاطفا مع غزه او نحن فداك يا رسول الله بس سبحان الله الصوره اختفت تماما من جوجل واكيد لهذا معنى

Sunday, January 27, 2008

هو بس يدعي


بحاول اتوخى الادب بس مش قادر انا هحكي الموقف بعدين هبدأ اقل ادبي

في البرنامج بتاع تحليل المبارايات بتاع شوبير على القناه التانيه وبين الشوطين راح شوبير قال استنو بعد المباراه هقول مفاجئه طبعا انا بهبل اهلي كنت مستني المفاجأه وبعد الماتش راح قايل المفاجأه

وكانت

ان الريس اتصل بالمنتخب المصري بين الشوطين وبعد المباراه

انا كنت هنهار من السعاده وهول الصدمه

المهم بعدها بشويه راح قايل التعليق الخالد اللي هيظل مدى الدهر اعتقد وكان ان احنا كسبنا بدعاء المصريين ثم سكت وراح مكمل وقال وكسبنا طبعا بدعاء سيادة الرئيس

اصل ولا مؤاخذه الشعب ده ابن كلب دعائه مش مستجاب بس الريس حاجه كبيره اوي كده وماشاء الله دعائه كده طريقه سالك لربنا مستجاب

ابدأ بقا اقل ادبي

اللي عمله شوبير ده اسمه تقرين وليها لفظ ابيح مش عايز اقوله عشان ميصحش
بجد الراجل فقعلي مرارتي في التعليق الاول ومش هكمل ايه اللي حصل في التعليق التاني عشان برده ميصحش

Wednesday, January 9, 2008

فاصل للدهشه

الموت.....
كان فيما مضى سيدا مهذبا...
كان اكثر رحمه و تعقل لا يأخد الا العجائز والمرضى ومن لا نعرفهم لا يأتي الا ليلا يتسلل دون ازعاج يسحب الروح من صاحبها اثناء نومه ولم يكن ليهين احدا ابدا حتى لو اخطأفي موعده او الشخص المناسب كان يترك مبررا يجعلنا نتفهمه ونتقبله بعد ساعه غضب واحده
الان
تخلى الموت عن ادبه صار يصادفنا في الشوراع بأي وقت يتعمد اهانتنا حتى انه تنازل عن كبريائه , اعتداده بنفسه سمح لنا ان نستخدمه ضد بعضنا البعض في صور قبيحه ... مثل ... تجويع ... تعذيب ... قهر
صار الموت يتعند ان يأخذ من نعرفهم تحديدا
يأتي في موعد غير مناسب لشخص غير مناسب بطريقه غير مناسبه لا يترك لنا اي مبرر لنتقبله
ببساطه صار الموت الطيب انسان شرير
________________
تخيل نفسك جنديا مهزوما تجلس وحيدا في قعر حفره ضيقه مظلمه باخر الدنيا اصابعك متجمده على بندقيتك البارده, نفذ طعامك وماؤك منذ ايام , رائحه جثث زملائك المتعفنين تعبىء انفك وفمك
هل يبقى لك شيء في العالم ؟؟؟؟؟
يبقى لك شيء؟؟؟؟
ستسأل نفسك اين الرب ؟؟؟
ربما تقول ليس تمة رب موجود
تقول ذلك لمره ... مرتين ... ساعه ... ساعتين ... ثم تبكي... تبكي... تبكي معتذرا
لأنك وحيد ... ضعيف ... ناقص
ستعرف انك محتاج للرب... وجود هذا الرب
لم يبق منك ولك في العالم غير الايمان
في اللحظه التي تفقد فيها ايمانك ستتأكد في قلبك وضميرك انك محتاج لهذا الايمان... انه لابد من وجود رب لك ولهذا العالم... ستحتاج لمن ينقذك قبل سقوطك في اخر العالم هل تتوقع لنفسك غير الرب؟؟
الخوف هو دليل وجود الرب... لان احساس الانسان المزمن بالنقص والضعف والاحتياج يؤكد وجود هذا الوجود
انت تحتاج لمن يمتلك قوة الكمال وكمال القوه
سترتعب من احساس الخوف , المرض, الوحده , الفقر, القهر , الموت , الالم , وغيرها وحوش اخرى تحتاج من يتخطى بك كل هذا ... كل هذا ليسس له سبيل سوى الرب
الله ليس لك سواه
انت بضعفك واحتياجك وخوفك ستبحث لك عن اله ... لابد ان يكون لك اله
المسأله تتلخص فيما تختاره اله لك
ان تختار اله يليق بك كأنسان ليده عقل وتمييز
ايمانك بوجود الله هو فقط القادر ان يخرجك من حفرتك المظلمه الضيقه يحفظ وجودك و يحمي روحك من التمزق
ان لم تدرك الرب داخلك
ان لم تر الله بنفسك ... فلن تراه ابدا
انظر لنفسك بسكينه ومحبه و طمأنينه سترى الله
________________
هل عشت يوما تللك اللحظه التي تحس فيها انك ترى العالم من مكان بجوار الرب ؟؟
اللحظه التي تفاجئك فلا تعرف متى تزورك, وتشكر الرب لأنه يمنحها لك ويختارك لها, فأنت تعرف انها حتما لا تمنح لكثيرين , لحظه هي رغم بؤس العالم فانها تأتيك كنسمه تعرف طريقها بين اشجار ووحوش الغابه , تصلك لتهبط على قلبك بسلام ... سلام وطمأنينه كاملين تامين
تضع في كفك قطره من الشجن الشفيف و السعاده النبيله
لحظه لن تصلها بألف صلاه
يختارك الرب لها
ويعدل شيئا في قلبك لتراه... تراه بوضوح ,يمد يده الحنون يثبت العالم امام عينيك قليلا قليلا , ويقول لك بابتسامه طيبه : تأمل ... تأمل
فتسقط من كتفيك كل العالم
كل ثقل العالم
يصير كل شيء من الخفه كأنه بلا وزن, ترتاح قليلا من الاسئله
يتحول العالم الى سجاده ماء تمشي عليها حتى تصل نبع التور , تدرك عمق وسهولة العالم , كأن يمنحك نفسه ويكشف لك روحه ,كأنك اول انسان يضعه الله على الارض بعدما فرغ حالا من ابداع السماوات والارضين والماء
تحس انك نقى بلا دنس
تتصالح مع روحك , تتسامح مع العالم والموجودات , ترى العالم رغم قسوته وبؤسه محتملا , ومكانا صالحا للحياة ... لانك تستحقهما معا العالم والحياة
انت تريد ان تبقى هنا في تلك اللحظه , لكنك تعرف انها ستغادرك بعد قليل , فتترك نفسك لها لتفعل بك ما تفعله الملائكه بأرواح الطيبين
تحس بيد الرب تربت قلبك بسماح , فتعرف كم هو يحبك
تعرف كم يحبك الله
فتبتسم له ... لله ... وتؤمن ... تؤمن ... تؤمن ... وترتاح
________________
الاجزاء اللي فاتت كلها للكاتب محمد عبد الرحمن الفخراني من كتاب فاصل للدهشه مقدرتش اقاوم نفسي من اني اكتبها هنا عشان استوقفتني بشده

Tuesday, January 1, 2008

طالب طب


هتعمل ايه في رأس السنه؟
هذاكر باطنه