Thursday, July 17, 2008

مدرستي نظيفه ..... لطيفه ..... متطوره


انا وبلا فخر خريج مدرسة الاورمان الثانويه بنين التي تقبع في شارع الدقي مش عارف طبعا ايه اللي فكرني بالموضوع بس قلت احكيه عشان افتكرته امبارح مع انه حصل من 8 سنين
مدرسة الاورمان عباره عن مدرسه ضخمه عباره عن اربع مباني وتحتوي المدرسه على 26 فصل اولى ثانوي
و 25 تانيه ثانوي وزيهم تالته ثانوي
المبنى الاول يحتوي على فصول الفائقين ودول صفوة المدرسه وقدام المبني ده حوش لوحده صغير المفروض يلعب فيه فرافير المدرسه اللي هما الفائقين اللي كنت انا منهم يفضل 3 مباني قدامهم حوش ضخم مش مبالغه قد استاد القاهره اخر مبنى في التلاته دول يطلق عليه مبني العزبه يوضع فيه كل طالب يتوسم فيه انه هيطلع تاجر مخدرات او تاجر سلاح اعلا هذا المبنى يقبع طالب او اكتر يطلق عليهم النادورجيه الطالبين دول وظيفتهم انهم يطلقو عبارات الانذار والاشارات الضوئيه لتجار المخدرات اللي جوه المبنى عشان لو حصل كبسه او المدير قرر يعمل حملة تفتيش
ده بالظبط الجو العام للمدرسه
القصه بقا انه في يوم من الايام والشمس مشرقه والعصافير تغرد على مدرستي الغناء قررت ام وبنتها انهم يسألو على ابنهم في المدرسه اللطيفه بتاعتي ودخلو من باب المدرسه الرئيسي اللي هو في وش الحوش الضخم وعشان الجو العام يكتمل تزامن وصولهم مع الفسحه وده معناه ان الحوش كان يوجد فيه مالايقل عن 3000 طالب ودي مش مبالغه والله المهم بدأت الام والابنه - اللي كانت لابسه تي شيرت منغير كوم يعني تي شيرت كت كما يقول الفرنجه – يشقو طريقهم في اتجاه مبنى العزبه عشان يوصلو للولد يسألو عليه وفي هذه اللحظه وقف النادورجي عشان اصبح في حركه غير متزنه في حوش المدرسه بسبب البنت دي المهم عشان المسافه طويله النادورجي تردد في اطلاق اشارته الضوئيه والسمعيه واخد خطوتين لقدام على سطح المبنى عشان يتأكد من الللي هو شايفه
المهم بعد ما قطعت البنت نص المسافه وبقت شبح صعب رؤيته بالنسبه للنادورجي اصبح الولد بيضرب اخماش في اسداس ومش عارف هل اوهامه وضلالاته ورغباته تهيء ليه اشياء ولا لا وبما ان الولد بيتعامل باحترافيه رفض يطلق اي انذار لانه يثق تماما في سرعة المعلمين اللي جوه المدرسه في انهم يخبو البضاعه وبردو ما اطلقش اي انذار
المهم اصبحت البنت قريبه جدا من مبنى العزبه وتأكد الولد من اللي هو شايفه وهنا نسى الولد كل ما تعلمه من تجار المخدرات اصحابه واطلق التبيه الصوتي وكان :
مزززززززززززززززززززززززززززززززززززززززززززززه في المدرسه
طبعا بالرغم من الدوشه الرهيبه اللي كانت في الحوش الا ان صوت الولد هز جنبات المدرسه وفي لحظه انطلق كل طالب في الحوش الى البنت وامها وبعد ثانيه اتخطفت البنت واصبحت محاطه بحوالي 1000 طالب في مظاهره شعبيه طلابيه
وفي لحظه ظهر في الافق من بعيد استاذ سعد و استاذ حاتم
سعد ده لسانه اشد وساخه من الهباب الاسود اللي بيسفلتو بيه الشارع اما بقا حاتم فده راجل معترف بأن اسهل طريقه للنقاش هي الضرب يعني الاتنين مع بعض يشكلو شخص سافل متكامل المواصفات
المهم هجم الشخصين دول على المظاهره الشعبيه الطلابيه الخيريه وفي اقل من 15 ثانيه كانو واصليين للبنت واخدوها من وسط المظاهره او اخدو ما تبقى منها من وسط المظاهره واتجهو بيها مسرعين عند مدير المدرسه
اللطيف في الموضوع ان البنت خرجت ومافيش اي جزء من هدومها متقطع البنت خرجت سليمه تماما وده معناه ان ال 1000 طالب اللي كانو حواليها كانو مستمتعين جدا برسم خيالات في دماغم يعني كل واحد مغمض عينه وماسك اي جزء من زميله اللي واقف قدامه وقاعد في خيالاته يبني اوهام واحلام انه ماسك جزء من البنت وطبعا هو كده في منتهى الانسجام والسعاده
معرفش لحد النهارده البنت حصل فيها ايه بعد كده ومعرفش اخوها عمل ايه ومعرفش حتى امها كانت فين في وسط المظاهره دي
المهم تاني يوم ظهر في وسط الطابور مدير المدرسه الوقور شعبان بيه مشهور وفضل يكيل لينا الشتايم واحده تلو الاخرى ومن يومها واصبح ثابت في وجبة المدرسه قطعة حلاوه مصنعه غالبا مخصوصه لمدرستنا وقطعه الحلاوه دي مغرقينها زيت كافور و اصبحت مدرستنا في مصاف المدارس المتطوره المتحضره

34 comments:

أحمد هشام said...

بجد بوست ظريف ... أنا بحب الحكايات اللي زي دي .. .. بوست دمه خفيف ...
وحصل موقف زي بالضبط في المدرسة أيام الثانوي بس كان الكلام ده أيام امتحانات الثانوية العامة ... البنات المنازل امتحنوا في مدرسة البنين ... و طبعا أول يوم في بنت اتدمرت بجد ... حوالي ألفين طالب ملتفين حوااليها في الشارع ... والناس اللي ماشية في الشارع مش عارفين هو في ايه .. والبنت أغمي عليها ... وكان يوم ...

yas said...

وائل
ايه النشاط ده كله تتحسد
تخيل ان حصل عندنا موقف مشابه فى مدرستنا ومكنش واحد اللى عامل الزيارة لا بنت والبنات اللى فى المدرسة زفوها لانها كانت محتشمة فى لبسها زيادة عن اللزوم
طبعا بمان انك عارف انى ذكية زيادة عن اللزوم انا مش فاهمة اخر جزء من اول مامدير المدرسة اعقد يكيل لكم الشتائم الكلام اللى بعد كده مش فهماه فهموهولى
سلام

Anonymous said...

شديد يا معلم
افتكر اننا كنا اصيع والبداية مش فى ثانوى لا فى اعدادى وكان عندنا مدرسة علوم وكانت امورة وصغننة اعتقد 25 سنة وطبعا حظها المنيل وقعها فى مدرسة مراهقين حوش زينا والاسوا انها كانت بتلبس مينى جيب غالبا ويوم ما تكون حشمة تديها بديهات وبجد كانت جامدة كان العيال يشوفوها فى الحوش يروحوا يشوطوا الكورة ناحيتها ويخبطوها او يكعبلوها (قال اية صدفة) وطبعا الهانم بتقع على الارض تشششش وافهم الباقى باة يا ناصح
بجد عياااال فاقدة

ahmed_k said...

زيت كافور
زي اللي بيدوه لعساكر الجيش هههههه
بس الواضح من البوستات السابقه ان مفعوله راح

Unknown said...

علي فكرة أنا خريج نفس المدرسة المهببة دي، في سنة اولي كنت في فصول المتفوقين (مش الفائقين)، وكنت باخاف أعدي من قدام مبني العزبة ده، بعد كده قضيت سنة تانية كلها فيه.

المهم حصل قدامي موقف مشابه، وانا شايف الموضوع مش ظريف خالص، دي كارثة بكل المقاييس، وده دليل إن التحرشات الجنسية اللي حصلت في وسط البلد ليلة العيد ماكانتش وليدة اللحظة، دي تراكمات من سنين، وواضح من التعليقات إن فيه نماذج مصغرة ليه في أماكن كتيرة.

كلام وخلاص said...

انت كنت فين ساعتها؟؟

yas said...

انا خلاص فهمت ياوائل
انا كل يوم بثبتلك انى غبية صح
بس كمان انا مفهمتش لوحدى ده الكومنت بتاع الاخ احمد هو اللى نور بصيرتى

yoyo said...

هههههههههههه مشكلة والله الظاهر ان الجيل دا كله عالم فاقدة ولسعة والله
بس انت كنت فين يا كبير ايه كنت لقدر الله واقف بعيد ولا ايه وبراءة الاطفال فى عينيك ولا ايه هههههههههههههه يالا مش هاتكلم بقى عندنا ولاية يا بنى وربنا امر بالستر بقى
سلام يا كبير
يويو

Anonymous said...

s3
bgad mwtny mn edde7k
bas 3ayza a2olk en el7al delwa2ty ba2a aswa2 melyon marra ana ba2et asm3 kalam 3an elmadars a2ol el7amdolelah en elwa7ed 7'arag badre abl mayshof el7agat de ra3'm eny kont fakra en santna kant asw2 sana
bas walahy enta la tt7'ayl ana b7zan ad a lamma bsma3 en 3'albyt eshabab elayamde ba2o kda ya3ny bos fsol elmotfawqen 3addhom ad a welba2e ad a bgad de 7aga tday2 we nafs ennezam gam3t elqahera ( asde el7aram nafso) bgad ma3a ele3tzar lkol elmo7tarmen elle felgam3a ella en ennesba el3'alba bgad eddetne entba3 en mosta2bal masr lo kan 3ala ed eshabab dol bnafs el3aqlia yde yb2a 3alih el3awd
yalla rabna yostorha

WhItE HeArT said...

هههههههههههههه

هتموتني من الضحك في كل بوست بالراحه علينا ياعم

لا بجد تحفه وده يدل ان اغلب الشباب في مصر وبالذات الثانوية في عندهم عقده واصبح همجيين ومبيقدروش يتحكمو في شهواتهم




تحياتي

جنّي said...

إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said

maYHam said...

باشا .... بتفكرني باللي حصل عندنا في مدرستنا بس مع معمة اللغة الفرنسية وهي كانت شايفة نفسها شوية

حصتين واتنقلت قبل ما تتطور الأمور


لكن موضوع الزيت الكافور دا هو الجديد ... كنت فاكره مقتصر على المدن الجماعية بس

Desert cat said...

انا عارفه موضوع تقسيمات مبانى المدرسة ده من طارق عبدالرؤف اصله واخد الثانوية منها برضه
بس مش دخل طب للاسف ضل طريقه وانحرف ودخل شرطة
شكله كان مع بتوع تجار المخدرات

صباح الصباح said...

اية يا عم الموضوع؟؟ واضح ان زيت الكافور اللى انتا جبتة طلع مغشوش والبوستات شكلها هتولع بس اوعا تتقفش
البوست جميل جدا بس المهم اعقل يا وائل وبلاش تهور وماتتفرجش على هيفا كتيير

wanna b a physician said...

يابنى بطل بقا
ههههههههههههههههههههههههههههههههههههههههههههههههههههههههههههه

Unknown said...

هههههههههههههههههه
البوست جميل اوي
مدرسه دي ولا ايه
بتطلع جيل متعلم ولا قطاعين طرق مع ان انت شكلك هادي و مش كده خالص

تحياتي

Bosssssy said...

يااااااااااااااه 25 فصل حته واحده دى مدرستنا كلها على بعضها كانت مبنى واحد , كنا 6 فصول فى اولى ثانوى وفى سنه تانيه بقينا 2 علمى و 4 ادبى , وكمان كانت مشتركة .

وكانت مدرستنا بردو زى مدرستكم كده ههههههههههه نظيفه وجميله ومتطورة.

د/اجدع بنوته said...

ماشاء الله

ده ايه دى الاداره

اللى قادره تتحكم ف العدد ده م الاولاد

لازم طبعا يبقوا مساتر م الاخر

واكيد مدرستكم النظيفه والجميله والمتطوره

مكنش فيها لا مسز ولا مسات

ههههههههههههههههههه

تقريبا بتمتحن انت الايام دى

ربنا يقويك يارب

doctor mohamad said...

إزيك يا دوك .. سؤال: هو إنت بتتكلم عن مدرستكم بس؟ و لا عن مصر كلها ؟؟ .. و ده حوش المدرسة و لا وسط البلد؟؟ .. أنا أرى .. إن .. >يتلفت حولة ثم يهمس< .. إن مصر كلها صارت نظيفة و لطيفة و متطورة .. ماقلتليش .. إمتحاناتك إمتى؟

shaimaa samir said...

السلام عليكم ورحمة الله وبركاته

يشرفنى دعوتكم لحضور حفل توقيع ديوانى الاول
اطياف الصمت

وذلك فى الثانى من شهر اغسطس
يوم السبت القادم باذن الله
الساعة 7
بمكتبة طلعت حرب


يشرفنى حضوركم جدااااا

FaceMoon said...

ههههههه ضحكتنى بوست دمة خفيف خالص
ليك عندى تاج لو فاضى جاوب مش فاضى سيبك منة خالص مستنين البوست اللى جاى
تحياتى

Mona Shereif said...

والله انا بتمنى انى ارجع للمرحله دى تانى
او بالادق انى ارجع لايام مكنتش فاهمه حاجه فى اى حاجه
ربنا يهدينا

كلام وخلاص said...

طبعا يا دكتور انت بتمتحن دلوقتى ربنا يعينكم ويقدركم وتعدى الامتحانات على خير وكل سنة وانت طيب بمناسبة الشهر المبارك
سلام

جنّي said...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

Unknown said...

مرور للتهنئة بقدوم شهر رمضان وتمنياتى بان ننال منه الكثير ...لا تدع الفرصة تفوتك باغتنام هذا الشهر الذى فضله الله على باقى الشهور
ودعواتى لكم جميعا بقبول اعمالكم وعباداتكم وان نكون مع الرسول ان شاء الله ..سعيد بزيارتى ومرورى والى لقاء قريب لك كل التحية والتقدير

Bosssssy said...

فينك يادكتور وائل من زمان ..

يارب يكون غيابك ده سببه خير وكل سنه وانت طيب ......

ياريت تبقى تطمنا عليك

طنط بوسي

ahmed_k said...

كل عام وأنتم بخير

رمضان كريم

جنّي said...

السلام عليكم


تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

جنّي said...

السلام عليكم ورحمة الله وبركاته

عيدكم مبارك

تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر

كل عام وأنتي منصورة يا أمتي

أخوكم
سعيد

د/اجدع بنوته said...

kol sana w enta tayb

3eidk s3eeed

مطرح ما ترسى....دقلها said...

hi Wael

how r u man ??

i'm sorry i just doing my duty now and passing IM exams

hope u r right and doing best


by the way u r a fantastic author


c u soon my friend

kariemi

مطرح ما ترسى....دقلها said...

انا اسف كتبت التعليق اللى فات بالانجليزى ولسة واخد بالى وانا بقراه


تحياتى يا زعيم

:P

berooo said...

رائع البوست دا بجد
عجبني اوي وفكرني باسلوب مدرسة المشاغبين

علي عبد الله said...

ادخلي على الرابط ده

http://deshna.ahlamontada.net/forum.htm

هتلاقي دشناوية كتيير جدا
يسعدهم التعرف عليكي