وحشتنا يا تامر يا حسني

زمان لما كنت لسه عيل في ابتدائي كان لما يجي مشهد في فيلم عربي محترم البطل بيبوس البطله او اي شيء من هذا القبيل كان بابا وماما يودو وشهم الناحيه التانيه وانا اعمل فيها عبيط وابص ومليش دعوة بحاجه وساعتها اسمعلي كلمتين في اجنابي من ان ده حرام وكلام كبير من ده

المهم , كبرت واتعودت لما يبقى في مشهد من المشاهد دي اودي وشي الناحية التانيه بدل ما حد من العائله الكريمه يودهولي بقلم على خلقتي وكمان عشان انا عارف ان ده حرام

مرت سنين كتير لحد ما من كام يوم اكتشفت ان بابا وماما طلعو بيضحكو عليه والمشاهد دي عاديه و عادي اني اشوفها

طبعا السؤال هيبقا انا على اي اساس عرفت ان ده عادي ؟

الاجابه بكل بساطه لما شفت الفيديو كليب الاخراني بتاع تامر حسني- رضي الله عنه وارضاه واسكنه فسيح جناته - الكليب ده متصور من كواليس فيلمه الاخراني اللي اسمه عمر وسلمى

قد ايه اتبسط من الجوي الاخوي الجميل والبسيط في الكواليس وتامر عمال يبوس كل اخواته الفنانات المحترمات زي ميس حمدان ومي عز الدين . لا كمان الاجمل ان الجوي الاخوي بيمتد حتى للكومبارس واصحاب الادوار الثانويه لقيتهم بردو بيبوسو مي عز الدين وميس حمدان ماشاء الله عليهم ده كمان كان الكومبارس الغلابه عاملين دايره وميس ومي بيرقصو فيها. اكتشفت ان في الكواليس مفيش فرق بين الابطال واصحاب الادوار الثانويه شيء جميل وتواضع فظيع ده حتى في مشهد جميل وبريء وتامر حسني - مع الاعتذار لرفع الالقاب - وهو بيهزر مع مي عز الدين وكان هيضربها على مؤخرتها بجد شيء بديع وجميل وبساطه واخوه لازم تبقى موجوده في كل بيت مصري

هنا كنت لازم اسأل نفسي سؤال ازاي وصلو للجمال ده ؟

لقيت الاجابه كانت سهله اوي بس كانت غايبه عن ذهني الاجابه كانت لازم يبقى في قائد محترم بيجمع بينهم ولقيته الفنان الرائع صاحب اروع افلام السينما المصريه زي حاحا وتفاحه لقيته المبدع السبكي - مع الاعتذار لرفع الالقاب تاني - بجد جميل

بعد الكليب الجميل ده عرفت اني مش لازم اصدق كلام الكبار اللي بيضللونا عشان اي بوسه في اي فيلم بتبقى بوسه في سياق القصه للفيلم غير انها حتى لو مش في سياق الفيلم فهي من اخ عزيز لاخت عزيزه

بجد كفايه ظلم بقا لازم نحط كل حاجه في نطاقها الصح

الله يسامحك يا بابا انت وماما منعتوني من اني اشوف بوس كتير وضيعتو مني قصة الافلام المبدعه وربنا يخليك يا تامر - مع الاعتذار كمان مره لرفع الالقاب - عشان فهمتني الحياة صح وزرعت جوايا معنى جديد وجميل هو الاخوه في افلام السبكي