الحمد لله الدستور اتغير وكل حاجه بقت عال العال
مش عارف ليه بفتكر كان في مذيع مره بيسأل دكتور مجدي يعقوب انت مصر بالنسبه ليك فين ؟ وبمنتهى الثقه رد الدكتور وقال : مصر بالنسبة ليه في الخلايا
اعتقد دلوقتي لو اتسأل نفس السؤال هيبقى اكتر رد ممكن يرده انها بالكتير في افريقيا
المهم نسيبنا من الهبل ده كله واتكلم في صلب الموضوع
انا بكتب الموضوع ده مخصوص عشان اقول على المشاهد الهزليه اللي شفتها في الجزيره والمحور و دريم وكذا قناه تانيه على الاستفتاء
المشهد الاول
المذيع : ايه رأيك في الدستور
المواطن : تمام اوي وجميل
المذيع : تعرف حاجه عن اي بند في الدستور
المواطن : لا
المذيع : ايه اللي مش عاجبك فيه
المواطن : كله جميل
المذيع : يعني هتقول ايوه ؟
المواطن : طبعا
المذيع : طيب ما انت مش عارفه هتوافق عليه ليه؟
المواطن : عشان ابقى مع الشعب
المشهد التاني
المذيع : هتوافقي على التغير ولا لأ ؟
المواطنه : اكيد هوافق
المذيع : ليه؟
المواطنه : عشان الحكومه تعرف ان احنا معاها فترخص الاسعار
شفتو الذل اللي الناس الغلابه وصلتلو
المشهد الثالث
المذيع لطالبة جامعه باين عليها كل علامات الردح المتعارفه دوليا بدايه باللبانه ونهايه بالايشارب اللي متزحلق لنص دماغها : هتوافقي على الدستور ؟
الطالبه : على حسب انا فاضيه ولا لأ
المذيع : طيب لو كنتي فاضيه
الطالبه : هروح انا وصاحباتي ونقول ايوه طبعا
المذيع : ليه؟
الطالبه : عشان بحب مصر
المشهد الرابع
المذيع لطالب جامعي هو واصحابه كانو لسه ضاربين سجارتين بانجو : هتشارك في الاستفتاء لتعديل الدستور؟
الطالب : دستور ايه؟
يقوم واحد صاحبه يضربه على دماغه ويضحك ويقوله دستور مصر يا ابني
الطالب : لا عشان مشاركوناش فيه من الاول
المشهد الخامس
المذيع : هتوافق على الدستور ؟
المواطن : طبعا طبعا طبعا
المذيع : ليه
المواطن : عشان نلغي بقا زوار الفجر
العبيط مش عارف انهم هينورونا في كل وقت احتمال يباتو
المهم في الاستفتاء ده الناس انقسمت 4 انواع
الاول : معارض ورافض ومرحش الاستفتاء من الاساس ودي في رأيي الشخصي سلبيه مميته
الثاني : مش فاهم اي حاجه فأي حته وملوش في اي حاجه فمراحش
الثالث : مأجور او عبيط فراح ووافق
الرابع : انا من الصنف ده وده بقا الصنف اللي عارف ان مفيش احسن من لبن الام وبما ان مصر ام الدنيا وانا من الدنيا تبقى مصر هي امي نيلها هو دمي شمسها في سماري حتى لوني قمحي لون نيلك يا مصر و ماما اكيد هتخاف على مصلحتي يبقى لازم اوافق
ملحوظه : انا بهزر طبعا موافقتش
واحب في الاخر اسمع الاغنيه الرائعه العنب العنب العنب
7 comments:
يا ابني التعديل جميل
هبقى اجيبلك عيش وحلاوه
وائل انا من هذا المزنق احب اقول ياعيني على الام وحنان الام لا خال ولا عم بيشيل الهم
وعاشت مصر حره مستقله
فاكر التعليق بتاعي في موضوع يبقى انت اكيد اكيد في مصر
احب اقوله تاني
تحيا مصر
تحيا مصر
تحيا مصر
الرئيس في كلمة بمناسبة إعلان نتيجة الاستفتاء:
مبارك: الشعب هو الفائز الحقيقي
.. ومصر تبدأ مرحلة جديدة من العمل السياسي
نتيجة الاستفتاء جاءت تعبيرا عن تمسك المصريين بالمستقبل
الديمقراطية لا تتحقق بالنصوص وحدها
وإنما بتوسيع المشاركة السياسية
اللجنة العليا للانتخابات: 75,9 % قالوا نعم للتعديلات الدستورية
و 37,1 % نسبة المشاركة
a7eb a2ol : el sha3b wafe2 3ala mashro3 7'azok lekol mwaten mabroooook
واحد من الناس
عيش وحلاوه وحتتين لحمه في رغيف الله يكرمك ده اصلا لوعرفت انا هبقى مرمي فين
محمد
هههههههههههههههه
عاشت يا عم بقا ولا ماتت مبقتش تفرق
كريم
هرد عليك نفس الرد
تحيا مصر
تحيا مصر
حسام
اولا النسبه اللي شاركت كانت سبعه وعشرين بس
غير يا عم احنا دولتنا كريمه كرم جامد يعني الموضوع هيعدي موضوع واحد بس لكل مواطن ده كل واحد هياخدلو حوالي 500
loooooooooooooooooooooooooooool. gamid awy el post dah ya wa2el be nesbet 75% ;) we ew3a tensa ely masr edetholak 2edetak el bilharzia we el hepatitis we 3'ero ya naker el gemil
صدقا بجد مصر اديتني حاجات كتير حلوه بس اخدت مننا احم حاجه هي انسانيتنا
Post a Comment