التاجات دي عذاب بجد طريقه جميله ومقنعه لتعذيب الاخرين ممكن يكون التاج بيبينلك حاجات مكنتش عايز تعرفها عن نفسك وممكن كمان اسئله بتحس انك مش عايز تجاوبها.
من الاخر اشكر الورده البيضا ( باتريشيا ) على انها عاقبتني بالتاج ده
نبدأ نحل التاح يا هادي يارب
انت مين ؟؟
مين زوزو؟ انا وائل احمد بني ادم عادي
مين اكتر ست اشخاص بتحبهم ؟؟؟
مش عارف ايه الحكمه انهم يبقو سته
بس هما ماما واختى الصغيره والكبيره وحسني مبارك وفتحي سرور و حبيب العادلي
هل انت سعيد ؟؟
لا انا وائل
لو اجتمعت مع حسنى مبارك فى مكان واحد هتعمل ايه ؟
هعمل ايه يعني هبوسه واعيط واقوله ربنا يطولنا في عمرك
لو معايا مليون و نص اعمل ايه ؟؟؟
مش عارف اول حاجه اطلع عمره وحج انا وماما
اشتري شقه وعربيه واجهز الشقه
والعب قمار بالباقي
بتحب مصر ؟؟
يانهار اسود هو الموضوع اتعرف؟
انت مسلم ؟؟
الحمد لله
ليه ؟؟
في الاول عشان بابا وماما مسلمين دلوقتي عشان مقتنع تماما ان دي الحاجه الصح الاكيده في حياتي
مين اكتر شخصية متقدرش تستغنى عنها ؟؟؟
فاطمه بنت البواب عشان بتجيب العيش الصبح
ايه اكتر موقف محرج ؟؟
ليه بنت خالتي اسمها نجلاء اتصلت بيها مره الساعه واحده وشويه باليل وبعدين رد عليه راجل قلتله بمنتها الادب ممكن اكلم نجلاء؟ بمنتهى الزوء سكعني شتيمتين حلوين وقفل في وشي السكه
ثم اكتشفت ان نجلاء اللي انا اتصلت بيها دي هي زميلتي وغالبا اخوها او ابوها ايا كان مين اللي رد عليا بهدلها بهدله ما بعدها بهدله وانا بجد لحد النهارده لما بشوفها ببقى نفسي اموت نفسي
الامنية اللى اتمنا تحقيقها ؟؟
نفسي اتجوز وانا صغير عشان اخلف ولادي وانا صغير وابقا صاحبهم اوي
او اشتغل رقاصه
التاج باه يتمرر لمين ؟؟؟؟
بمرره ل بني ادم و ساره الدشناوي و محمود عزت واللي مش عايزيجاوبه بجد براحته ومعلش على الاجابات الغريبه اللي قلتها بس كده احسن
7 comments:
و تحب تمرره لمين
بني ادم
لأ فالح
يعني احنا الحمد لله ربنا طول في عمرنا و خلصنا امتحانات و انت باعتلي اسئله تاني
روح يا شيخ ربنا يديك علي قد نيتك
صباح الخير يا وائل ، هو صحيح الواحد اتهرا اسئلة بس يعني جاوبنا راوية عزت ة جاوبنا نادية بدراوي و جاوبنا سلوي عبد العظيم و انت اولي منهم كلهم اولا: انا مين؟ واحدة ربنا جابها الدنيا و في يوم حياخدها
اكتر ست اشخاص بحبهم تمي و ابويا و اخويا و جدتي و ريهام و انطوان اعز اصحابي
انا سعيدة؟ طول ما انا معنديش هدف فشلت في الوصول ليه او حلم متحققش
لو اجتمعت مع حسني مبارك ؟علي حسب في الدنيا و لا الآخرة؟
لو معايا مليون و نص ؟ حشيل المليون و بالنص حطلع عمرة و اغير عربيتي و الف العالم و اما اتخرج من المليون ابقي آخذ دكتوراة من برة و افتح مستشفي خيري اسميه علي اسم جدتي و اشارك في مستشفي استثماري عشان اعرف
اصرف علي نفسي و علي المستشفي الخيري
بحب مصر؟آه بس مش زي الأول عشان بقيت حاسة انها مبتحبنيش يعني حب من طرف واحد
انا مسلمة؟ الحمد لله
ليه؟عشان ربنا من علي بالنعمة دي اللي حرم منها ناس تانية ، و سبحانه مالك الملك يعز من يشاء و يذل من يشاء
مين اكتر شخصية متقدرش تستغني عنها؟امي
اكتر موقف محرج؟وانا في ثانوي كنت رايحة تمرين الكاراته في النادي وواحد عاكسني و زودها شوية و ملاحظتش من شكله غير انه كان لابس تريننج النادي و اقصر مني لما مشيت اتحرق دمي اني مضربتوش و انا كنت اقدر رحت عند بابايا في التيرو كان بيضرب نار هناك و شفت الولد فاشتكيت لبابا و رحت عشان اضرب الولد لما اتأكدت انه مش ابن حد من اصحاب ابويا عشان اشتكيله ياخدلي هو حقي ، شافني ابن صاحب بابا و كان بطل التايكوندو في النادي و كمل علي الولد و في الآخر اكتشفت انه مش هو ده واحد تاني لابس تريننج النادي حظه رماه في طريقي
و مكانش فاهم ايه علاقة انه مش ابن حد هنا بالضرب اللي خده لأني سألته السؤال ده و بعدها علي طول بدأت الضرب
الامنية للي نفسي فيها؟ انا مش عايزة من ربنا غير اني اتجوز الانسان اللي بحبه و اكون جراحة تجميل شاطرة
امرر التاج لمين ؟مش حمرره لحد عشان كفيانا تمرييه هو في طالب طب حياته لسه متمررتش:)
كان نفسي اشوف شكلك والراجل بيبهدلك في التليفون وهو ليه في الست اشخاص اللي بتحبهم ماقلتش والدك؟
بني ادم :
مش عارف انت بتدعيلي ولا بتدعي عليه
ساره :
اجاباتك كلها مقنعه جدا
بس موقف جامد اوي بتاع الشخصيه الغلبانه اللي اتعجنك عشان لابس ترنج اصلي متخيل منظرك واني داخله عليه منغير اي سبب وفجأهالغلبان بيتطحن بجد انا لو مكانه ممكن يحصلي حاجه
واحد من الناس :
مقولتش بابا عشان متوفي بس انا بموت فيه مش بحبه بس
لو كنت عملتها دلوقتي كان زماني في نص هدومي دا غير اني اساسا لا يمكن اضرب حد دلوقتي بس اياميها بقة كل اللي قلته ليه علي العموم لو مكنتش انت انا آسفة هاهاهاها
ساره الدشناوي :
لا كتر الف خيرك انك بعد ما ضربتيه وهو ما عملش حاجه قولتيله انا اسفه
هههههههههههههههههههه
يالهوي دا انت شايل مني ... معلش بقى ... المهم مش تزعل ..وبعدين انا قلت لو مش عايز ترد مش ترد :(
بايني بغلت كتير الايام دي :(
يللا خير
ربنا يخليك لاهلك ويخلي اهلك ليك
Post a Comment